Sira 22
22
Obunafu
1Omunafu ashusha eibare linaho omwejuno,
buli omoi amushuhya namutura omuze ogwo.
2Omunafu wakumulenga obujunde omu rubungo rw'obushai,
ayabukwata wena abwekunkumura aha mukono.
Omwana mubi ajumisa ishe na nyina
3Omwana enyeleme ashonaza ishe,
kandi okuzara omwisiki noba ofeleirwe.
4Omwisiki aina amagezi abona omushaija,
kyonkai omuhwanshoni ajunaza ishe.
5Omukazi atakuna ashonaza ishe na mushaijawe,
mara bombili bamugaya.
6Amakuru gatabarwirwe mu kanya kago
nigashusha ekizina eky'omuntu kuzinira omu rufu.
Kyonkai kutera omwana kumwegesa
obwo buba bumanyi rwona rwona.
Obumanyi n'obufera
7Ow'okwegesa omufera ashusha alikukwata enguhyo
kuzikwatanisa n'egundi,
anga alikwimukya ayaba anagiire atokire.
8Abarulira omufera ashusha alikugambira alikusomba,
9ahanyuma aija amubaza ati,
10“Wagambaki?”
11Chulira afire, kuba takili ruguru;
n'omufera omuchulire, kuba taina magezi.
Afire omuchulire mpora kuba aikize;
kyonkai omufera omuchulire kushagaho,
kuba kyakubaire hakili kayakufiire kukira okurora.
12Afire bamuchulira ebiro mushanju,
kyonkai omufera anga atalikutina Ruhanga
bamuchulira oburorabwe bwona.
13Otalifumora na mufera okagamba bingi,
n'ataina magezi otamukyalira;
omwelinde otalija okagwa omu kabi;
atalyekunkumura nziro zikakwata iwe,
k'olimwenyinya oligira emilembe,
n'eirarulye tililikulemesa.
14Kiki ekikiza eishasi obusikizi?
Isi eibara lyakyo ni lihai k'atali “Mufera?”
15Omushenye, omwonyu, n'ekyoma byangu kubyetweka,
kukira okwemera omufera.
16Eboriti ekomeirwe kimoi omu rukuta rw'enju
tesikurwa musisi;
kityo n'omuntu agumira kimoi aha ky'aramwire kurungi,
ebiyengo kabimukiza amani tatina.
17Omuntu ayemeleire aha kitekelezo ekyaramwirwe kurungi,
ashusha einoni elisiigirwe aha rukuta rw'eniiro.
18Amabare g'enkurungo aha rukuta eiguru
tigemera muyaga;
nikwo n'omufera atina ebyo wenene atekeleize
atakwemera kyakumutinisa.
Obunywanyi
19Ahutaza elisho aliliza amaizi,
n'ahutaza muno omuntu amugambisa ekili aha mutima.
20Arasira enyonyi eibare azipapaza,
n'ajuma munywanyiwe aita obunywanyi bwabo.
21N'orwo oliba waihire embanda omu ruraro
kwita munywanyi wawe, otalimushuburugukwa
mwakushuba muba banywanyi.
22K'oliba ogambire kubi ahali munywanyi wawe otalitina,
kuba mwakushobora kuchwa obwiko.
Kyonkai okumujuma, kumugaya, kwata enamaze,
anga kumubanja,
ebyo byakukwihyaho omunywanyi wena wena.
23Obe mwesigwa ahali mutahi wawe omunaku,
k'alitunga alikwijuka.
K'aliba ali omu naku omwambe,
k'aliba yazirugiremu oije oshemelerwe nawe.
24Etanuru k'eija kuhya ebanza enuka eturukwa n'omwika;
kityo n'arakwita akubanza n'ebijumi.
25Tindikwatirwa munywanyi wange nshoni za kumuhungya,
kandi tindimwesheleka.
26Kyonkai kandigubwaho akabi nkazira wenene,
wena alihulira ekyo alimwekenga.
27Nimbe nyina eky'okundinda akanwa,
n'okunkoma omunwa nkelinda,
kuntanga ntaligoka,
orulimi rwange rutalinyita.
Currently Selected:
Sira 22: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.