Sira 39
39
Omuhandiki
1Rubaju orundi omuntu ataho amanige
kwega Amateka ga Rukirabyona,
ahiga n'okumanya obumanyi
bw'abagurusi bona aba karai,
ata n'omutima aha by'abarangi.
2Ayekomeleza eby'abantu ab'eiranga bagamba,
kandi ahenjuza n'amakuru g'enfumu.
3Achukuuza enshonga z'emigani ezili omunda,
ayanguhirwa kumanya eby'emigani elikugamba.
4Akolera abahango, aramata aha batwazi.
Arambura amahanga,
abone kumanya ebirungi n'ebibi eby'abantu bakora.
5Ataho amani kwimuka karai
kufukamira Omukama ayamutonzire,
ataka ahali Rukirabyona,
amushaba namutonganaho amafuge.
6K'Omukama ayenda,
amuha okushobokerwa kungi muno,
agamba eby'obumanyi,
ashoma enshara nasiima Mukama.
7Amanya okuhanura kurungi
n'okukozage amagezige,
atekeleza muno enama.
8Omu myegeshezeye ayolekya okwo ayegire,
ayebuga n'Amateka g'endagano y'Omukama.
9Okushobokerwakwe bakumusiimira bangi,
mara tikwebeka.
Baikara nibamwijuka ebiro byona eibaralye tilyeba.
10Amahanga garangaana obumanyibwe,
n'enteko emusima.
11K'arama asiga eibara lirungi
elikizire agandi rukumi,
kandi n'orwo agya kuhumura,
agenda asanirwe.
Oruhoya rw'okusingiza Ruhanga
12Nkyaina ebindi eby'okugamba ebyo ntekeleize,
binyijwire nk'okwo okwezi kwijura kwabaire ekimatiro.
13Mumpulilize inywe baana bange abarungi,
mushebuke nk'eroza emera aha mugera.
14Mutamiirane omugaju nk'obunuma,
mwakye orwakyo nka lilia.
Mutamiirane omugaju,
muhoye oruhoya musingize Omukama,
mumuhaisilize aha rw'ebyo yakozire byona.
15Eibaralye mulihe ekitinwa,
mumusiime nimumusingiza,
mumusiime nimuhoya, nimutera enanga;
mumusiime nimugamba muti:
16“Ebintu byona bikakorwa Omukama,
aha rw'okuba biba birungi muno,
mara eky'ahanga kyona kyona
kikorwa omu kanya ak'aragire.”
17Taliho yakubaza ati,
“Kiki eki? Kubaki byaba bityo?”
Kuba ebintu byona bimanyikira omu kanya
ako Ruhanga ataireho.
Kayagambire amaizi gatumuuka,
ekigambo kishai kikagemeleza.
18Eky'ayenda agamba kushai kikorwa,
taliho yakufutika bushoborabwe oburokora.
19Eby'abantu bona bakora abibona,
taliho kyobakumusheleka ngu atakibona.
20Kwema karai aka karai abibona,
ahali wenene taliho kya kumutangaza.
21Buli kintu kikatonderwa mugasho gwakyo;
taliho yakubaza ati, “Eki kiki?”
Anga ati, “Kilinya kyaki?”
22Omugishagwe gubunda orukaru okw'obona omwiga,
gurushabisa nk'omuntunga.
23Amahanga galimwetamisaho agabonabonyie,
nk'okwo amaizi garungi agahindura mwonyu.
24Eby'ayenda abatakatifu babisima,
kyonkai ababi bibatama.
25Kwema obutwe ebirungi bikatonderwa abarungi,
nk'okwo ebibi byatondeirwe abafakare.
26Ebishasize eby'omuntu ayetaga omu burorabwe
niby'ebi;
amaizi, omuliro, ekyoma, omwonyu,
engano, amata, obwoki, edivai,
amajuta n'ebijwaro.
27Ebiro byona, ebi byona biba by'abatina Ruhanga,
kyonkai abafakare bibahindukira bibi.
28Haliho emiyaga eyatonzirwe eli y'okwehoroza,
k'eihya n'ekiniga etera kubi.
Aha kiro ky'eiramu emiyaga egyo
elihinda n'amani gangi muno
echuleze ekiniga ky'omutonzi wayo.
29Omuliro, enjura y'orubare, eifa n'endwara,
ebi byona bikatondwa bili by'okwehoroza.
30Amaino g'ebikaaka, obumiina n'enchwera
hamoi n'embanda,
ebyo biba by'okubonabonyia abatatina Ruhanga
bikabasilikya.
31Ebyo byona bilishemelerwa eby'Omukama alibihangira,
omu nsi omu byetekatekere omulimo gwabyo,
mara orwo akanya kaligoba
tibilishaga kigambokye.
32Orw'ekyo kwema aha mbandizo
ebigambo ebi bikangoba aha njoka,
nabitekelezaho nashuba nabihandikaho nti:
33Ebyo Omukama akora biba birungi byona,
buli kimoi ekyetagwa akigira aha saa yakyo.
34Taliho yakugamba ati,
“Eki kibi kushaga kili,”
Aha rw'okuba ebintu byona biboneka
okwo bili birungi omu birumo byabyo.
35Kityo mbwenu aha muhoye n'omutima gwanyu gwona
n'eiraka limoi,
muhaisilize Eibara ly'Omukama.
Currently Selected:
Sira 39: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.