Orubara 35

Ebigo by'Abalevita

(Obw 19:1-13; Yos 20:1-9)

1Omukama akagambira Musa omu mpita za Moabu haihi na Yorudani ahalebangaine na Yeriko ati, 2“Oragire Abaisiraeli omu butaka bwabo bahemu Abalevita ebigo by'okuturamu. Kandi babahe n'amataka agataine ebigo ebyo balisizemu ebitunganwa. 3Ebigo ebyo bibe byabo by'okuturamu, n'amalisizo gabe g'ente zabo n'ebitunganwa byabo byona. 4Amalisizo ag'aha bigo ago muliha Abalevita, gatandikire aha boma z'ebigo gagende emita 450 buli bwolekera. 5Enjai y'ekigo rubaju orw'oburugaizoba mupime emita 900; kasi emita 900; obugwaizoba emita 900; na bikara emita 900, ekigo kisigare omugati. Ago gabe nigo gaba malisizo gabo aha bigo byabo. 6Abalevita mulibaha ebigo mukaga eby'abantu kuhungiramu. Wena aliita omuntu ahungire omwo, kandi ebigo ebyo mukaga mubongereho makumi 42. 7Byona hamoi mulibaha ebigo makumi 48, hamoi n'amalisizo agabyataine. 8Ebigo ebyo muliihya muliihya aha butaka bw'Abaisiraeli kuha Abalevita, abangi mulibaihyaho bingi, n'abake mulibaihyaho bike. Buli ruganda n'obusika bwarwo okwo buliba buli, nikwo rulihiraho Abalevita aha bigo byarwo.”

Ebigo by'obuhungiro

(Obw 19:1-13; Yos 20:1-9)

9Omukama akagambira Musa ati, 10“Ogambire Abaisiraeli oti, Orwo mulishabuka Yorudani mukagya omu nsi ya Kanaani, 11aho mulironda ebigo byanyu eby'okuhungiramu. Alishangwa aisire omuntu atagendeleire abe nimwo ahungira. 12Ebigo ebyo bilibabera buhungiro bw'okukiliramu aha muntu ow'enzigu alikwenda kwehora. Aliba aisire omuntu aleke kufa atakemeleire mu maisho ga bakuru omushangogwe kuramurwa. 13Kandi ebigo ebyo omukaga ebyo muliha Abalevita nibyo biliba byanyu by'okuhungiramu. 14Buseli bwa Yorudani mwihyeyo bishatu, n'ebindi bishatu omuli Kanaani. Ebyo biliba bigo by'okuhungiramu. 15Ebigo ebyo mukaga biliba buhungiro bw'Abaisiraeli n'abanyamahanga n'abaliba bafurukiiremu. Aliita omuntu atamugendeleire, ahungiremu.”

16“Nawe k'halimuteza ekikwato ky'ekyoma akafa, ogwo aliba ali mwisi, kandi omwisi ogwo bamwite. 17Mara k'alikwata eibare ely'okwita omuntu, akhalimuteza akafa, ogwo aliba ali mwisi, mara omwisi bamwite. 18Handiki akwate ekiti eky'okwita omuntu akimuteze afe, ogwo aliba ali mwisi, omwisi bamwite. 19Omuntu alyeholera owa wenene owo baisire, aliba amwisire amwite; k'halimutanganwa amwite. 20Kandi aisire omuntu k'aliba amuchumisire omuhyo aha rw'okumunoba, anga akamuchokera, handiki kumuzimbira, akafa, 21anga aha rw'okumunoba akamutera enkoni akamunaga ahansi, akafa, kimutera ogwo bamwite; aliba ali mwisi. Alikweholera kifa k'alitanganwa omwisi ogwo, amwite. 22Kyonkai k'halimutera omuhyo kibandagara atalikumunoba, anga akagira ekyo yamujugunyira atamuzimbiire, 23anga akamuteza eibare ely'okwita omuntu atamuboine, akafa, n'orwo babaire batalikunobangana, kugir'oti yamugendelera kumuhutaza, 24aho embaga eramure omushango gwa kiita n'alikweholera kifa, okwo emigenzo elikuragira. 25Embaga egyo ekize kiita ahali olinya alikweholera kiitwa atamwita, emugarure omu kigo ky'okuhungiramu ekyo abaire ahungiremu, akikaremu kuhika orwo Omukuhani Nyamukuru ayakozirwe amajuta gatakatifu alifa. 26Kyonkai kiitamuntu k'alilenga kushabuka orubibi rw'ekigo ekyo ahungiremu, 27alikweholera kiitwa akamushanga enjai y'ekigo ekyo ekyo ahungiiremu akamwita, talikwatwa mushango ogwo. 28Aha rw'okuba kiitamuntu naragirwa kwikara omu kigokye ky'obuhungiro kuhika aha kufa kw'Omukuhani Nyamukuru muno, aho abe nirwo agaruka omuka.”

29“Ebiragiro ebi n'emigenzo egi mubikwate oburora bwanyu bwona hona hona mbali mulikatura. 30Kaishe muntu aliita ondijo, kugya kumwita hazokweho buzima abajulizi babili. Kyonkai ataliitwa hazokire omujulizi omoi. 31Kandi mutalitora kya kuchungura muntu aisire ondijo kandi okwo naragirwa kwitwa. Owab'ogwo bamwite. 32Kandi mutalikiliza eky'okuchungura omuntu ahungiire omu kigo ky'okuhungiramu, k'agaruka omuka kandi okwo Omukuhani Nyamukuru muno atakafire. 33Ensi eyo mulituramu mutaligihagaza. Ahakuba obwamba nibwo buhagaza ensi; kandi okwo eky'okwatilira ensi aha rw'omuntu aisirwe tikyakushoboka, shana kwita amwisire. 34Ensi eyo mulituramu mutaligihagaza, enshonga inye Omukama ndiba nintura n'Abaisiraeli omu nsi egyo.”

Currently Selected:

Orubara 35: RHAY01

Highlight

Copy

Compare