Sira 23
23
Enshara y'okukira aha bufu
1Waitu Mukama, Tata mara mugelezi w'oburora bwange,
otalinnaga nkaitwa kanwa kange,
ntaligamba kubi nkagoka.
2Nibabe baba nibantera bakantura ebyo ndikutekeleza,
bakanyegesa nkagira obumanyi!
Tinakushobize nkagonza kabandeka,
obufu bwange n'obumoi bwonkai
tinakwenzire kabuhinguraho bushai!
3Aho tinakwikaire ninfakara,
kutungika obufu aha bundi;
ahanyuma kugwa omu mikono y'ababisha bange
kumbonesa enaku!
4Waitu Mukama, Tata mara antunga oburora,
singa onjune eikuru,
5ondinde ntalyegomba kukora kubi.
6Osingire, omururu n'obunyama bitalinkiza mani,
otalinnaga nkaba muntu enjanga.
Okunahira
7Baana bange, huliliza mbegese okwo bagamba;
alyekomya ebyo naija kubegesa talikwatwa mushango.
8Omufakare eby'agamba nibyo bimukwasa,
enjumangani n'omunyaikuru nibyo bibatega.
9Akanwa kawe otalikamanyiza kunahira,
kandi otalyemanyiza kwatura ibara lya Mutakatifu.
10Nk'okwo omwiru aikara naterwa
ataburwa kubujuuka,
nikwo n'omuntu aikara nanahira mara nayatura eibara elyo
ataburwaho bufu.
11Omuntu anahira emirundi nyingi
n'entambara agira zingi,
mara n'ekaye teburwaho kibonabonyio.
Orwo ashobya obufu bukwata wenene,
kandi k'ayanga kubwechuza,
obufubwe butama kushagaho.
K'alikunahira obuzira nshonga,
omushango nigumukwata;
enshonga ekaye egira enaku zingi muno.
Efumoro etaragiirwe
12Habaho emigambire eshusha rufu,
egyo tiyakugambwa Mwisiraeli!
Kuba entambara nk'ezi
tizakukorwa bantu abatina Ruhanga,
abo tibaragiirwe kwekurunga mu mafu.
13Akanwa kawe otalikamanyiza kugamba bya busheegu,
kuba egyo eba migambire mibi.
14K'oliba oshuntamire omu bantu bahango
oijuke sho na nyoko,
otalija okeyebwa mu maisho gabo
okaboneka oli mufera aha rw'emimanyilire mibi.
Wakwija ahanyuma oyefuhya ekyo wazaliirwe,
okena n'ekiro kyowazaliirweho.
15Omuntu amanyire kukoza ebijumi,
taligira rwo yachwa muze ogwo oburorabwe bwona.
Amafu g'obusiyani
16Habaho abantu engeli ibili abakora obufu
bakabutungika aha bundi,
kandi ab'engeli ya kashatu abo banigaza muno Omukama.
Omuntu k'ayegamba eby'obusiyani,
ashusha etanuru elikwaka omuliro;
taturura kuhika orwo akora ekyo ayegambire.
Omuntu asiyana n'owakwataine nawe muno,
talekera muze ogwo gulemwa gumwita.
17Ensiyani enulirwa ebyakulya byona;
obusiyani tabulekera alemwa yafa.
18Omushaija achwa ebiraganobye by'obushwere
atekeleza ati, “Alikumbona n'ohai?
Ndi omu mwilima, nyeshelekire omu nju.
Taliho alikumbona. Kubaki ntine?
Rukirabyona amafu gange nagamanya.”
19Wenene natina abantu kumubona,
talikumanya okwo amaisho ag'Omukama galikubona
kukira eizoba emirundi 10,000.
Ag'Omukama gabona byona eby'abantu bakora,
nangu na mbali beshelekire.
20Ensi yona etakatonzirwe akaba yagimanyire,
mara yaikara agimanyire nk'obubere
n'orwo yabaire yatonzire yona.
21Omushaija owab'ogu alibona ekibonabonyio omu kigo
omu maisho g'abantu bona,
mara mbali atalikwebabara n'akati niyo alikwatirwa.
22Kumoi n'omukazi atali mwesigwa ahali mushaijawe,
akashuba akamuzalira omwana aheru.
23Ekya mbere kushaga byona,
naba achwire Amateka ga Rukirabyona;
ekya kabili naba afakaliire mushaijawe;
ekya kashatu naba asiyaine
omu kushemera n'omushaija ondijo kandi amutwekire enda.
24Omukazi ogwo balimuleta omu maisho g'embaga,
n'abaanabe balishasha bazire obufubwe.
25Abaanabe tibalibona bukwato,
mara tibaligira ruzaro.
26Alifa asige omuraamo,
ekihemukye tikilyebeka.
27Abo alisiga oruguru balibona okwo hatabaho kirungi
kishagire okutina Omukama,
kandi tabaho kishemera kukira okwekomya emihangoye.
Currently Selected:
Sira 23: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.