Sira 40
40
Enaku z'omuntu
1Buli muntu akatondwa ali w'okukora emilimo y'amani,
kandi abaana ba Adamu betwekire enkomo elikusikiira,
kwema kiro ekyo baruga omu mabunda ga banyinabo,
kuhika kiro ekyo bagaruka owa nyina bona.
2Ekibashobeza kikabagiza n'obutini
emitima ekabemelera,
kumanya okwo haliho kiro orwo balifa.
3Kwema aha muntu ashuntamire aha nketo kaliza,
kugoba aha muntu ashuntamire omw'itaka n'omw'ijwi,
4kubandiza aha muntu ajwete enyambarwa
za zambarau n'orukinga
kuturuka aha muntu ajwete orugunia,
5bona bagira ekiniga, akachubirano,
enaku n'okutatebekana, batina okufa,
mara tibenda nsika na mpaka.
Kandi omu kiro omuntu k'agya aha kitandakye kwikya,
oturo tumutabangura omutwe.
6Ahumuraho kake anga byangira kimoi;
kandi ahanyuma orwo anagiire,
ashusha alikumankya,
n'ebyo arota bimwita kubi,
ashusha omuntu alikuhunga omu ndashana.
7K'agoba ahalikusha oti takifa asisiimuka,
ashuba atangara kubona okwo yaba natina obushai.
8Byona ebikagira omubili, omuntu n'enyamaishwa,
abafakare abo lero ngambeki,
9bifa, biitangana, birwana, bigira endashana,
bigwerwa ebiyengo, biterwa eifa n'enaku n'ebibundo.
10Ezi zona naku ezatonzirwe kutera ababi,
mara ababi abo nibo balesire omutunga.
11Ebintu byona ebiruga omw'itaka bigaruka omw'itaka,
nk'okwo n'amaizi gona gagelera omu nyanja.
Akabi k'emize
12Rushwa yona n'okutakoza mazima bilichweka,
kyonkai obwesigwa buligumaho ebiro byona.
13Eitunga ly'omubi lilyoma nk'engezi,
lisharuke nk'enkuba esharuka omu njura.
14Omufura balimuha ebyera,
kyonkai abafakare galyangira kimoi.
15Abaana b'abatatina Ruhanga tibaliramuuka,
bashusha emizi etaina mani aha rwazi rushai.
16Ebifunjo ebimezire aha maizi hona hona
anga aha rukungu rw'omwiga
bisharwa obunyasi obundi butakashazirwe.
17Obufura bushusha ebusitani y'emigisha,
n'okushumbusha abaanaku kugumaho ebiro byona.
Ebishemelera omuntu
18Omuntu ayeyemera n'omukozi w'emilimo,
oburora bubagenderage,
kyonkai omuntu abona eitunga
bona abo abakira harai.
19Oruzaro anga okuhangura ekigo kuha omuntu eibara,
kyonkai omukazi omushwerwa enzira katalizi,
asiimwa kukira byombili ebyo.
20Amarwa n'ebizina biha omutima ebyera,
kyonkai okugonza obumanyi nikushaga ebyo byombili.
21Omulere n'enanga binuza ekizina,
kyonkai eiraka lirungi nilibikira byombili.
22Elisho ligonza kuleba eby'ekitinwa n'ebirungi,
kyonkai engano nto nebishaga byombili.
23Omuntu tahabangana na munywanyiwe anga mutahiwe,
kyonkai omukazi ahali mushaijawe nakira abo bombili.
24Omu matangwa kiba kirungi
kushangwa oina barumuna bawe n'abandi ab'okukujuna,
kyonkai okushumbusha abaanaku
nikujuna kushaga engeli zombili ezo.
25Ow'ezahabu n'efeza k'ayemelera ahamisa amaguru,
kyonkai okuhanuura kurungi kusimwa
kukira byombili ebyo.
26Eitunga n'amani bigumisa omuntu,
kyonkai okutina Omukama kushaga ebyo byombili.
Omuntu kutina Omukama oba otafeleirwe kantu,
mara amutina tayetaga kuhiga bujuni bundi.
27Okutina Omukama nikushusha ebusitani y'emigisha,
taliho kitinwa kilikumumara kushaga ekyo.
Obwanje
28Mwana wange, otalyehindura mwanje;
hakili kufa kukira okushabiiliza.
29Omuntu kwikara amaisho agahangire ebyo mutahiwe
alikwija kulya narokombwa alebire nk'aramuhaho,
ogwo oburorabwe nibuba butali burora.
Ekyakulya ky'ondijo ekyo yalya kimuhagaza,
kyonkai omuntu omugezi alezirwege, ekyo akyelinda.
30Akanwa k'omuhwanshoni kanulirwa ebyo ashabiliize,
kyonkai omu rubundarwe omuliro nigwaka.
Currently Selected:
Sira 40: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.