Orubara 36
36
Obutaka bw'Abakazi Abashwerwa
1Abakuru b'amahiga omu ruganda rwa Gileadi eya Makiri, Makiri eya Manase, Manase eya Yozefu, bagya ahali Musa n'abakuru abandi ab'enganda omuli Isiraeli. 2Bagambira Musa bati, “Rugaba, Omukama akakuhangira kushondera Abaisiraeli ensi kubaha obutaka omu kugitekera enshoga. Yashuba yakuhangira kuha bahara ba Zelofehadi murumuna waitu obutakabwe. 3Kyonkai kabalishwerwa omu nganda ezindi omuli Isiraeli mwonene, rwona obutaka bwabo buliruga aha butaka bwaitu obwo tuliba tushondeirwe. 4Kandi omwaka gwa yubile y'Abaisiraeli kaguligoba, orwo ebyaguziibwe byona biligarukira bakama babyo, obutaka bwabo bulyongerwa aha butaka bw'enganda ezo baliba bashweirwemu. Aha rw'ekyo obutaka bwabo buliba bwihirwe kimoi aha butaka bwaitu bw'oruganda.”
5Aho Musa aragira Abaisiraeli, nk'okwo Omukama yagambiire, ati, “Ab'oruganda rwa Yozefu ebyo balikugamba by'amazima. 6Leba ekyo Omukama alikuragira ahali bahara ba Zelofehadi, ati, ‘Mubaleke bashwerwe abo barasiimaga, kyonkai bashwerwe omu banyaruganda babo. 7Hataligira butaka bwa Baisiraeli obwaruga aha ruganda bukagya omu rundi. Buli Mwisiraeli aikare omu rugandarwe. 8Kandi buli muhara alihabwa obutaka omu ruganda rwa Isiraeli, ashwerwe omu banyarugandabe, buli Mwisiraeli abone kuhabwa obutaka bw'oruganda. 9Aha rw'ekyo talibaho butaka obwaruga omu ruganda bukagya omu rundi; aha rw'okuba buli ruganda omu nganda za Isiraeli ruraikaraga omu butaka bwarwo.’ ”
10Bahara ba Zelofehadi bakora okwo Omukama yahangiire Musa. 11Bonene abo bahara ba Zelofehadi abalimu Mahula, Tiriza, Hogila, Milika na Noa, bakashwerwa abanyaruganda babo. 12Bakashwerwa ab'oruganda rwa Manase eya Yozefu. Aho obutaka bwabo bwaikara omu ruganda rwabo.
13Egyo niyo mihango n'emigenzo ebyo Omukama yahangiire Abaisiraeli omu kanwa ka Musa omu mpita za Moabu bwatana Yorudani aholekeraine na Yeriko.
Currently Selected:
Orubara 36: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
