Orubara 17
17
Enkoni ya Aroni
1Omukama akagambira Musa ati, 2“Ogambire Abaisiraeli bakuhe enkoni 12 z'enganda zona, buli mukuru w'oruganda akuhe eye. Buli nkoni y'omukuru w'oruganda ogihandikeho eibaralye, 3Kandi ey'oruganda rwa Levi ogihandikeho eibara lya Aroni. Buli ruganda rugiire enkoni emoi, mara ebe ya mukuru warwo. 4Ahanyuma oziteke omw'Ihema ly'Omuterano omu maisho g'ekiikaro, mbali nteranira naiwe. 5Omuntu owo ndaronda, enkoniye erashebuka, aho Abaisiraeli nyije mbachwe okukujojobera okwo bakujojobera.” 6Musa agambira Abaisiraeli, buli mukuru w'oruganda amuha enkoniye, zona hamoi nkoni 12. 7Musa aziteka omw'Ihema ly'Omuterano omu maisho g'ekiikaro.
8Bukeire Musa kutaha omw'Ihema ly'Omuterano, ashanga enkoni ya Aroni, niyo y'oruganda rwa Levi, eshebukire, eina obututu n'orwakyo, eina n'ebiraba bihisize. 9Akwata enkoni ezo azihya aha kiikaro, azitwalira Abaisiraeli. Buli muntu aihaho enkoni eye, aleba. 10Omukama agambira Musa kugarura enkoni ya Aroni aha kiikaro, abashengi kabata nibaijukiraho, bakalekera kumushenga n'okumujojobera, batalija bakafa. 11Musa akora atyo, nk'okwo Omukama yabaire amuhangiire.
12Abaisiraeli bagambira Musa bati, “Twafa, twahwaho, twahwaho ichwena. 13Kakuraba kuli buli ayagoba aha kiikaro ky'Omukama ni kufa, rwona turafa. Tufe ichwena?”
Currently Selected:
Orubara 17: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
