Orubara 15

Ebitambo n'Amateka gabyo

1Omukama akagambira Musa ati, 2“Ogambire Abaisiraeli oti, orwo muligoba omu nsi eyo ndikubaha kuturamu, 3mukampongera ekitambo ky'okwokibwa, kyaba kitambo kya nte anga kitambo kya ntaama, ekyaragainwe anga eky'obweyendezi anga ebitambo eby'aha biro bikuru byanyu ebilikuragirwa eby'okundugiramu akatachu, 4ogwo alikugira ekihongo andetere ensano nungi esaine ekichweka kya ikumi kya efa, ekitabiraine n'erobo hini y'amajuta. 5Ateho n'edivai y'ekihongo ky'okunywa, erobo hini. Ebyo bije aha kihongo ky'okwokibwa ekya buli mwana gw'entaama. 6Anga orwo omuntu yagira ekihongo ky'empaya y'entaama, muteho ebichweka bibili omu ikumi bya efa y'ekihongo ky'ensano nungi etabiraine n'ekichweka kya kashatu ky'ehini y'amajuta. 7Ekihongo ky'okunywa mugire ekichweka kya kashatu ky'ehini y'edivai. Ebihongo ebyo by'okundugiramu akatachu. 8Orwo mwaleta enumi y'ekihongo ky'okwokibwa, kuhikya ekiragano, anga orwo mwandetera ebihongo by'emilembe, 9aho enumi ey'omuntu yahonga agiteho ekichweka ky'ensano nungi ekisaine ebichweka bishatu omu ikumi bya efa, ekitabiraine n'enusu hini y'amajuta, 10hamoi n'ekihongo ky'okunywa enusu hini y'edivai. Akatachu k'ekitambo ekyab'eki nikanshemelera.”

11“Mubitwazega mutyo ahali buli numi anga aha mpaya y'entaama, anga ahali buli kapaya k'entaama anga ak'embuzi. 12Okwo obungi bw'ebitunganwa ebilikuhongwa buli, n'ebihongo ebilikugirwa ahali buli kitunganwa bibe nikwo bigana. 13Buli Mwisiraeli omuzarwa naragirwa kugira atyo orwo yaleta ekihongo ky'okwokibwa, eky'okundugiramu akatachu. 14Kandi k'omunyamahanga aliba abafurukiiremu, anga omuntu ondijo abatuliiremu kimoi, k'alyenda kumpongera ekitambo ky'okwokibwa, eky'okundugiramu akatachu, nawe atwaze okwo mulikukora. 15Obukiro bwona obulija, inywe hamoi n'abanyamahanga ababafurukiiremu mukwate ekiragiro kimoi. Inywe n'abanyamahanga muli kumoi ahali inye. 16Eiteka n'omugenzo ebyo mulikuhondera, bibe nibyo bihonderwa omunyamahanga abafurukiiremu.”

17Omukama agambira Musa ati, 18“Ogambire Abaisiraeli oti, Orwo muligoba omu nsi eyo ndikubatwaramu, 19mukalya ebyakulya byamwo, mumpongere ekihongo. 20Orwo mulyeza engano mukagileta, mukagisa, emikate y'okuganuza eyo mulichumba, omukate gwa mbere mugumpongere. 21Amakiro ganyu gona orwo murachumbaga emikate y'okuganuza, ogwa mbere muragumpongeraga.”

22“Kyonkai kamulifakara mukaburwa kwekomya emihango egi yona eyo nagambire Musa, 23emihango yona eyo namuhangiire kwema kiro ekyo nagimuhaire, n'okugendelera omu makiro ganyu, 24k'eihanga liliba litalize litamanyire, aho lyona ligire enumi y'ekigeto etambwe ekitambo ky'okwokibwa, mara akatachu kayo kalinshemelera. Enumi egyo egibweho ekihongo ky'ensano n'ekihongo ky'okunywa, nk'okwo omugenzo gulikugenda; hamoi n'empaya y'embuzi ey'ekihongo ky'enyatano y'amafu. 25Aho omukuhani ayatilire eihanga lyona lya Isiraeli, mara baligarulirwa. Aha rw'okuba nibashangwa bafakaire, mbwenu orwo bahongera Omukama ekihongo ky'okwokibwa, bakataho n'ekihongo ky'enyatano y'amafu aha rw'amafu ago bafakaire nikwo kugarulirwa kwabo. 26Eihanga lya Isiraeli liligarulirwa lyona, n'omufuruki omuli Isiraeli kutyo, aha rw'okuba abantu bona omw'ihanga nibaba bafakaire.”

27“Omuntu k'alifakara atamanyire, aligira ekihongo ky'enyatano y'obufu: Omuagazi gw'emburabuzi ogw'omwaka gumoi. 28Omukuhani ayatilire Omukama aha rw'omuntu akozire obufu; mara aligarulirwa. 29Inywena mulihondera eiteka limoi aha muntu kufakara atamanyire; yaba Mwisiraeli omuzarwa anga afurukire omuli Isiraeli. 30Kyonkai omuntu alifakaza ekyekundo, abe muzarwa anga mufuruki, ogwo aliba akunukurwize Omukama, mara bamuchwe. 31Ahakuba aliba ayangire kukwata ekigambo ky'Omukama, achwire omuhangogwe; ogwo bamuchwe azire entambaraye.”

Omuntu ayashenyire enkwi aha kiro kya Sabato

32Orwo Abaisiraeli babaire bali omw'irungu bakashanga omuntu nashenya enkwi aha kiro kya Sabato. 33Abamushangire nashenya, bamuleta ahali Musa na Aroni n'eihanga lyona. 34Bamufunga kuhika orwo bararamura bamugire batai. 35Omukama agambira Musa ati, “Omuntu ogwo bamwite. Bamushohoze omu rusisira, embaga yona emuteze amabare.” 36Bamushohoza omu rusisira, Abaisiraeli bona bamuteza amabare, bamwita, nk'okwo Omukama yabaire ahangiire Musa.

Ebituuti aha bebo

37Omukama akagambira Musa ati, 38“Oragire Abaisiraeli, omu makiro gabo gona aha bebo zabo omu pembe bate nibashoneraho ebituuti, babikwase orufufu rwa kibururu. 39Buli kuleba aha kituti ekyo mwijukireho emihango yona y'Omukama n'okugigobesheleza; aho timunsigeho kukora ebyo mulikwenda n'okwegomba. 40Kityo mwijuke emihango yange yona, mugigobesheleze, mara mube batakatifu ahali Ruhanga wanyu. 41N'inye Omukama Ruhanga wanyu ayabaihire omu nsi ya Misiri kamba Ruhanga wanyu.”

Currently Selected:

Orubara 15: RHAY01

Highlight

Copy

Compare