Abaramuzi 9

Abimeleki omukama

1Abimeleki eya Yerubaali agenda Shekemu omuli banyinarumi n'abanyaruganda babo abagambira ati, 2“Mugambire Abashekemu bona muti, ‘Ekirungi kushaga ahali inywe ni kihai, batabani ba Yerubaali bona nshanju kubatwara, anga omoi abatware? Kandi mwijuke okwo inye ndi bwamba bwanyu, ndi mwana wanyu.’ ” 3Banyinarumi bamugambilira Abashekemu ebigambo ebyo byona. Aho bagwera owa Abimeleki, orwo bagambire bati, “Ni murumuna waitu.” 4Bamwihira ebichweka nshanju by'efeza omu nju ya Baaliberiti. Empiha ezo Abimeleki akazihonga ebifano bya ndilyo byamuhondera. 5Agenda Ofura omwa ishe aita abarumuna nshanju ba ishe, abaitira aha ibare limoi. Kyonkai Yotamu mainuka ga Yerubaali asigaraho, aha rw'okuba akesheleka. 6Abashekemu bona beshombokya, na Betimilo yona. Batendeka Abimeleki aha nyomyo y'omwaloni omuli Shekemu, bamuhindura mukama.

7Yotamu kuhulira ekigambo ekyo, agenda ayemelera aha mutwe gw'Eibanga lya Gerizimu, akungeleza ati, “Mumpulilize inywe Bashekemu nirwo Ruhanga arabahuliliza. 8Ekiro kimoi emiti ekagenda kukora amajuta omukama w'okugitwara; egambira omuzeituni eti, ‘Otutware.’ 9Kyonkai omuzeituni gugigambira guti, ‘Nsigeho amajuta gange ago bakoza kuha baruhanga n'abantu ekitinwa, ngende kwechundira eiguru y'emiti?’ 10Emiti egambira omutini eti, ‘Iwe ija otutware.’ 11Kyonkai omutini gugigambira guti, ‘Nsigeho obunuzi bwange n'ebiraba byange ebirungi ngende kwechundira eiguru y'emiti?’ 12Emiti egambira omuzabibu eti, ‘Iwe ija otutware.’ 13Kyonkai omuzabibu gugigambira guti, ‘Nsigeho edivai yange eshamukya baruhanga n'abantu ngende kwechundira eiguru y'emiti?’ 14Aho emiti yona egambira orukelere eti, ‘Iwe ija otutware.’ 15Orukelere rugambira emiti ruti, ‘Omu mazima kamuraba nimunkora amajuta kuba mukama nkabatwara, ahonu mwije muhungire omu kibeho kyange; kakitali kityo omuliro guruge omu rukelere gusosotore emyelezi ya Lebanoni.’ ”

16“Mbwenu aha rw'ekyo mubaire mugendeleirekwo kuha Abimeleki obukama? Mwijuke Yerubaali n'ekaye, mwamukolera ebisaine ebyo yabakoleire? 17Mwijuke okwo tata yabarashaniire. Akehwamu yabaihya omu mikono y'Abamidiani. 18Mbwenu mwashenga eka ya tata, mwaita abaanabe nshanju aha ibare limoi, mwatendeka Abimeleki omwana w'omuzanawe, k'aba mukama w'Abashekemu, orwo ali munyabuzare wanyu. 19Kamuraba mwakolera Yerubaali n'abe mwina omugendelero gurungi n'okumuha ekitinwa, ahonu mushandukire Abimeleki na wenene abashandukire. 20Kakitali kityo, omuliro guruge omuli Abimeleki gusosotore Abashekemu na Betimilo. Kandi guruge omu Bashekemu na Betimilo gusosotore Abimeleki.” 21Aho Yotamu airuka, asingirwa Beli, aturayo aha rw'okutina Abimeleki omurumuna.

Abashekemu nibashengera Abimeleki

22Abimeleki akatwara Isiraeli emyaka eshatu. 23Ruhanga asindika akatabure omuli Abimeleki n'Abashekemu. Abashekemu bashengera Abimeleki. 24Bikaba bityo Abimeleki n'Abashekemu abamuhweleire kwita barumunabe barurukiirwe obwamba obwo. 25Abashekemu bataho abantu b'okumuzimbira aha butwetwe bw'amabanga, banyaga bona ababarabagaho balesirwe omuhanda gulinya; ekigambo ekyo bakigambira Abimeleki.

26Gaali eya Ebedi aija Shekemu hamoi n'abanyarugandabe, Abashekemu bamwesiga. 27Bashohora bagya omu ndimiro zabo z'emizabibu banoga ezabibu bazijunga, bakora obugenyi. Bagya omu nju ya ruhanga wabo, balya, banywa, bajalikya Abimeleki. 28Gaali eya Ebedi agamba ati, “Abimeleki yab'ohai, isi naichwe Abashekemu tuli bahai kumukolera? Mutabani wa Yerubaali na Zebuli omuragirwawe tibabaire bali bairu ba Hamori ishe Shekemu? Aho kiki ichwe kumukolera? 29Kanakutaire abantu aba omu ngaro zange, aho nakwihire Abimeleki aha ngoma. Nakugambiire Abimeleki nti, ‘Yongeraho eihe lyawe oshohore.’ ”

30Orwo Zebuli, omutwazi w'ekigo yahuliire ebyo Gaali eya Ebedi yagambiire, ekiniga kija kumwita. 31Atuma entumwa ahali Abimeleki omuli Aruma nagamba ati, “Gaali eya Ebedi n'abanyarugandabe baizire Shekemu mara nibatera ekigo oruchuku kukushenga. 32Mbwenu aha rw'ekyo oimukye omu kiro n'abashaija ab'oinabo ohune omu ndimiro. 33Aho bwankya orwo eizoba lirashabuka liti, oimuke karai obunde ekigo; orwo wenene n'abashaija ab'ainabo barashohora kukurashanisa, obakore okw'orashobora.”

34Abimeleki n'abantu bona abo yabaire ainabo baimukya omu kiro, bebeganamu emitwe enai, bazimbira Shekemu. 35Gaali eya Ebedi aturuka ayemelera aha kishasi ky'ekihigi ky'ekigo, aho Abimeleki n'abantu abo yabaire ainabo bajumbuka mbali babaire bahuniire. 36Orwo Gaali yaboine abantu agambira Zebuli ati, “Leba abantu nibasongoka omu butwetwe bw'amabanga!” Zebuli amugambira ati, “Nobona ebinyumanyumi by'amabanga nibishusha abantu.” 37Gaali ashuba agamba ati, “Leba abantu nibasongoka omu mabanga omugati, kandi omutwe ogumoi niguruga orubaju orw'omwaloni gw'abafumu.” 38Aho Zebuli amugambira ati, “Ebyo wagambire bili haihi, iwe ayagambiire ati, ‘Abimeleki yab'ohai ichwe kumukolera?’ Aba ti bashaija abo wagahire? Mbwenu shohora orashane nabo.” 39Gaali ashohora ayebembeire Abashekemu, arashana na Abimeleki. 40Abimeleki amubinga, amwiruka asingwa, bangi bagwa emputa kulemwa kuhika aha kishasi ky'ekihigi. 41Abimeleki atura Aruma; na Zebuli abinga Gaali n'abanyarugandabe, baba batakishobora kutura Shekemu.

Shekemu nesilika

42Bukeire abantu baturuka omu rubuga. Ekigambo eki bakigambira Abimeleki. 43Akwata eihelye alibeganisamu emitwe eshatu, ashuba ahuna omu rubuga. Kugya kunaga amaisho abona abantu nibaruga omu kigo, abaimukiramu abaita. 44Abimeleki n'omutwe ogwo yabaire ainagwo airuka bwangu ayemelera aha mulyango gw'ekihigi ky'ekigo, oku emitwe ebili ebunda bona ababaire bali omu rubuga ebaita. 45Abimeleki arashanisa ekigo ekiro kyona, akikwata, mara aita ababaire bakilimu. Ekigo akisasanura, akimamilira omwonyu.#9:45 Omwonyu Ensi eba mpama obuteza kantu.

46Orwo abantu bona b'omunara gwa Shekemu bakihuliire, bataha omu kitairongo kya rwensinga ya Eliberiti. 47Bagambira Abimeleki okwo abantu bona b'Omunara gwa Shekemu babaire bahumbaine. 48Abimeleki atemba Eibanga lya Salumoni n'abashaija bona abo yabaire ainabo. Akwata endyamiti atema eitagi ly'omuti, alishutura alinaga aha ibega. Agambira abashaija abo yabaire ainabo ati, “Yanguha mukore okwo mwabona nakora.” 49Kityo buli omoi atema eitagi bamuhondera, bagatuma aha kitairongo mara ekitairongo bakitaho omuliro. Ekyarugiremu abantu bona b'Omunara gwa Shekemu nabo bafa, abantu nka 1,000 abashaija n'abakazi.

Emifere ya Abimeleki

50Aho Abimeleki agenda Thebezi, asisira kugirashanisa, mara agikwata. 51Kyonkai omu kigo hakaba halimu omunara gugumire. Abanyakigo bona bagwirukiramu, abashaija bona n'abakazi, bekomeranamu, bagya omu rushwi rw'omunara. 52Abimeleki aija aha munara agurashaniraho, ashuba agoba aha rwigi rw'omunara kugwokya n'omuliro. 53Omukazi omoi arasha enseiso emugwa aha mutwe, egushekenyura. 54Aho Abimeleki ayeta bwangu omusigazi omutwaziwe w'ebikwato amugambira ati, “Shohorora embanda yawe onyite, abantu bataija bakangeya bati, ‘Akaitwa omukazi.’ ” Omusigaziwe amutera embanda emuturukirana, afa. 55Orwo Abaisiraeli baboine okwo Abimeleki yafa, buli muntu agenda omwe. 56Oku nikwo Ruhanga yayehoroize Abimeleki, aha rw'entambara eyo yafakaliire ishe orwo yaisire abarumuna nshanju. 57Kwakwo ebibi eby'Abashekemu bakozire, Ruhanga alibibashubyaho, n'omuraamo gwa Yotamu eya Yerubaali gubakwata.

Currently Selected:

Abaramuzi 9: RHAY01

Highlight

Copy

Compare