Abaramuzi 8
8
Gideoni naita abatwazi ba Midiani
1Abantu ba Efuraimu babaza Gideoni bati, “Kiki eki eky'otukozire, kutatweta orwo otabalire Abamidiani?” Bamukunganisa muno. 2Abahorora ati, “Inye nkozireki ekyo twakwiganisa n'ebyo inywe mukozire? Ezabibu z'okurondaronda eza Efuraimu tizilikukira ez'okuhurura eza Abiezeri? 3Ruhanga abanagire omu mikono abakuru ba Midiani abalimu Orebu na Zeebu. Nkozireki ekyo twakwiganisa n'ebyo inywe mukozire?” Orwo yagambiire atyo ekiniga kyabo kihora.
4Gideoni agoba Yorudani ashabuka n'abaisherukale 300 abo yabaire ainabo, balemirwe kyonkai babingire omubisha. 5Aho agambira abantu ba Sukoti ati, “Nimbashaba mumpere abantu balikumpondera ekyakulya, aha rw'okuba balemirwe, mara nimbinga Zeba na Salumuna abakama ba Midiani.” 6Abakuru ba Sukoti bamubaza bati, “Ichwe kuha eihe lyawe ekyakulya, wasingiire Zeba na Salumuna?” 7Gideoni agamba ati, “Ahonu kayo, orwo Omukama araba yanagire Zeba na Salumuna omu mikono yange emibili yanyu ndagitaguza amahwa g'eirungu n'orukwatango.” 8Aruga aho atemba Penueli, abagambira emigambire yonene egyo. Abantu ba Penueli nabo bamuhorora nk'okwo aba Sukoti babaire bamuhoroire. 9Abagambira ati, “Kandaihurura eli milembe, ndakambura omunara ogu.”
10Aho Zeba na Salumuna bhakaba bali Karikori hamoi n'eihe ly'abantu 15,000. Eli nilyo ihe ly'abantu b'oburugaizoba ababaire bahonokireho. Abafire baisherukale 120,000. 11Gideoni araba nyaihanda aha rubaju rw'eirungu oburugaizoba bwa Noba na Yogibeha; atera eihe litetegeire. 12Zeba na Salumuna abakama ba Midiani bairuka; ababinga abakwata, n'eihe lyona alitatamya.
13Ahanyuma Gideoni eya Yoashi atabaruka, aletwa orushozi rwa Heresi. 14Akwata omusigazi wa Sukoti amubaza; amuhandikira amabara g'abakuru n'abagurusi ba Sukoti, abashaija 77. 15Agoba abantu ba Sukoti agamba ati, “Leba Zeba na Salumuna abo munjumisize nimugamba muti, ‘Ichwe kuha eihe lyawe alilemirwe ekyakulya, wasingiire Zeba na Salumuna?’ ” 16Akwata abagurusi b'ekigo ashuba akwata amahwa g'eirungu n'orukwatango, abantu ba Sukoti abakora omulimo nakoza amahwa aga. 17Omunara gwa Penueli agukambura, n'abanyakigo abaita.
18Aho agambira Zeba na Salumuna ati, “Abashaija abo mwaitiire Tabori bhakaba bemire batai?” Bahorora bati, “Okwo oli, nikwo babaire bali bona. Bhakaba nibashusha abana b'omukama.” 19Agamba ati, “Bhakaba bali barumuna bange, bana ba mawe. Obuso bw'Omukama kuba mwabahungize, inywe tinakubaisire.” 20Agambira Yetheri omuzigaijowe ati, “Imuka obaite.” Kyonkai omusigazi tiyashohoroire mbandaye enshonga hakaba akyali mulenzi. 21Ahanyuma Zeba na Salumuna bagamba bati, “Oimuke iwe wenene otubundikire, aha rw'okuba okw'omushaija ayemire nikwo amanige gali.” Gideoni aimuka aita Zeba na Salumuna; atwara n'emilengyo y'enono eyabaire eli omu ngoto y'engamia zabo.
Eby'amalekeelera ga Gideoni
22Abaisiraeli bagambira Gideoni bati, “Otutware, iwe na mutabani wawe na mwijukuru wawe, waturokora omu mikono y'Abamidiani.” 23Gideoni abagambira ati, “Timbatware, na mutabani wange tabatware, Omukama niwe arabatwara.” 24Ashuba abagambira ati, “Kambashabe ekintu kimoi, buli omoi omuli inywe aihye eheleni omu minyagoye azimpe.” (Abamidiani bhakaba baina eheleni z'ezahabu, aha rw'okuba bhakaba bali Baishimaeli.) 25Bahorora bati, “Twagondokerwa, turazikuha.” Bayara ekijwaro, buli muntu anagaho eheleni z'ezahabu naihya omu minyagoye. 26Obusikizi bw'eheleni z'ezahabu ezo yayenzire bukagoba nk'ekilo 20; emilengyo y'enono, obubare bw'eiguzi bw'omu bikya n'ebijwaro bya nyabagana ebyajwarwaga abakama ba Midiani ebyo bitabulimu, otatairemu na mikofu eyabaire ejwetwe engamia zabo omu ngoto. 27Gideoni aziheshamu efodi azita Ofura omu kigokye. Isiraeli yona egifukamira, kandi Gideoni n'ekaye ebanaga omu kabi. 28Abaisiraeli basinga batyo Abamidiani, baba batakibatinisa. Omu milembe ya Gideoni ensi echulera emyaka 40.
29Yerubaali eya Yoashi agenda atura omwe. 30Gideoni ogu hakaba aina abana b'abojo 70, oruzarorwe nyabwe, aha rw'okuba hakaba aina abakazi bangi. 31N'ensholekeye eyabaire eli Shekemu nayo emuzalira omwana w'omwojo, amuruka eibara amweta Abimeleki. 32Gideoni eya Yoashi agwa omu bugurusi obugundu, nziiko omu nyanga ya Yoashi ishe omuli Ofura ey'Abaabiezeri.
Obushengi bwa Isiraeli
33Orwo Gideoni yafire ati, Abaisiraeli bashuba bafukamira Ababaali. Baaliberiti bamuhindura ruhanga wabo. 34Tibaijukire Mukama Ruhanga wabo ayabarokoire omu mikono y'ababisha babo aba buli rubaju. 35N'eka ya Yerubaali (niwe Gideoni) tibagigiliire kisha aha rw'ebirungi byona ebyo yabakoleire.
Currently Selected:
Abaramuzi 8: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
