Abaramuzi 10
10
Tola na Yairi
1Abimeleki akahonderwa Tola, Tola eya Pua, Pua eya Dodo, ow'oruganda rwa Isakari kurokora Isiraeli. Yaturaga Shamiri omu mabanga ga Efuraimu. 2Akaramura Isiraeli emyaka 23. Aho afa, aziikwa Shamiri.
3Tola ahonderwa Yairi Omugileadi, aramura Isiraeli emyaka 22. 4Akaba aina abatabani makumi gashatu, abakuubaga endogobe 30. Bakaba baina ebigo 30 nibyetwa Havotiyairi na ganu magingo, byonene bili omu nsi ya Gileadi. 5Yairi afa, aziikwa Kamoni.
Yefuta
6Abaisiraeli bashuba bagokera Omukama, bafukamira Ababaali n'Abaashitaroti, baruhanga ba Siria, aba Sidoni, aba Moabu, ab'Abaamoni, n'ab'Abafilisiti. Basigaho Omukama, balekera kumufukamira. 7Omukama agilira Isiraeli ekiniga kingi, abanaga omu mikono y'Abafilisiti n'Abaamoni. 8Omwaka ogwo gwona baburabuza Abaisiraeli babaita kubi. Bakabonabonyia Abaisiraeli ababaire bali buseli bwa Yorudani omu nsi y'Abaamori omuli Gileadi, emyaka 18. 9Abaamoni bashabuka Yorudani kurashanisa Yuda na Benjamini n'oruganda rwa Efuraimu. Kityo Isiraeli ekatuntuzibwa kubi.
10Abaisiraeli batakira Omukama bati, “Tukufakaliire, aha rw'okuba tusigireho Ruhanga waitu twafukamira Ababaali.” 11Omukama abagambira ati, “Tinabaihire omu Bamisiri n'omu Baamori, omu Baamoni n'omu Bafilisiti? 12Abasidoni kwakwo, n'Abaamaleki n'Abaamoni bhakabaita kubi mwantakira, nababaihya omu mikono. 13Kyonkai inywe munsigireho mwafukamira baruhanga abandi, aha rw'ekyo tindibajuna rundi. 14Mugende mutakire baruhanga abo mwihireho, orwo muraburabuzibwa babakize.” 15Abaisiraeli bagambira Omukama bati, “Tufakaire, otugire okw'orayenda; ekiliho kir'eki otukize, twakutagiliza.” 16Aho banaga ebishushani bya baruhanga ebyo babaire bainabyo, bafukamira Omukama. Omukama ajunazibwa obujune bwa Isiraeli.
17Aho Abaamoni bajarabwa kurashana mara basisira omuli Gileadi; kandi Abaisiraeli bahikana, basisira Mizipa. 18Embaga n'abebembezi ba Gileadi bagambirana bati, “Ni muntuki arabanza kurashanisa Abaamoni? Ogwo niwe arakulira abanyansi bona ba Gileadi.”
Currently Selected:
Abaramuzi 10: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
