Orubara 31
31
Endashana Ntakatifu n'Abamidiani
1Omukama akagambira Musa ati, 2“Oyehoroze Abamidiani noyeholera Abaisiraeli. Kandi ahanyuma iwe noija kufa.” 3Musa agambira abantu ati, “Mugire abo mwayerondamu, mubahe ebikwato by'endashana, batere Abamidiani nibeholera Omukama. 4Buli ruganda omuli Isiraeli mwihyemu abaisherukale 1,000, mubatweke omu ndashana.” 5Kityo omu Baisiraeli enkumi barondamu abaisherukale rukumi rukumi buli ruganda, bona hamoi baisherukale 12,000 abaina ebikwato. 6Musa abatuma omu ndashana, orukumi kuruga buli ruganda, hamoi na Finehasi eya Eleazari omukuhani, niwe yagenzire n'ebikwato by'ahatakatifu n'enzamba z'okuhuruza ab'endashana. 7Barashanisa Abamidiani nk'okwo Omukama yahangiire Musa, baita buli mushaija. 8Omu baisirwe abo bakaitiranamu abakama batanu ba Midiani, abalimu Evi, Rekemu, Zuri, Huri na Reba, kandi na Balamu eya Beori bamwisa embanda. 9Abaisiraeli banyaga abakazi b'Abamidiani n'abana babo abato; n'ente zabo zona, amahyo gabo gona g'entaama n'embuzi, n'ebintu byabo byona babinyaga. 10Kandi ebigo byabo byona mbali baturaga babyokya hamoi n'ensisira zabo bazitaho omuliro. 11Batabaruka n'ebyo banyagire byona, abantu n'ebitunganwa. 12Aho endore, eminyago n'ebintu, baziletera Musa na Eleazari omukuhani n'eihanga lyona ly'Abaisiraeli, mbali babaire basisiire omu mpita za Moabu haihi na Yorudani aholekeraine na Yeriko.
Eihe nilitabaruka
13Musa na Eleazari omukuhani n'abebembezi bona b'eihanga, bashohora kuchwekera abatabazi enjai y'orusisira. 14Musa yanigalira abakuru b'eihe, abagabe b'orukumi rukumi n'ab'ekikumi kikumi ababaire nibatabaruka. 15Yababaza ati, “Abakazi bona mubalekire, timwabaita? 16Nimumanya okwo bafakaize Abaisiraeli orwo Balamu ybahanuliire bakashenga Omukama aha rw'amahano ago bakoleire Peori, eihanga lyona ly'Omukama likaterwa ekibundo! 17Mbwenu aha rw'ekyo mwite buli mwana mwojo na buli mukazi arabyamire n'omushaija. 18Kyonkai abaisiki bona abatakabyamaga na bashaija mubasigeho mwije mubatware. 19Musisire aheru y'ensisira ebiro mushanju. Wena wena araba aisire omuntu anga akwete aha mutumbi gw'omuntu aisirwe, ayehasilire aha kiro kya kashatu n'aha kya mushanju. Mwehasilire inywe n'endore zanyu. 20Muhasilire buli kijwaro na buli kintu ekikozirwe omu ruhu n'omu bwoya bw'embuzi na buli kikwato eky'omuti.”
21Eleazari omukuhani agambira ababaire batabaire ati, “Leba ekiragiro ekyo Omukama ahangiire Musa nagamba ati, 22Ezahabu yonkai, n'efeza n'omulinga n'ekyoma n'etini n'eibati, 23buli kimoi ekitalikushobora kuhya, mukirabye omu muliro nirwo kirayera, narwo mushube mukishaimulire amaizi g'okukihasilira. Kandi ekintu kyona ekilikubasa kuhya, ekyo mukirabye omu maizi ago. 24Aha kiro kya mushanju nimuragirwa kwogya emyendo yanyu, mubone kushemera, ahanyuma mugaruke omu rusisira.”
Nibabegana Eminyago
25Omukama akagambira Musa ati, 26“Iwe na Eleazari omukuhani n'abakuru b'enganda omw'ihanga, mubare eminyago enyagirwe ey'abantu n'ebitunganwa. 27Eminyago egyo mugibeganise omu bichweka bibili: Ekimoi mukihe abaisherukale ababaire batabaire, ekindi mukihe eihanga lyona. 28Ebyo muraha abaisherukale mubaihyeho omushoro gw'Omukama, ekintu kimoi ahali bikumi bitanu. Aha ndore bikumi bitanu mwihyeho endore emoi. Kutyo n'aha nte, endogobe, entaama n'embuzi. 29Mubihye aha nusu y'ebyo mulikubaha, mubihe Eleazari omukuhani, kihongo ky'okuhongera Omukama. 30Kandi aha nusu eyo mulikuha Abaisiraeli, mwihyeho kimoi aha makumi gatanu: Aha bantu, ente, endogobe, entaama n'embuzi, ebitunganwa byona, mubihe Abalevita abalebelera Eihema ly'Omukama.” 31Musa na Eleazari omukuhani bagira okwo Omukama yahangiire Musa.
32Eminyago eyasigaire ahali byona ebyo abaisherukale banyagire: Entaama 675,000; 33ente 72,000; 34endogobe 61,000. 35Kandi abaisiki bona ababaire batakabyamaga na bashaija bakaba bali 32,000. 36Enusu eyo bahaire abaisherukale ababaire batabaire, zikaba zili ntaama 337,500, 37nizo baihireho omushoro gw'Omukama 675. 38Ente zikaba zili 36,000; bazihyaho omushoro gw'Omukama, ente 72, 39endogobe zikaba zili enkumi 30,500; bazihyaho omushoro gw'Omukama, endogobe 61. 40Endore zikaba zili 16,000; bazihyaho omushoro gw'Omukama endore 32. 41Musa akwata omushoro ogwo, nikyo kihongo ky'Omukama, aguha Eleazari omukuhani, nk'okwo Omukama yamuhangiire.
42Aha minyago enusu eyo bahaire Abaisiraeli, eyo Musa yaihire aha minyago ey'ababaire batabaire, 43niyo minyago enusu ey'eihanga lyona, zikaba zili ntaama 337,500; 44ente 36,000; 45endogobe 30,500; 46kandi endore 16,000. 47Aha minyago egyo enusu ey'Abaisiraeli, ahali buli ndore 50, Musa yaihyaho endore emoi, n'ahali buli bitunganwa 50, yaihyaho ekitunganwa kimoi: Eminyago egyo eyo yaronzire yagiha Abalevita ababaire nibalinda Eihema ly'Omukama, nk'okwo Omukama wenene yamuhangiire.
48Aho abakuru b'eihe, ababaire bali bagabe b'orukumi rukumi n'ab'ekikumi kikumi, baija ahali Musa bamugambira bati, 49“Ichwe abairu bawe twabara abaisherukale abo tulikutwara, titwabuzaho n'omoi. 50Mbwenu tuleteire Omukama ekihongo aha byo buli muntu anyagire: Eby'ezahabu, enyelere n'ekekei, empeta z'emihuri, eheleni n'enkwanzi, kweyatilira aha Mukama.” 51Musa na Eleazari omukuhani babatora emilengyo yona ey'ezahabu. 52Ezahabu yona eyo bahongeire Omukama, eyahongirwe abagabe ab'orukumi rukumi n'ab'ekikumi kikumi, zikaba zili shekeli 16,750. 53(Buli mwisherukale hakaba ayenyagiire ebye). 54Musa na Eleazari omukuhani batora ezahabu y'abagabe abo ab'orukumi rukumi n'ab'ekikumi kikumi, bagitwara omw'Ihema ly'Omuterano. Omukama abe naijuka Abaisiraeli nabalinda.
Currently Selected:
Orubara 31: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
