Yoshua 14

Okwatwa kw'ensi y'obugwaizoba bwa Yorudani

1Obu nibwo busika bw'Abaisiraeli omu nsi ya Kanaani. Eleazari omukuhani, Yoshua mutabani wa Nuni n'abebembezi b'ebika omu nganda z'Abaisiraeli nibo bababeganiire ensi egyo. 2Okugibagabira bakateeka enshoga nk'okwo Omukama yabaire agambiire Musa; bakagibeganira enganda mwenda hamoi n'enusu y'oruganda rwa Manase. 3Enganda eibili n'enusu y'orwa Manase Musa hakaba yabahaire ensi buseli bwa Yorudani. Kyonkai Abalevita tiyabahaire busika muli Isiraeli. 4Baijukuru ba Yozefu bhakaba bali nganda ibili: Manase na Efuraimu. Omu nsi egyo Abalevita tibahairwemu mugabo, shana ebigo by'okuturamu n'enyeya z'okulisizamu ebitunganwa byabo. 5Omu kubegana ensi egyo Abaisiraeli bakakora nk'okwo Omukama yaragiire Musa.

Heburoni negabirwa Kalebu

6Ekiro kimoi bamoiho ab'oruganda rwa Yuda baija Giligali owa Yoshua. Omuli abo Kalebu Yefune, Omukenizi, amugambira ati, “Nomanya eky'Omukama yagambire Musa omwiruwe ahali iwe na inye omuli Kadeshibarinea. 7Inye nkaba nyina emyaka 40 orwo Omukama yantumire kwema Kadeshibarinea kunyomoza ensi egi. Nkamuletera amakuru nk'okwo nabaire ningamanya. 8Kyonkai barumuna bange abo nabaire ngenzire nabo batinisa abantu; kandi inye nkaba mwesigwa nahulira Omukama Ruhanga wange maliliire. 9Kir'ekyo Musa arahira ati, ‘Ensi ey'olikurabamu eliba yawe na baijukuru bawe kakimoi ebiro byona, aha rw'okuba obaire mwesigwa wahulira Omukama Ruhanga wawe omaliliire.’ 10Mbwenu Omukama andinzire; yahindura emyaka egi 45 kwema agambiire Musa ekigambo ekyo. Akakimugambira makiro ag'Abaisiraeli bali omw'irungu; leba kir'eki nyina emyaka 85. 11Mwaha nkyaina amani nk'okwo nabaire ndi orwo Musa yantumire. Nkyaina amani g'okurashana, n'okukora ebindi byona. 12Ahonu ompe ensi ezi ez'amabanga ez'Omukama yandaganisize kiro kili orwo inye n'abashaija bange twagambire Musa emyemere y'ensi. Tukabagambira okwo ensi yabaire einamu Abaanaki nibatura omu bigo bihango eby'eboma z'amabare. Shana Omukama yakumbera mbabingamu nk'okwo yangambire.”

13Aho Yoshua aha Kalebu eya Yefune omugisha, amuha n'ekigo kya Heburoni akilya. 14Kalebu eya Yefune, Omukenizi, alya Heburoni kugoba kir'eki; aha rw'okuba hakaba mwesigwa yahulira Omukama Ruhanga wa Isiraeli amaliliire. 15Eirai ekigo kya Heburoni kyayetwaga Kiriatiaraba. Araba hakaba ali muntu w'amani omu Baanaki. Ensi echulera, eba etakiina ndashana.

Currently Selected:

Yoshua 14: RHAY01

Highlight

Copy

Compare