Sira 10
10
Engoma
1Omuramuzi omumanyi ayegesa abantube,
n'obutwazi bw'omuntu omugezi bugira omuteka gurungi.
2Okwo omuramuzi w'embaga ayemire,
nikwo n'abahwezibe bali.
Emikaliire y'omutwazi w'ekigo niyo y'abatuzi bamwo.
3Omukama ataina ngesho zirungi asitaza embagaye,
kandi ekigo kigoshorwa abatwazi bakyo okugira amagezi.
4Engoma ey'omu nsi omu eli omu mikono y'Omukama,
mara n'iwe ataho ow'okugitwara orwo yayetagwa.
5Omukama n'iwe aha omuntu egoshoko,
kandi n'iwe aha omuhweziwe ekitinwa.
Eikuru
6Otaligilira mutahi wawe kiniga
buli orwo yakushobya,
kandi otaligira kyo wakora okakikoza ikuru.
7Eikuru liba libi aha Mukama n'aha bantu,
n'okutakoza mazima nikutama embaju zombili.
8Obutwazi kuruga aha ihanga bukatwara ihanga lindi,
nshonga y'okutakoza mazima, n'eikuru n'eitunga.
9Mbwenu omuntu ali chuchu, ali ijwi,
yakugira atai eikuru?
Mara n'orwo akyarora ajunda amara.
10Oburwaire butakira bwangu butabura omutambi amagezi,
ali mukama mbwenu, nyenkya nafa.
11Omuntu k'afa,
alibwa ebihuka n'ebikaaka n'enzito.
12Embandizo y'omuntu kugira eikuru
kuba okutanuka aha Mukama;
kwebwa Omutonziwe.
13Embandizo y'eikuru bufu,
mara omuntu alizigilira akora ebizira.
Nikyo Omukama ahera ab'eikuru ebibonabonyio
ebitali bya buli kiro, akashuba akabaitira kimoi.
14Omukama arachulengwire enketo z'abatwazi,
yazishuntamyaho abajege.
15Omukama arasindwire amahanga n'emizi yago,
omu nsi ezo yatamu abantu abetohya.
16Omukama arasilikize ensi z'Abanyamahanga,
yazirandura yazimara omu nsi.
17Aina ezo yaihireho akazita omwebuura,
yazichwa zayebekera kimoi.
18Omuntu tiyatonzirwe kugira ikuru,
anga nkazarwamukazi wena
kugira kiniga ekishaguliraine.
Abantu ab'okukunirwa
19Ihangaki elisaine ekitinwa? Bantu.
Ihangaki elisaine ekitinwa? Abatina Omukama.
Ihangaki elitaragiirwe kitinwa? Bantu.
Ihangaki elitaragiirwe kitinwa? Abashaga emihango.
20Abali barumuna alikubakulira aragiirwe ekitinwa,
21n'abatina Omukama baragiirwe ekitinwa ahali wenene.
22Omutungi, omukunirwa, n'omunaku,
ekitinwa kyabo kutina Omukama.
23Ti kurungi kugaya munaku aina magezi,
anga kugir'oti ekiragiirwe kuha omufakare ekitinwa.
24Omuhango, omuramuzi, n'omutwazi barahabwa ekitinwa,
kyonkai ahali bonene abo
taliho alikushaga muntu atina Mukama.
25Abatali bairu balikolera omwiru aina obumanyi,
mara omuntu aina amagezi talyeboroboita.
Obwetohya n'okwekunira
26K'oliba nokora omulimo otalyoleka okwo oina bubuya,
kandi otaliba obuliirwe okagira ikuru.
27Hakili omuntu akora emilimo akagira ebintu bingi muno,
kushaga ayelingilika kyonkai ataina kyakulya.
28Mwana wange, oyetohye okunirwe,
oyehe ekitinwa kikusaine.
29N'ohai ayakwetongelera omuntu akora amafu gakamuhinduka?
N'ohai arakunira omuntu atalikwekunira mu by'alikukora?
30Omunaku akunirwa aha rw'obumanyibwe,
kandi omutungi akunirwa aha rw'eitungalye.
31Omuntu yakunirwa ali munaku,
lero orwo atungire?
Currently Selected:
Sira 10: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.