Orubara 16
16
Okushenga kwa Kora na batahibe
1Kora eya Izihari, Izihari eya Kohati, Kohati eya Levi na Datani na Abiramu batabani ba Eliabu, na Oni eya Peleti, ab'oruganda rwa Rubeni, bashenga, 2baimukira Musa, bema n'Abaisiraeli 250 abali bakuru omw'ihanga, ab'eiranga ababaire batairweho embaga. 3Bema hamoi batabalira Musa na Aroni, babagira bati, “Mwashaga amashenyero! Eihanga lyona litakatifu, buli omoi mutakatifu, mara Omukama asingiire omw'ihanga eli. Mbwenu inywe kubaki nimweteka eiguru, nimugaya abantu?” 4Musa kuhulira atyo, ajumara ahansi. 5Agambira Kora n'ekisimbakye kyona ati, “Bukeire bwankya Omukama arazora owa wenene, azore omutakatifu, mara ogwo niwe arajubura kugoba aha alutare. 6Iwe Kora, n'abawe bona mukore muti: Mukwate ebyotezo; 7mubitemu amakara g'omuliro n'obunuma mubitware alutare. Nyenkya omuntu owo Omukama araihyaho niwe araba ali mutakatifu. Inywe Balevita inywe, mwashaga amashenyero!” 8Musa ashuba agambira Kora ati, “Hulira inywe Balevita: 9Nimugira muti kigambo kike ahali inywe kubona Ruhanga yabahwire omw'ihanga lya Isiraeli kubehikya? Akabashorora kamumukolera omu kiikarokye, kukolera n'embagaye; 10akabehikya inywe n'Abalevita abanyaruganda banyu. Mbwenu nimwenda n'obukuhani kabuba bwanyu? 11Aha rw'ekyo iwe n'ekisimba kyawe kyona mwageleka Omukama. Aroni n'ohai owo mulikunjojobera?”
12Musa atuma kweta Datani na Abiramu batabani ba Eliabu; kyonkai bonene bahorora bati, “Titulikwijayo! 13Kigambo kike ahali iwe kubona okatwihya omu nsi elikusheshekana amatai n'obwoki, kutwitira omw'irungu, noshuba noyenda kwehindura mukama kututwara? 14Kandi buzima tiwatugobya mu nsi elikusheshekana matai na bwoki, anga kutuha ndimiro na mizabibu. Abantu aba nogonza kubabunda amaisho? Titulikwijayo!”
15Aho Musa akwatwa ekiniga kingi muno, agambira Omukama ati, “Ekihongo kyabo okyange. Taliho owo ndayakire ndogobe, anga kugira owo nakora kubi.” 16Ashuba agambira Kora ati, “Nyenkya iwe n'ekisimba kyawe kyona na Aroni mwije aha kiikaro ky'Omukama. 17Buli omoi okwo muli akwate ekyotezo ekye akitemu obunuma akilete alutare. Ebyotezo byona hamoi 250. Naiwe kwakwo; na Aroni abulimu; buli omoi n'ekyotezokye.” 18Kityo buli muntu akwata ekyotezokye, akitamu amakara g'omuliro n'obunuma, bemelera aha mulyango gw'Eihema ly'Omuterano hamoi na Musa na Aroni. 19Kora ahuruza Abaisiraeli bona kugeleka Musa na Aroni, abaleta aha mulyango gw'Eihema ly'Omuterano. Omukama omu kitinwakye abahabukira bona okwo bali hamoi.
20Omukama agambira Musa na Aroni ati, 21“Abantu aba mubarugemu nyije mbaite omw'ipokya n'omw'iburura.” 22Kyonkai Musa na Aroni bajumara ahansi batongana bati, “Waitu Ruhanga, Ruhanga entabuko y'oburora bw'abantu bona, omuntu afakare omoi, onigaliire eihanga lyona?” 23Omukama agambira Musa ati, 24“Ogambire abantu baruge omu mahema ga Kora, Datani na Abiramu.” 25Aho Musa aimuka agya owa Datani na Abiramu; abebembezi ba Isiraeli bamuhondeire. 26Agambira embaga ati, “Nimbashaba muruge omu mahema g'abantu babi aba, mutakwata aha kintu kyona kyona ekili kyabo, mutaija mukatwalishanibwa nabo mukazira amafu gabo.” 27Kityo abantu baruga omu mahema ga Kora, Datani na Abiramu. Datani na Abiramu baruga omu mahema gabo bemelera aha milyango, bonene na bakazi babo n'abana babo. 28Musa agamba ati, “Aha niho muramanyira okwo Omukama niwe yantumire kukora emilimo egi yona, tikugira oti nkora okwo natekeleza. 29Abantu aba kabarafa emifere eya buli kiro, Ruhanga atabahaire kibonabonyio, aho mpaho araba atantumire. 30Kyonkai Omukama aije akore ekitakabonekaga, ensi eyashamuke ebamire, n'ebyabo byona ebimire, bagye Sheoli nibaleba, aho muramanya okwo bakunukurwize Omukama.”
31Namara ati kugamba atyo, mbali babaire bali ensi etemuka, 32eyashamuka ebamira bona n'emitungo yabo yona, n'ababaire bali ba Kora n'ebyabo byona. 33Kityo bona n'ebyabo byona bagya Sheoli nibaleba. Ensi eshuba eyebumba, baba nikwo bahwaho batyo. 34Abaisiraeli bona ababaire bali aho kabahuliire okwo aba baboroga, barugaho bairukire nibagira bati, “Leka ensi etatumira!” 35Omukama atweka omuliro, gwokya abantu 250 ababaire niboteza obunuma.
Ebyotezo
36Ahanyuma Omukama agambira Musa ati, 37“Ogambire Eleazari mutabani wa Aroni, omukuhani, aihye ebyotezo omu mitumbi elikumengeta omuliro, kandi omuliro agunaganage harai, 38ahakuba ebyotezo ebyo bitakatifu; bakama babyo bafakaire bayeisa. Biheshwemu amabati g'okushweka alutare, enshonga baba babihongeire Omukama. Abaisiraeli balijukiraho.” 39Kityo Eleazari omukuhani, akwata ebyotezo by'omulinga ebyo abayokiibwe babaire bahongire, abiha abahesi babiheshamu eibati ly'okushweka alutare, 40Abaisiraeli kuta nibaijukiraho, omuntu atali mwijukuru wa Aroni, atali mukuhani, ataliziza kugoba alutare kwoteza Omukama obunuma, atalija hakaba nka Kora na batahibe. Nikwo Omukama yagambiire Eleazari omu kanwa ka Musa.
Aroni narokora embaga
41Kyonkai bukeire embaga yona y'Abaisiraeli bajojobera Musa na Aroni bati, “Mwaita abantu b'Omukama.” 42Embaga ezinda Musa na Aroni; kyonkai bonene bahinduka baleba Eihema ly'Omuterano. Eihema lishwekwa ekichwi, Omukama w'ekitinwa ahabuka. 43Musa na Aroni bagoba aha Ihema elyo, 44Omukama agambira Musa ati, 45“Ruga omu mbaga egi, nyije ngisilikye omw'ipokya n'omw'iburura.” Aho aba babili bajumara ahansi. 46Musa agira Aroni ati, “Kwata ekyotezo kyawe, okitekemu amakara g'omuliro kuruga alutare, okitemu n'obunuma, oyanguhe okitwalire embaga, obatilire. Kuba Omukama yatamwa muno n'ekibundo kyazokire.” 47Kityo Aroni akwata ekyotezo nk'okwo Musa yagamba, airuka agiire omu mbaga. Ekibundo kikaba kyabandize kuzoka omu bantu. Aho ekyotezo ky'omuliro akitamu obunuma, ayatilira embaga. 48Abemeleramu: Okwo aba bafire, aba nibarora, aho ekibundo kilekera. 49Abaisirwe ekibundo bakagoba abantu 14,700; abagwire omu rushengo rwa Kora batabulimu. 50Aho Aroni agaruka ahali Musa aha mulyango gw'Eihema ly'Omuterano, orwo ekibundo kyahoire.
Currently Selected:
Orubara 16: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
