Sira 41
41
Rufu
1Iwe Rufu,
omuntu atungire akagoijagira, ataina bihugwe,
aina buli kantu,
akyaina amani g'okulya akanulirwa,
k'akwijuka omutinisa!
2Iwe Rufu,
omuntu emburabulirwa, mara ayahoire amani,
ayakuzire muno, kandi ayayekanasire buli kantu,
ayayetamirwe, n'agegumisiliza atakiinago,
ogwo alikunda eiramu lyawe!
3Eiramu lya Rufu otalilitina.
Oijuke amakiro gawe aga ruli
n'okwo habayo endekelero y'oburora.
Omukama n'iwe yateleireho abantu bona omuku ogu.
4Ekilikushemelera Rukirabyona
iwe wakukyang'otai?
Omuntu yarora myaka ikumi anga kikumi anga rukumi,
ekyo omuli Hadesi taliho akyebazaho.
Akabuta akagwera ababi
5Abaana b'abafakare tibagonga mu bantu,
mara tibosha mbali abatatina Ruhanga bali.
6Obusika bw'abaana b'abafakare bulichweka,
kandi baijukuru babo barajumwaga ebiro byona.
7Abaana balyefuhya ishebo atatina Ruhanga,
orw'okuba abantu babajuma nibabatura wenene.
8Mulibona inywe abatatina Ruhanga,
abalikushaga Amateka ga Ruhanga Rukirabyona.
9Orwo muzarwa, muzarwa kubona omuraamo;
kandi orwo mufa, omuraamo nigwo mugabo gwanyu.
10Ekiruga omw'itaka kigaruka omw'itaka,
kityo abatatina Ruhanga baruga aha muraamo basilika.
11Abantu kabachura bachulira abafu babo,
kyonkai eibara libi ly'abafakare lilichweka.
12Olinde eibara lyawe,
aha rw'okuba ligumaho omwanya gurai
kukira esitoa zihango rukumi z'ezahabu.
13Ebiro eby'oburora burungi bibaliliire,
kyonkai eibara lirungi lirama ebiro byona.
Okugira akashoni
14Baana bange, mwekomye ebyo ndikubegesa,
mugire emilembe;
bwaba bumanyi obushelekire anga itunga elitalikuboneka,
kilihai ekiina amagoba?
15Hakili omuntu asheleka obuferabwe
kushaga omuntu asheleka obumanyibwe.
16Orw'ekyo ebigambo byange mubikunire.
Aha rw'okuba ti kirungi kugira kashoni buli kanya,
kandi ti buli kintu kisiimirwa kimoi buli omoi.
17Ogire akashoni,
otagoka mu maisho ga sho anga nyoko;
kandi otaligamba kishuba okagoka
mu maisho ga mwami anga mutwazi.
18Otalikora ntambara okagoka mu maisho ga muramuzi
anga mwami;
otalikora kubi okagoka mu maisho ga nteko anga mbaga;
kandi otaliburwa bwesigwa
okagoka mu maisho ga mutahi wawe
anga munywanyi wawe, mara
19otaliiba okagoka mbali otwire.
Oshonalire amazima ga Ruhanga n'endaganoye.
Ogire akashoni orwo olikulya n'abandi.
Omuntu atalikuha kantu okakatora nogurubaana;
naiwe otaliha muntu kantu nokanyanyara.
20Ogire enshoni kubona omuntu nakushura iwe okamwesiza,
kandi n'okuleba omumalaya kukushonaze.
21Ogire enshoni kubona omunyaruganda
akwendize ekintu okamwangira;
kutyo n'okutwara eky'omuntu anga ekyo bamuhaire.
Hamoi n'okushamalira muk'omushaija.
22Ogire enshoni kwefumolereza n'omuzana w'abandi,
n'ekitandakye otakigobaho.
Okushegura omu maisho ga batahi bawe kukushonaze;
kandi otaliha muntu kintu okamujuma.
23Okwatwe enshoni kugamba eky'ohuliire
n'okuhyongya orukuru, hamoi n'okwata enama.
Aho nirwo oliba oyolekire
okwo oina enshoni ezilikwo,
mara olishemelera buli muntu.
Currently Selected:
Sira 41: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.