Orubara 14

Embaga neyeboroboita

1Kir'ekyo eihanga lyona likarara nilichura niliboroga. 2Buli Mwisiraeli ajojobera Musa na Aroni. Eihanga lyona libagambira liti, “Nitube twagwire Misiri, anga nitube twagwire omw'irungu! 3Kubaki Omukama natutwara omu nsi egyo katugya kugwa aha mbanda? Abakazi baitu n'abana baitu nibaija kutwarwa endore. Ti hakili katwakugarukire Misiri?”

4Bagambirangana bati, “Tuteho omugabe waitu, tugaruke Misiri.” 5Aho omu maisho g'embaga yona y'Abaisiraeli, Musa na Aroni bajumara ahansi. 6Yoshua eya Nuni na Kalebu eya Yefune, ababaire bagenzire n'abandi kurambura ensi, batemura emyendo yabo, 7bagambira Abaisiraeli bona bati, “Ensi eyo turambwire nsi nungi muno. 8Omukama k'aratusingira naija kugitugobyamu akagituha; nsi elikusheshekana amata n'obwoki. 9Ekikuru muleke kushengera Omukama. Kandi abantu bamwo mutabatina; nitwija kubajunga kaizi. Ruhanga waitu yasingire baruhanga babo ababalinda. Kandi Ruhanga waitu wenene ogwo natwemera.” 10Kyonkai embaga yona erahira kubateza amabare.

Musa nashabira eihanga

Aho Omukama ahabukira Abaisiraeli bona omu kitinwa aha Ihema ly'Omuterano. 11Abaza Musa ati, “Abantu aba balibaerahai n'okungaya? Isi baliberahai n'okutanyesiga, n'orwo nabakoleire ebitangazo ebyo byona? 12Ndabateza endwara mara mbaite. Kyonkai iwe ndakwihyamu eihanga elilikubakira obungi n'okubashagya amani.”

13Nawe Musa agambira Omukama ati, “K'orakora otyo Abamisiri nibaija kukihulira. Manya abantu aba okabaihya Misiri n'amani gawe. 14Mbwenu Abamisiri nibaija kubigambira abalikutura omu nsi egyo. Waitu Mukama barahuliire okwo otura n'abantu bawe; okwo waitu Mukama abantu bawe abo bakubona bubona, n'okwo otweka ekichwi kikabebembera: Bwamushana bahaburwa enyomyo y'ekichwi, kandi omu kiro bahaburwa enyomyo y'omuliro. 15Iwe k'orabaita okabamaraho bona, aho amahanga agarakuhulize eiranga garagira gati, 16‘Omukama aitiire abantube omw'irungu aha rw'enshonga alemirwe kubagobya omu nsi eyo yabaraganisize.’ 17Mbwenu ninkutagiliza, singa oyolekye amani gawe okore okwo waragaine orwo wagambire oti, 18‘Omukama tanigara bwangu. Agira ekisha kingi muno, agarulira amafu n'entambara. Kyonkai alibonabonyia abana nabatura amafu ga baishebo kuturuka aha muzarwa gwa kashatu n'ogwa kanai.’ 19Ninkutagiliza, osinge ogarulire abantu aba amafu gabo, nk'okwo ekisha kyawe kiba kingi. Obaganyire nk'okwo whakabaganyiire kwema obaihire Misiri kugoba mambwenu.”

20Aho Omukama ahorora ati, “Nabagarulira okwo washaba. 21Nawe n'inyerahira kwo, inye Omukama w'ekitinwa omu nsi zona, 22abaraba baramboine okwo ngira ekitinwa, ababoine ebitangazo ebyo nakozire Misiri n'omw'irungu, bakashuba bagobya emirundi egi ikumi nibampahuza, bakanga kuhikya ebyo ndikugamba, 23taliho n'omoi alibona nsi eyo narahiire kuha baishebo. Kandi abangahire bona nabo taliho aligibona. 24Kyonkai omwiru wange Kalebu orwo aina omutima ogulikweshusha, mara mwesigwa muno ahali inye, ogwo ensi eyo yagobiremu ndigimutahyamu, kandi baijukurube baligilya. 25Mbwenu orwo Abaamaleki n'Abakanaani balikutura omu mpanga, nyenkya muhinduke mugye omw'irungu, mutwarwe omuhanda ogulikugya aha Nyanja Rutuku.”

Omukama naita abantu aha rw'okweboroboita

26Omukama abaza Musa na Aroni ati, 27“Abantu babi aba baliberahai n'okunjojobera? Abaisiraeli okunjojobera kwabo nakuhuliire. 28Mubagambire okwo ndikwerahira! Ebyo bagambire mbahuliire, nanye nikwo ndabagira. 29Nibaija kufa, emitumbi yabo ekarambira omw'irungu. Abakabazirwe bona kubandiza aha b'emyaka 20 n'okutemba, abanjojobeire, 30taliho n'omoi aligoba omu nsi eyo naragaine kubaha kuturamu; shana Kalebu eya Yefune na Yoshua eya Nuni nibo baligobamu. 31Kyonkai abana banyu abo mwagambire okwo balitwarwa endore, nabo ndibagobyamu, babone ensi eyo bagahire. 32Kandi bonene baragwa omw'irungu emitumbi yabo erambiire omwo. 33Abana babo balimara emyaka 40 omw'irungu nibaliisa ebitunganwa, bazire amafu gabo, kulemwa kuhika orwo ow'enzindo omuli bonene aligwa omw'irungu. 34Ebiro 40 ebyo bamazire nibarambura ensi, ekiro kimoi guliba mwaka. Mulishasha muzire amafu ganyu emyaka 40 yona, mumanye okwo ntashemeleirwe. 35Alikugamba n'inye Omukama. Eihanga libi eli elyemire hamoi kunshenga, ndibakora ntyo. Balihweraho kimoi omw'irungu eli, baligwemu.”

36Abantu abo Musa yatumire kurambura ensi, kabagarukire babeiya embaga, baletera eihanga lyona kujojobera Omukama. 37Aho Omukama yabateza ekibundo, bafa. 38Kyonkai Yoshua eya Nuni na Kalebu eya Yefune nibo bahungireho ahali balinya ababaire bagiire kurambura Kanaani.

Nibalenga kubunda ensi elya mbere

(Obw 1:41-46)

39Musa agambira Abaisiraeli bona ebigambo ebyo; embaga echura muno. 40Baimukya bwankya karai nibagamba bati, “Leba tuli aha. Tugembe mbali Omukama yatushubiize. Nitwikiliza okwo tufakaire.” Aho batemba omu mabanga eiguru kurashanisa ensi egyo. 41Nawe Musa agamba ati, “Kubaki mbwenu nimuchwa omuhango gw'Omukama? Ebyo tibishoboke. 42Mutagyayo ababisha banyu bakabaita; aha rw'okuba Omukama tabemiremu. 43Nimwija kugwa omu Baamaleki n'omu Bakanaani bakabaisa embanda, enshonga mulekeire kuba besigwa aha Mukama. Omukama talikwija kubemamu.” 44Kyonkai bonene bazigilira kutemba omu mabanga eiguru, n'orwo Musa yasigaire omu rusisira hamoi n'Esanduku ly'Omukama ly'Endagano. 45Aho Abaamaleki n'Abakanaani abaturaga omu mabanga ago basongoka, babatera, mara bababinga babagobya Horima.

Currently Selected:

Orubara 14: RHAY01

Highlight

Copy

Compare