Yoshua 13

Ensi ekyaliho kukwatwa

1Yoshua akura agurusha. Aho Omukama amugambira ati, “Wakura wagurusha. Nawe hakyaliho ensi mpango muno esigaireho etakaliirwe. 2Ensi egyo butware bw'abakama b'Abafilisiti, n'ez'Abageshuri, 3kwema Shihori oburugaizoba bwa Misiri, n'ey'orubaju rwa bikara aha rubibi rwa Ekironi elikwetwa y'Abakanaani. Haliho n'abatwazi batanu b'Abafilisiti aba Gaza, Ashidodi, Ashikeloni, Gati na Ekironi, n'aba Avi, 4orubaju rwa kasi, ensi yona y'Abakanaani na Meara ey'Abasidoni; kugoba Afeka n'orubibi rw'Abaamori. 5N'ensi y'Abagebali na Lebanoni yona kwolekera oburugaizoba kwema Baaligadi omu kibazi ky'Eibanga lya Herimoni kugoba aha butahiro bwa Hamati. 6Abanyansi b'omu mabanga kwema Lebanoni kugoba Misirefotimaimu, Abasidoni bona. Inye nyenene ndababinga aha rw'Abaisiraeli. Oyatire Isiraeli bonkai ensi egi bagilye obusika nk'okwo nakuragiire. 7Mbwenu aha begana ensi egi ebe busika bw'enganda mwenda, n'enusu y'oruganda rwa Manase.”

Okwatwa kw'ensi oburugaizoba bwa Yorudani

8Hamoi n'enusu y'oruganda rwa Manase, Abarubeni n'Abagadi bakalya obusika bwabo obwo Musa omwiru w'Omukama yabahaire buseli bwa Yorudani oburugaizoba: 9Kwema Aroeri aha rukunakune rw'Oruhanga rwa Arinoni, n'ekigo ekili omu ruhanga orwo, n'ensi yona y'omuteleka eya Medeba kugoba Diboni; 10n'ebigo byona bya Sihoni omukama w'Abaamori, ayatwaliraga Heshiboni, kugoba omu rubibi rw'Abaamori; 11na Gileadi n'obutware bw'Abageshuri n'Abaakati, n'Eibanga lyona lya Herimoni na Bashani yona kugoba Saleka; 12obukama bwona bwa Ogi omukama wa Bashani, ayatwaliraga Ashitaloti na Edirei ogwo wenkai n'iwe yasigaire omu nsisira za Refaimu; Musa hakabatera yababinga. 13Kyonkai Abaisiraeli tibabingire Bageshuri anga Bamaakati. Omugeshuri n'Omumaakati baturaga n'Abaisiraeli na mwaha.

14Oruganda rw'Abalevita rwonkai nirwo Musa atahaire busika. Obusika bwabo bihongo by'okwokibwa eby'Omukama Ruhanga wa Isiraeli nk'okwo yagambire Musa.

Ensi eyo Rubeni yagabiirwe

15Ab'oruganda rwa Rubeni Musa hakabaha obusika nk'okwo amahiga gabo gali. 16Kityo ensi yabo ekaba neyema Aroeri aha rukunakune rw'Oruhanga rwa Arinoni, n'ekigo ky'omu ruhanga, n'ensi yona ya Medeba ey'omuteleka; 17na Heshiboni n'ebigo byamwo byona eby'omu muteleka, Diboni, Bamotibaali, na Betibaalimeoni; 18Yahasa, Kedemoti na Mefaati; 19Kiriataimu, Sibuma na Zeretishahari aha ibanga ly'oruhanga orwo; 20na Betipeori n'obusoka bwa Piziga, na Betiyeshimoti; 21n'ebigo byona eby'omu nsi y'omuteleka, n'obukama bwona bwa Sihoni omukama w'Abaamori, ayatwaliraga Heshiboni owo Musa yasingire n'abatwazi ba Midiani, Evi, Rekemu, Suri, Huri na Reba nibo bakuru ba Sihoni abaturaga omu nsi egyo. 22Baalamu mutabani wa Beori ayaraguraga, Abaisiraeli bakamwitirana, nawe bakamwisa embanda. 23Orubibi rw'Abarubeni ni Yorudani mukono ogw'obugwaizoba. Obu nibwo busika bw'Abarubeni kuhonderana n'amahiga gabo, ebigo n'ebyaro byabo.

Ensi eyo Gadi yagabiirwe

24Musa hakaba agabiire ab'oruganda rwa Gadi ensi kuhonderana n'amahiga gabo. 25Ensi yabo yabaga Yezeri n'ebigo byona bya Gileadi, n'ekichweka ky'ensi y'Abaamoni kugoba ekigo kya Aroeri, oburugaizoba bwa Raba; 26kandi kwema Heshiboni kugoba Ramatimizipe na Betonimu. Eshuba eyema Mahanaimu egoba ensi ya Debiri; 27n'omu ruhanga rwa Betiharamu, Betinimura, Sukoti na Safoni, n'ekichweka ekisigaire eky'obukama bwa Zihoni omukama wa Heshiboni. Obugwaizoba batangwaga Yorudani, aho bagendera kimoi bagoba Enyanja ya Kinereti. 28Obu nibwo busika bw'Abagadi kuhonderana n'amahiga gabo, ebigo n'ebyaro byabo.

Ensi eyo Manase yagabiirwe oburugaizoba

29Enusu y'oruganda rwa Manase nabo Musa hakaba abahaire obusika kuhonderana n'amahiga gabo. 30Ensi yabo yayemaga Mahanaimu, ekwata Bashani yona, obukama bwona bwa Ogi omukama wa Bashani n'ebyaro byona bya Yairi omuli Bashani, ebigo 60; 31n'enusu ya Gileadi, na Ashitaloti na Edirei, ebigo by'obukama bwa Ogi omuli Bashani. Ebi hakaba abihaire enusu ya baijukuru ba Makiri eya Manase.

32Nikwo Musa yagabire atyo ensi y'oburugaizoba bwa Yorudani na Yeriko ayemire omu miteleka ya Moabu. 33Kyonkai oruganda rwa Levi Musa tiyabahaire busika; Omukama Ruhanga wa Isiraeli n'iwe aba busika bwabo nk'okwo yabagambire.

Currently Selected:

Yoshua 13: RHAY01

Highlight

Copy

Compare