Sira 42
42
Eby'okutagilira nshoni
1Ebilikuhonderaho ebi otalibikwatirwa nshoni;
k'oligira ekinshonanshoni kilikunaga omu bufu.
2Otaligilira nshoni Mateka ga Rukirabyona
na ndaganoye,
n'abatatina Ruhanga otalibakwatirwa nshoni
okabaramuza kigonzi okabataishura.
3Otaligira nshoni kubiika empiya n'owo mwemire hamoi,
anga kuzibiika hamoi na batahi bawe
abo muli hamoi omu rugendo,
nangu n'okubeganira banywanyi bawe obusika bwabo.
4Okupimisa kurungi eminzani,
n'okugira bike na bingi ebyo bitalikugiza nshoni.
5Abatunzi okutunda nabo okabaihyaho amagoba,
okulerage abaana bawe,
n'omwiru wawe omubi kumuhyagura akahulira,
ebyo otalibikwatirwa nshoni.
6K'oina omukazi mubi,
anga k'oina abantu bangi nimukwatirana ebintu,
ebintu ebyo obikingirane.
7Byona byona eby'olikutunda,
obyekomye orubara n'obusikizi bwabyo,
kandi ohandike byona eby'olikuturukya anga kutahya.
8Otaligira nshoni kwegesa omufano anga omufera,
anga omukuru alikukungana n'omuto.
Aho oliba oyegirekwo,
mara olisiimwa abantu bona.
Ishemuntu n'omwana muhara
9Omwanamuhara abuza ishe oturo atalikumanya,
kandi okumugilira akahangahango kumuraza namankya.
K'aba akyali muto ati rundi talishwerwa,
kandi k'ashwerwa ati shana tayendwe.
10Orwo ali mwisiki amutinilira ataija akahagara,
anga kutwalira ensinjo omwabo.
Amutinilira kwija kubona omushaija
kandi akaburwa obwesigwa,
anga kushwerwa akagumbara.
11Muhara wawe kitwekiguma omulebelere muno,
atalija akakushekeleza ababisha bawe,
omu kigo bakagamba iwe, okaranganwa omu bantu,
akakushonaza omu mbaga ekiikire.
12Omuntu otalimushamalira aha rwa burungibwe,
kandi otalishuntama mu bakazi.
13Kuba nk'okwo emyendo erugwamu enyenje,
nikwo n'omukazi azarukwamu ebibi.
14Hakili omushaija w'omutima gubi
kushaga omukazi w'omutima gurungi;
omukazi n'iwe ashonaza abantu akabahemura.
Ekitinwa kya Ruhanga omu bitondwa
15Mbwenu kanyijuke ebyo Ruhanga yakozire,
ngambe n'ebyo ndaboine.
Ebyo Omukama akora abikoza ekigambo kishai.
16Nk'okwo eizoba lyema eiguru
omushana gwalyo gukagoba buli kintu,
nikwo n'ebyo Ruhanga yakozire
byoleka ekitinwakye kingi.
17Omukama tiyahaire batakatifube bushobora
bwa kumanyisa eby'okutangazabye byona ebyo yakozire,
ebyo wenene Rushoborabyona yataireho,
eiguru n'ensi kwikara biramire bikamuha ekitinwa.
18Ahenjuza eby'okuzimu n'omu mitima y'abantu,
abona ebyo bakoza amagezi gabo agabi.
Eby'okumanyika byona Rukirabyona abimanya,
amanya n'obubonero bw'amakiro.
19N'iwe amanyisa ebirabaireho n'ebilibaho,
ashurura n'emihanda y'ebintu ebishelekire.
20Taliho kitekelezo kya muntu ekimurabaho,
taliho kigambo na kimoi ekyo yakusheleka.
21Ebirungi eby'obumanyibwe n'iwe abiha omuteka,
kandi wenene abaho eirai n'eirai.
Taliho kyakumwongerwaho anga kumwihwaho,
kandi talikwetaga wa kumutegekera.
22Nibiramaiza bitai ebyo yakozire byona,
okubileba nibimyansa bitai?
23Ebyo byona biina oburora mara bigumaho eirai lyona,
kwiza buli kyemba, mara byona bimuhulira.
24Ebintu byona biba bibili bibili,
ekimoi kinyume kya kitahi kyakyo,
kandi taliho kyoyatonzire kitagobire.
25Ekimoi kihamisa oburungi bwa kitahi kyakyo.
Mbwenu n'ohai ow'okuhanga ekitinwakye
amaisho akakihaga?
Currently Selected:
Sira 42: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.