Orubara 13
13
Abarambuzi
(Obw 1:19-33)
1Omukama agambira Musa ati, 2“Otume ab'okurambura ensi ya Kanaani eyo ndikuha Abaisiraeli. Buli ruganda otume araba ali mukuru warwo.” 3Kityo Musa akora okwo Omukama yamuhangira. Ayema omw'Irungu lya Parani, atuma abakuru b'enganda bona omuli Isiraeli. 4Aga nigo mabara gabo: Omu ruganda rwa Rubeni hakarugwamu Shamua eya Zakuri. 5Omu ruganda rwa Simeoni hakarugwamu Shefati eya Hori. 6Omu ruganda rwa Yuda hakarugwamu Kalebu eya Yefune. 7Omu ruganda rwa Isakari hakarugwamu Igali eya Yozefu. 8Omu ruganda rwa Efuraimu hakarugwamu Hoshea eya Nuni. 9Omu ruganda rwa Benjamini hakarugwamu Paluti eya Rafu. 10Omu ruganda rwa Zabuloni hakarugwamu Gadieli eya Sodi. 11Omu ruganda rwa Manase (nirwo rwa Yozefu) hakarugwamu Gadi eya Susi. 12Omu ruganda rwa Dani hakarugwamu Amieli eya Gemali. 13Omu ruganda rwa Asheri hakarugwamu Seturi eya Mikaili. 14Omu ruganda rwa Nafutali hakarugwamu Nabi eya Wofusi. 15Omu ruganda rwa Gadi hakarugwamu Geweli eya Maki. 16Aga nigo mabara g'abantu abo Musa yatumire kurambura ensi. (Hoshea eya Nuni, Musa akamuhindura eibara yamweta Yoshua).
17Musa abatuma kugya kurambura Kanaani, abaragira ati, “Mutahire Negebu, mwinugukire omu nsi y'amabanga, 18mubone emishusire y'ensi, mumanye abantu abalikutura omwo nka baina amani anga niboroba, nka bali bangi anga bali bake. 19Mulebe n'ensi eyo balikuturamu nk'eli nungi anga mbi, n'ebigo ebyo balikuturamu nka bina eboma anga chei. 20Mumanyege nk'ensi neleta anga eina orwonyu, nk'einamu ebibira anga teinabyo. Mugume, mara mwije n'ebiraba byayo.” Kikaba kili kirumo orwo ezabibu zabaire nizibanza kuhisa.
21Kityo bagenda barambura ensi ya Kanaani, babandiza aha Irungu lya Sini bagoba Rehobu, mbali ekigo kya Hamati kilikubandiza. 22Bataha Negebu, baturuka Heburoni; bashangamu Ahimani, Sheshai na Talimai, baijukuru ba Anaki (Heburoni ekebembera Zoani eya Misiri emyaka mushanju omu kwombekwa). 23Bagoba omu Ruhanga rwa Eshikoli, nimwo bashazire orugoobe rw'ezabibu, barutwara babili babili aha muti. Bakatwara n'amakomamanga n'etini. 24Ensi elinya bakagyeta Ruhanga rwa Eshikoli, aha rw'enshonga y'orugoobe rw'ezabibu orwo Abaisiraeli bashaziremu.
25Ababaire bagiire kurambura ensi bakagarukira ekiro kya 40. 26Bagoba Musa na Aroni n'eihanga lyona lya Isiraeli omw'Irungu lya Parani, omuli Kadeshi. Babamanyisa amakuru, bagamanyisa n'eihanga lyona; baboleka n'ebiraba by'ensi egyo. 27Bagambira Musa bati, “Ensi eyo watutumiremu tukagobamu; nesheshekana amatai n'obwoki, ebi nibyo biraba byayo. 28Kandi abantu abalikutura omu nsi egyo baina amani. Ebigo bihango muno mara bina eboma. Kandi tuboinemu na baijukuru ba Anaki. 29Ensi ya Negebu neturwamu Abaamaleki. Ensi ey'amabanga neturwamu Abahiti, Abayebusi n'Abaamori. Abakanaani abo batwire aha rubaju rw'enyanja na bwatana Yorudani.”
30Nawe Kalebu achuleza abantu ababaire bazingoire Musa nagamba ati, “Tutalinda, tugende tukwate ensi egyo tugituremu, mara nitushobora kugisinga.” 31Aho abo yabaire agenzire nabo bagira bati, “Chei, titulikushobora kusinga bantu bamwo; nibatukiza amani.” 32Baranza amakuru gabi omu Baisiraeli aha nsi eyo babaire bagiire kurambura. Bagamba bati, “Ensi eyo turambwire erambaza abagituramu, n'abantu abo tuboinemu bishoka. 33Tuboinemu Abanefili. (Baijukuru ba Anaki batabuka omu Banefili). Ahali bonene tweboine tuli bake nitushusha ensenene, nabo nikwo batuboine.”
Currently Selected:
Orubara 13: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
