Abaramuzi 2

Omumalaika w'Omukama naranga enaku za Isiraeli

1Omumalaika w'Omukama aruga Giligali agya Bokimu. Agambira Abaisiraeli ati, “Nkabaihya Misiri nabaleta omu nsi eyo nanahiliire baisheinywe okwo ndigibaha inywe. Nkagamba nti, ‘Tindiziza kuchwa ndagano yange nainywe, 2mara mutalikora ndagano na banyansi ba nsi egi. Mukambure elutare zabo.’ Kyonkai timumpuliire. Mukozireki eki? 3Kityo mbwenu ningamba nti: Abanyansi abo timbabinge mu nsi egyo orwo mulikugitahamu. Baraba babisha banyu, kandi okufukamira baruhanga babo kubanage omu kabi.” 4Orwo omumalaika w'Omukama yagambiire Abaisiraeli ebigambo ebi, balira muno. 5Omwanya ogwo eibara bagweta Bokimu, mara batambiliraho Omukama ekitambo.

Okufa kwa Yoshua

6Orwo Yoshua yataishwire Abaisiraeli bagenda buli omoi omu busikabwe obwo yagabiirwe. 7Omu makiroge Abaisiraeli abo bakakolera Omukama, n'omu makiro g'abagurusi abakuzire kumushaga, ababaire baboine eby'amaani byona eby'Omukama yabaire akoleire Isiraeli. 8Yoshua eya Nuni, omwiru w'Omukama akafa aina emyaka 110. 9Bakamuziika Timunatheresi omu busikabwe, omu mabanga ga Efuraimu, bikara by'Eibanga lya Gaashi. 10Kwakwo omuzarwa ogwo gwona gufa, haimukwa omuzarwa ogundi ogutamanyire Mukama anga kumanya yabaire akoleire Isiraeli.

Okushenga kw'emizarwa eyahondeireho n'ebibonabonyio byayo

11Abaisiraeli bakagokera Omukama bakolera Ababaali. 12Byebwa Omukama Ruhanga wa baishebo, banigaza ayabaire abaihire Misiri. Bahondera baruhanga abandi ab'amahanga agabaire gabataine, babafukamira. 13Bayebwa Omukama bakolera Ababaali n'Abaashitaroti. 14Kityo akabatamwa muno, yabanaga omu mikono y'ababisha ababaire babataine, babanyaga. Isiraeli ekaba etakishobora kutabalira babisha bayo. 15Buli orwo batabaraga Omukama abateza enaku, nk'okwo yabaire abarahiliire.

Abaramuzi nibarokora Isiraeli

16Omu makiro ago Omukama akataho abaramuzi, babaihya omu mani g'ababisha ababatabaliraga. 17Kyonkai tibagizire bwesigwa, tibafa gahuliliza baramuzi babo. Bakekwata baruhanga abandi baba nibo bafukamira. Bakalekera bwangu emigilire ya baish'enkurubo abahulire emihango y'Omukama. Bonene tibakozire batyo. 18Abaramuzi ab'Omukama yabateragaho hakaba nabemamu, yarokora Abaisiraeli omu mikono y'ababisha babo. Kabamutakiraga ababisha babo babashasize nibababonabonyia, yaganyaga. 19Kyonkai buli orwo omuramuzi yafaga, bashubaga enyuma bakora kubi kushaga baishebo, bekwata baruhanga abandi, babakolera, babafukamira. Tibazilize kulekera migilire yabo anga lyeleme.

Okutasilikibwa kw'amahanga agataine Isiraeli

20Aho Omukama anigalira Isiraeli, agamba ati, “Orwo abantu aba bachwire endagano yange eyo naragire baishebo, batalikumpulira, 21kwema mbwenu omu mahanga ago Yoshua yasigiremu orwo yafire, tinkibingamu ihanga lyona lyona. 22Nkoze amahanga ago kuleba nk'Abaisiraeli barayegendeleza kukora ebyo ndikwenda nk'okwo baishebo bagizire anga chei.” 23Kityo Omukama alekamu amahanga ago atagabingire aho n'aho, kandi tiyaganagire mu mikono ya Yoshua.

Currently Selected:

Abaramuzi 2: RHAY01

Highlight

Copy

Compare