Abaramuzi 1
1
Yuda n'abandi nibalya ensi
1Yoshua kayabaire yafire, Abaisiraeli babaza Omukama bati, “N'ohai aragenda atwebembeire kutabalira Abakanaani?” 2Omukama agamba ati, “Ab'oruganda rwa Yuda bagende. Leba, ensi nagibanaga omu mikono.” 3Ab'oruganda rwa Yuda bagambira ab'orwa Simeoni barumuna babo bati, “Ija tugende hamoi omu nsi eyo batuhaire, turashanise Abakanaani; naichwe kwakwo turagenda nainywe omu nsi eyo babahaire.” Kityo ab'oruganda rwa Simeoni bagenda nabo. 4Aho aba Yuda bagenda. N'Omukama anaga Abakanaani n'Abaperizi omu mikono yabo. Basingaho 10,000 omuli Bezeki. 5Bagwamu Adonibezeki omuli Bezeki, bamutera basinga Abakanaani n'Abaperizi. 6Adonibezeki airuka, kyonkai bamubinga bamukwata, bamutemaho ebyara bishaija eby'emikono n'eby'amaguru. 7Adonibezeki agamba ati, “Abakama nshanju abatemirweho ebyara bishaija by'emikono n'eby'amaguru barondaga obuchwagulika ahansi y'emeza yange. Kityo Ruhanga yambonabonyia nantura ebyo nakozire.” Bamuleta Yerusalemu niho yagwire.
8Kandi ab'oruganda rwa Yuda batera Yerusalemu, ekigo bakikwata, abamwo babaisa embanda, n'ekigo bakitaho omuliro. 9Ahanyuma Abayuda batabalira Abakanaani abaturaga omu mabanga, omuli Negebu n'omu mpita. 10Batabalira n'Abakanaani abaturaga Heburoni (eirai Heburoni yayetwaga Kiriatiaraba); basinga enganda za Sheshai na Ahimani na Talumai. 11Kuruga okwo batabalira abanyansi ba Debiri (eirai Debiri yayetwaga Kiriatiseferi). 12Kalebu agamba ati, “Alitabalira Kiriatiseferi akagikwata ndimusiigira Akisa muhara wange.” 13Otinieli eya Kenazi, Kenazi murumuna Kalebu, agikwata. Aho amuhangiira Akisa omuhara. 14Orwo Akisa yagobire omwa iba, agambira Otinieli kushaba Kalebu endimiro. Akisa akuburuguka aha ndogobeye, Kalebu amubaza ati, “Noyendaki?” 15Akisa ahorora ishe ati, “Ompe omugisha aha rw'okuba ontaire omu nsi ya Negebu, ompe n'enchuro z'amaizi.” Aho Kalebu amuha enchuro z'obugyaruguru n'ez'obugyaifo.
16Baijukuru ba ishezara Musa, Omukeni, baruga Yeriko omu kigo ky'emikindo, bagenda n'Abayuda omw'irungu lya Yuda omuli Negebu bwatana Aradi; bagenda batura hamoi n'abantu bayo. 17Abayuda bagenda n'Abasimeoni barumuna babo basinga Abakanaani abaturaga Zefati, bagisilikiza kimoi. Nikwo ekigo ekyo kwetwa Horima. 18Abayuda kwakwo bakwata ekigo kya Gaza n'amataka gakyo, na Ashikeloni n'amataka gakyo. 19Omukama akashangwa abemiremu. Balya n'ensi y'amabanga, kyonkai tibashoboire kubinga banyansi ba muteleka, aha rw'okuba bhakaba baina amagali g'ekyoma. 20Kalebu akahabwa Heburoni nk'okwo Musa yabaire agambire, agibingamu batabani ba Anaki bonshatu. 21Kyonkai Ababenjamini tibabingire Bayebusi abaturaga Yerusalemu. Kityo Abayebusi batura n'Ababenjamini na mambwenu.
Eka ya Yozefu nibalya ensi
22Ab'oruganda rwa Yozefu nabo batabalira Betheli; n'Omukama hakaba abemiremu. 23Ab'oruganda rwa Yozefu babanza batuma ab'okunyomoza Betheli (rulinya ekigo kyayetwaga Luzu). 24Abanyomozi bagya babona omuntu omoi naruga omu kigo, bamugambira bati, “Batwoleke omuhanda gulikutaha omu kigo, turakuheera.” 25Aboleka omuhanda gulikutaha omu kigo. Ekigo bakisa embanda. Kyonkai omuntu ogwo n'ekaye babaleka bagenda. 26Omuntu ogwo agenda omu nsi y'Abahiti, ayombeka ekigo akyeta Luzu; nilyo ibara lyakyo na mambwenu.
Enganda za bikara n'Abaamori nibalya ensi
27Manase tiyabingire banyansi ba Betisheani na byaro byayo, anga banyansi ba Taanaki na byaro byayo, anga batuzi ba Dori na byaro byayo, anga aba Megido na byaro byayo; kyonkai Abakanaani bakasimbara batura omu nsi egyo. 28Orwo Abaisiraeli bagizire amani bakoza Abakanaani emilimo y'obwiru, kyonkai tibababingiremu kimoi.
29Abakanaani abaturaga Gezeri Abaefuraimu tibababingiremu.
30Abanyansi ba Kitironi n'aba Nahaloli Abazebuluni tibababingire. Bakatura n'Abakanaani abo, kyonkai babakoza emilimo y'obwiru.
31Abanyansi ba Ako, n'aba Sidoni Abaasheri tibababingiremu; kutyo n'aba Ahilabu, n'aba Akizibu, n'aba Heliba, n'Aba Afiki, n'aba Rehobu. 32Abaasheri bakatura n'Abakanaani abo abanyansi b'ensi egyo; tibababingiremu.
33Abanyansi ba Betishemeshi n'aba Betanati Abanafutali tibababingire. Bakatura n'Abakanaani abo abanyansi b'ensi egyo, nahosi babakoza emilimo y'obwiru.
34Abaamori bafunya Abadani babagarura omu mabanga, tibabajubwire kwija mu muteleka. 35Abaamori basimbara, batura Horiherezi, omuli Aihaloni n'omuli Shaalibimu, kyonkai ab'oruganda rwa Yozefu babatwaza amani, babakoza emilimo y'obwiru. 36Orubibi rw'Abaamori rwayemaga aha butemba bwa Akirabimu, rushuba rwema Sela rutemba.
Currently Selected:
Abaramuzi 1: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
