Obwijukiro 1

Ebiragiro aha Ibanga lya Horebu

1Ebi nibyo bigambo ebyo Musa yagambiire Isiraeli yona buseli bwa Yorudani omw'irungu. Bakaba bali Araba, nirwo Ruhanga rwa Yorudani, omu maisho ga Sufu omugati y'ekigo kya Parani n'ebigo bya Tofeli, Labani, Hazeroti na Dizahabu. 2Rugendo rw'ebiro 11 kuruga Horebu kugya Kadeshibarinea orabire omuhanda gw'Eibanga lya Seiri. 3Aha kiro kya mbere ky'omwezi gwa ikumi na gumoi omu mwaka gwa 40 barugire Misiri, Musa agambira Abaisiraeli byona nk'okw'Omukama yabahangire k'abagambira, 4kayabaire yamazire kusinga Sihoni omukama w'Abaamori ayaturaga Heshiboni, na Ogi omukama wa Bashani ayaturaga Ashitaloti na Edirei. 5Buseli bwa Yorudani omu nsi ya Moabu Musa abanza kushoborora a Mateka aga nagamba ati, 6“Omukama Ruhanga waitu akatugambira omuli Horebu ati, ‘Mwaikara aha ibanga eli omwanya gungi, ogwo nigumara. 7Mwimukye mugende omu mabanga g'Abaamori n'omu nsi zona ezibataine. Mugobe Araba nirwo Ruhanga wa Yorudani, n'omu mabanga n'omu ruhita, n'omuli Negebu, n'aha mwegego gw'enyanja. Mugye Kanaani na Lebanoni, kulemwa kugoba aha Mwiga guhango ogwa Efurati. 8Leba nabaha ensi egi; mutahemu mugilye. Inye Omukama nkagiraganisa baisheinywe: Aburahamu, Isaka na Yakobo, okwo ndigibaha na baijukuru babo abalibahondera.’ ”

Musa nataho abaramuzi

(Oku 18:13-27)

9“Omu makiro galinya nkabagambira nti, ‘Inye nyenkai tindikushobora kubemera. 10Omukama Ruhanga wanyu abakanyisize, leba kir'eki muli bangi nk'enyanyinyi. 11Omukama, Ruhanga wa baisheinywe, asinge abakanyise emirundi 1,000 kushaga okwo muli, mara abatunge omugisha nk'okwo yabaraganisize! 12Nakushobora ntai ndi nyenkai kuramura endwano zanyu n'akanyururano kanyu? 13Muronde abashaija abagezi, abalikushobokerwa mara abamanyi nk'okwo enganda zanyu zili nyije mbateho babe bakuru banyu.’ 14Mukamporora muti, ‘Ekigambo kyowagamba kirungi ahali ichwe kukikora.’ 15Aho nkakwata abakuru b'enganda, abantu abagezi mara abamanyi, nabataho babe bakuru banyu, abagelezi b'enkumi, abagelezi b'ebikumi, abagelezi b'amakumi gatanu, abagelezi b'eikumi, n'abatwazi, omu nganda zanyu zona. 16Mara omu makiro galinya nkaragira abaramuzi banyu nti, ‘Muhulilize emishango ya barumuna banyu, mara muramure omw'iteka omuntu n'omurumuna anga omugenyi abatwiremu. 17Mutagira kigonzi mw'iramu; muhulilize omujege n'omuhango kumoi. Mutatiina buso bwa muntu, okuba eiramu lya Ruhanga. Omushango ogurabagumira muno mugundetere ndaguhuliliza.’ 18Omu biro ebyo nkabaragira ebintu byona ebyo mulikuragirwa kukora.”

Abanyomozi nibagya Kanaani

(Orub 13:1-33)

19“Tukaimukya Horebu twaraba omw'irungu lyona lilinya elihango elilikutinisa elyo mwaboine, omuhanda ogwolekeire ensi y'amabanga ey'Abaamori nk'okw'Omukama Ruhanga waitu yatuhangiire; twagoba Kadeshibarinea. 20Nkabagambira nti, ‘Mwagoba omu nsi y'amabanga ey'Abaamori ey'Omukama Ruhanga waitu alikutuha. 21Leba, Omukama Ruhanga wa baisheinywe yabaha ensi; mugitware nk'okwo yabagambiire. Mutatiinai anga kuhwahwana.’ 22Aho nywena mukangoba mwagamba muti, ‘Tutweke abantu batwebembere baturambulire ensi, bashube batumanyise omuhanda ogwo turarabamu n'ebigo ebyo turagyamu.’ 23Ekigambo ekyo kikanshemelera, naronda abantu 12 omuli inywe, omuntu omoi kuruga buli ruganda. 24Bakakwata omuhanda batemba omu nsi y'amabanga, bagoba n'omu Ruhanga rwa Eshikali barunyomoza. 25Baletaho ebiraba by'ensi egyo, batwizira nabyo, bashuba batumanyisa bati, ‘Ensi ey'Omukama Ruhanga waitu alikutuha nungi.’ ”

26“Kyonkai ensi timwagitahiremu, mwashengera omuhango gw'Omukama Ruhanga wanyu. 27Mukeboroboitera omu mahema ganyu nimugamba muti, ‘Omukama akatunoba nikyo yatwihiire Misiri kutunaga omu mikono y'Abaamori kutwita. 28Nitugya nkahai? Barumuna baitu batutinisize bati, Abantu bahango mara baraibarai kutushaga. N'ebigo byabo bihango mara bizitiirwe eboma kugoba aha iguru, mara tuboineyo n'Abaanakimu.’ 29Aho nkabagambira nti, ‘Mutahukuka anga kubatina. 30Omukama Ruhanga wanyu wenene abebembera arabarwanilira nk'okwo mwayeboineire muli Misiri. 31N'omw'irungu muboine okwo abemeire okwo omuntu ayemera omwanawe, hona mbali mwarabire mukalemwa mukagoba aha.’ 32N'orwo ekigambo ekyo kyabaire kili kityo timwayesigire Mukama Ruhanga wanyu, 33ayabebembeire omu rugendo kubahigira omwanya mbali muratera amahema ganyu. Akaboleka omuhanda gw'okurabamu, omu muliro ekiro, n'omu kichwi nyemishana.”

Omukama nabonabonyia Isiraeli

(Orub 14:20-45)

34“Omukama akahulira ebigambo byanyu, yanigara, mara yanahira ati, 35‘Thaliho n'omoi omu bantu aba ab'omuzarwa ogubi ogu alibona ensi nungi eyo naragaine kuha baisheinywe, 36shana Kalebu eya Yefune; ogwo aragibona, mara wenene n'abaanabe ndamuha ensi eyo yarabiremu, aha rw'okuba aikaire angiliire obwesigwa!’ 37Nanye Omukama akannigalira nantura inywe, yagamba ati, ‘Naiwe ensi toligitahamu. 38Yoshua eya wa Nuni akwemeleire omu maisho niwe aligitahamu. Omuhe ekihika ahakuba niwe aligisikisa Isiraeli. 39Kandi obukelemeke bwanyu obwo mwagambire muti nibwija kunyagwa, n'abana banyu abatalikumanya kir'eki kirungi na kibi, balitahamu, ndigibaha, baligilya. 40Kyonkai inywe mukwate omuhanda mugende omw'irungu mwolekeire Enyanja Rutuku.’ ”

41“Aho mukamporora muti, ‘Tufakaliire Omukama. Turagenda turwane nk'okw'Omukama Ruhanga waitu aturagiire.’ Aho inywena buli mushaija akekoma ebikwatobye by'endashana, mara yabona okwo kilikwanguha kutemba omu mabanga. 42Omukama akangambira ati, ‘Obagambiire batatemba anga kurwana ahakuba tinyemire nainywe, mutakwija mukasingwa babisha banyu.’ 43Nikwo nabagambiire ntyo nawe timwabyetaireho, mwashenga omuhango gw'Omukama, mwagira eikuru, mwagya omu mabanga. 44Aho Abaamori abaturaga omu mabanga ago, bashohora kubarashanisa, babakinigya nk'enjoki, babatelera Seiri babagobya Horima. 45Mukagaruka mwalilira Omukama; kyonkai tiyabetaireho anga kubahuliliza. 46Kityo mukaikara Kadeshi ebiro bingi.”

Currently Selected:

Obwijukiro 1: RHAY01

Highlight

Copy

Compare