Orubara 18

Emyoga y'Abakuhani n'Abalevita

1Omukama akagambira Aroni ati, “Iwe, na batabani bawe, n'Abalevita abanyaruganda bawe, kahalibaho ebyashoba omw'Ihema ly'Omuterano, omushango gulikwata inywe. Kandi ebikwete aha ikora ly'obukuhani, omushango gulikwata iwe na batabani bawe. 2Otega noyema n'Abalevita, abanyaruganda bawe, bakuhwere iwe na batabani bawe omw'ikora lyanyu ly'obukuhani omw'Ihema ly'Omuterano. 3Bakuhwere, bakore n'emilimo yona mw'Ihema, kyonkai bataligoba aha bikwato by'ahatakatifu anga kugoba alutare, na iwe na bonene mutaija mukafa. 4Bakwambe, bakuhwere omw'ikora lyona ly'omw'Ihema. Taliho omuntu ondijo kukugoba. 5Ebikakorwa ahatakatifu na alutare, egyo ebe myoga yawe; k'Omukama atalija akashuba akanigalira Abaisiraeli. 6Abanyaruganda bawe Abalevita nabahura omu Baisiraeli. Ezo ndonkwa zawe, ndonkwa z'Omukama, z'okukora omw'Ihema ly'Omuterano. 7Iwe na batabani bawe ab'olikukora nabo mukore emyoga yanyu y'obukuhani aha alutare n'omu rutimbe ahatakatifu muno. Inye okubaha obukuhani mumanye okwo muli ndonkwa. Kaishe muntu ondijo aligoba ahatakatifu bamwite.”

Omugabo gw'Abakuhani

8Aho Omukama agambira Aroni ati, “Inye ebihongo ebyo Abaisiraeli balikumpongera nimbibakwasa. Mugabo gwanyu na baijukuru banyu, nimbibaha ebiro byona. 9Ebihongo ebitakatifu muno ebilikusigaraho bitatambirwe kitambo kya kwokibwa, ebyo bibe byanyu. Buli kihongo ekyo balikuleta, buli kihongo ky'ensano, buli kihongo ky'enyatano y'amafu, buli kihongo ky'enyatano y'entambara, ebyo balikumpongera, birabaga bitakatifu muno aha bwanyu na baijukuru banyu. 10Mute nimubilira ahatakatifu muno, kyonkai alikwetwa mushaija abe niwe abilyaho. Bitakatifu muno aha bwanyu. 11Kandi n'ebi nabyo byanyu: Ebyo balikugemura n'ebihongo eby'okuchunkeza ebilikugirwa Abaisiraeli nimbibaha n'abana banyu. Ogwo mugabo gwanyu ebiro byona. Buli omoi wena omu ka yawe atahagaire, abilye. 12Amajuta agarungi muno, edivai enungi muno, n'engano kaliza n'ebiraba bya mbere ebyo balikuganuza Omukama, byona ebyo nimbibaha. 13Ebiraba bya mbere byona ebyo Abaisiraeli barayezaga omu nsi yabo bakabiganuza Omukama, birabaga byanyu. Buli omoi omu maka ganyu alikushangwa atahagaire yakubilya. 14Buli kihongano omuli Isiraeli kirabaga kyanyu. 15Kaishe muzigaijo, gwaba gwa muntu anga gwa kitunganwa, orwo baguhongera Omukama niguba gwanyu. Kyonkai omuzigaijo ogw'omuntu n'ogw'ekitunganwa ekihagaire egyo nimugichungura. 16Mugichungure emazire omwezi gumoi ezairwe. Muteho eshekeli z'efeza, kuhonderana n'eshekeli y'ahatakatifu, nizo gera 20, mube nizo mubachunguza. 17Kyonkai omuzigaijo gw'ente, anga ogw'entaama, anga ogw'embuzi, emizigaijo egyo mitakatifu. Mutagichungura. Obwamba bwayo mubushaimulire alutare. Kandi ebishaju byayo mubyokye: Ekyo kibe kitambo ky'akataachu ak'okushemelera Omukama. 18Enyama yayo, tugambe ekidari eky'okuchunkeza, n'ekirumbu eky'orubaju rwa bulyo, egyo yanyu. 19Ebihongo bitakatifu byona ebyo Abaisiraeli balikumpongera, nimbibaha inywe n'abana banyu. Mugabo gwanyu ebiro byona. Egi ndagano eyo ndikukora na inywe na baijukuru banyu. Eirai lyona telichweka.”

20Omukama ashuba agambira Aroni ati, “Omu nsi ya Isiraeli inywe mutaligiramu mugabo. Omu Baisiraeli mutaligiramu mushondo. Omuli Isiraeli omugabo gwanyu n'inye; n'inye mushondo gwanyu.”

Omugabo gw'Abalevita

21“Abalevita aha rw'eikora lyabo omw'Ihema ly'Omuterano, omugabo gwabo nabaha ekichweka kya ikumi ekya buli muntu omuli Isiraeli. 22Kandi kwema mbwenu Abaisiraeli bataligoba aha Ihema lya Muterano bakeletera mushango bakafa. 23Abalevita babe nibo bakora eikora ly'Eihema ly'Omuterano; nibo baragwerwaga omushango. Amakiro ganyu gona eki kiliba kiragiro. Omu Baisiraeli Abalevita tibaligira mugabo. 24Omugabo ogwo ndikuha Abalevita kichweka kya ikumi ekyo Abaisiraeli balikundetera. Nikyo ndikugambira okwo bataligira mugabo omu Baisiraeli.”

Ekichweka kya ikumi eky'Abalevita

25Omukama akagambira Musa ati, 26“Kandi ogambire Abalevita oti, Omugabo gwanyu gw'ekichweka kya ikumi ogwo muratoraga omu Baisiraeli na inywe honene aho mwihyeho, muhongere Omukama ekihongo. 27Orwo muligira ekihongo ekyo mulishusha omulimi ahonga engano n'edivai aha magesha. 28Kityo na inywe kwakwo muhongere Omukama aha kichweka kya ikumi kyanyu ekyo murabonaga omu Baisiraeli. Mube niho mwihya ekihongo ky'okuhongera Omukama; mukihe Aroni omukuhani. 29Aha byo balibaha byona, mwihyeho ekiragirwe kuhongerwa Omukama mukimuhongere. Mukihye aha bilikukira oburungi, mara kibe kili kitakatifu muno.”

30“Aha rw'ekyo obagambire oti, Orwo muliba mwahongire ebilikukira oburungi ebisigaire biliba bili byanyu inywe Abalevita nk'okwo omulimi amara kugira ekihongokye akabiika ebyasigaraho. 31Ebyo mulikubiika mwakubiliira hona hona hamoi n'emitungo yanyu, kuba niyo mperwa yanyu aha rw'eikora lyanyu ly'omw'Ihema ly'Omuterano. 32Timulibilya mukakwatwa ntambara, ekiliho mushangwe ahali ebyo mwaihireho ekilikukira oburungi mwakihongire. Kandi ebihongo bitakatifu by'Abaisiraeli mutalibihagaza mukafa.”

Currently Selected:

Orubara 18: RHAY01

Highlight

Copy

Compare