Orubara 30
30
Amateka g'Ebiragano
1Musa akagambira abakuru b'enganda z'Abaisiraeli ati, “Omukama nahanga ati, 2K'omuntu aliraganisa Omukama, anga akagira ekyo yanahira akataho n'omukwato, atalichwa kyo aliba agambiire. 3Anga omwisiki agire ekyo yaraganisa Omukama, ateho n'omukwato akyali omwabo ali mwisiki, 4ishe k'alihulira okwo agizire ekyo yaragana n'okwo ataireho omukwato akamwesiza, aho ebyo aliba aragaine byona, n'omukwato ogwo alishangwa ataireho, aliragirwa kubigobesheleza. 5Kyonkai ishe k'alyanga ebyo aliba anahiire hamoi n'omukwatogwe kiro ekyo yamanya amakuru ago, aho ebyo aliba aragaine n'ebyo aliba akwatilize talibaitongwa, kandi Omukama halimuganyira aha rwa ishe kumwangira. 6Kandi k'alishwerwa omushaija akyatongwa kuhikya ebyo yaragaine anga ebyo yafire ganahira, 7iba kiro ekyo alibimanya akamwesiza, aho omukazi ogwo aliragirwa kuhikya ebiraganobye, nangu n'ebyo yarahiire akataho n'omukwato alibigira. 8Kyonkai iba k'alimwangira kiro ekyo yabimanya, aho aliba amwihireho ebiraganobye, hamoi n'ebyo yafire kurahira nayekwatiliza, kandi Omukama halimuganyira. 9Kyonkai entumbwakazi anga omukazi atambiibwe k'aligira ebyo yaragana, kyona kyona ekyo aliba aragaine akataho n'omukwato, alikigira. 10Kandi k'aligira ekyo yaragana ali omwa iba, anga akagira ekyo yarahira nayekwatiliza, 11iba k'alibimanya akamwesiza, atamwangiire, ebyo aliba aragaine byona aliragirwa kubihikya. N'ebyo aliba arahiire akataho omukwato alibigira. 12Kyonkai kiro ekyo iba alibimanya akabyanga, aho ebyo aliba aragaine omu kanwake anga anahiire akataho n'omukwato, aliba atakyetaga kubihikya, aha rw'okuba iba aliba abimwihireho, mara Omukama halimuganyira. 13Omukazi ogwo k'aligira ekyo yaragana kyona kyona anga akarahira kweshasa, iba aina obushobora bw'okukiikiliza anga kukyanga. 14Kyonkai ka iba aliba namwesiza ebiro byona, aho aliba naikiliza ebiraganobye n'ebyo aliba nanahira nayekwatiliza. Iba aliba nabikiliza aha rw'okubihulira akamwesiza. 15Kyonkai k'aliba yamazire ebiro nabihulira akashuba akabyanga, aho omushango tigulikwata mukaziwe; gulikwata wenene.”
16Ebi nibyo biragiro ebyo Omukama yahangiire Musa, aha mushaija na mukaziwe, n'ahali ishe mwana n'omuhara orwo akyali omwabo ali mwisiki.
Currently Selected:
Orubara 30: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
