Abaramuzi 3
3
Amahanga agatatengiibwe
1Omuli Kanaani Omukama aina amahanga ago yasigiremu abone kugakoza kulenga Abaisiraeli ababaire batalikumanyaho ndashana yona yona omuli Kanaani. 2Ekyo akakigir'atyo Abaisiraeli ababaire batalikumanya kurashana akubegese. 3Amahanga ago nig'aga: Ebigo bitanu bw'Abafilisiti, n'Abakanaani bona, n'Abasidoni, n'Abahivi abaturaga aha Ibanga lya Lebanoni, kwema n'aha Ibanga lya Baaliherimoni kugoba aha butahiro bwa Hamati. 4Amahanga aga akagakoza kulenga Isiraeli, kumanya nka barahulira emihango eyo yabaire aragiire baishebo omu kanwa ka Musa. 5Nikwo Abaisiraeli abo kutura omu Bakanaani, Abahiti, Abaamori, Abaperizi, Abahivi n'Abayebusi. 6Basiigirangana n'amahanga ago, bakolera na baruhanga bago.
Otinieli
7Abaisiraeli bakagokera Omukama Ruhanga wabo, bamwebwa, bakolera Ababaali n'Abaashitaroti. 8Aha rw'ekyo Omukama akabanigalira, yabanaga omu mikono ya Kushanirishataimu emyaka munana. 9Kyonkai orwo bamutakiire yabaha omurokozi yabarokora, niwe Otinieli eya Kenazi, murumuna Kalebu. 10Mwoyo wa Mukama amutungamaho, aramura Isiraeli. Atabara omu ndashana n'Omukama amunaga Kushanirishataimu omukama wa Mesopotamia omu mikono, amusinga. 11Kityo ensi ebonamu emilembe emyaka 40. Aho Otinieli eya Kenazi afa.
Ehudi
12Abaisiraeli bashuba bagokera Omukama. Aho Omukama agiza Egiloni omukama wa Moabu amani atera Isiraeli. 13Omu kutabalira Isiraeli akagitera, akema n'Abaamoni n'Abaamaleki n'ekigo ky'emikindo.#3:13 Ky'emikindo Ekigo ky'emikindo ni Yeriko. 14Abaisiraeli bakolera Egiloni omukama wa Moabu emyaka 18.
15Kyonkai Abaisiraeli kabatakiire Omukama, Omukama yabateraho omurokozi, Ehudi eya Gera, Omubenjamini ayagiraga emosho. Abaisiraeli bamutweka ebigemuro bya Egiloni omukama wa Moabu. 16Ehudi ahesha embanda y'amogi gabili, oburai bwayo nk'enusu mita, agikiikira aha itako lya bulyo omu myendoye omunda. 17Ayanjulira Egiloni omukama wa Moabu ebigemuro. Egiloni hakaba ali mushaija muhango muno. 18Orwo Ehudi yabaire yamazire kwanjura ebigemuro, ataishura abantu ababaire babilesire. 19Kyonkai wenene agarukira aha bishushani by'amabare ebibaijano bwatana Giligali. Agambira Egiloni ati, “Waitu mukama, nyina eky'okukugambira omu kyama.” Egiloni agambira abaramatabe ati, “Mwesize.” Aho abaramata bona baturuka, bamuruga omu maisho. 20Ehudi amugoba okwo yabaire ashuntamire wenkai omu kiyumba ky'amabeho aha rushwi, amugambira ati, “Ruhanga yakuntumaho.” Egiloni aimuka aha nketoye. 21Ehudi aimukya omukono gwa bumosho aihya embanda aha itakolye lya bulyo, amuchumita orubunda. 22Embanda n'omukono gwayo bimutaha omunda, mara tagimwihyamu. Embanda ekwatwa ebishaju, n'ebihagaro bituruka. 23Aho Ehudi ashohora omu kishasi, asika enyigi z'ekiyumba ky'aha rushwi azikoma, amukingirana.
24Orwo yabaire yagenzire, abairu baija. Kabaaboine okwo enyigi zikingire batekeleza bati, “Ali omu ruhuba rw'ekiyumba ky'amabeho nayeyugiza.” 25Balinda balindil'eleyo; kabaaboine okwo yaguma atakingwire nyigi, bakwata orufunguruzo bazikingura; leba omukama wabo abyamire ahansi afire.
26Orwo babaire bhaliho bategeleize, Ehudi airuka. Ahingura aha bishushani by'amabare ebibaijano ahungira Seira. 27Kayagobireyo atera orukuli omu mabanga ga Efuraimu. Abaisiraeli basongoka nawe agenda abebembeire. 28Abagambira ati, “Mumpondere, aha rw'okuba Omukama yabanaga ababisha banyu Abamoabu omu mikono.” Kityo basongoka bamuhondeire, bakwata ekyambu kya Yorudani batangirayo Abamoabu abo, mara tibajubwire muntu n'omoi kwambuka. 29Omu kanya ako baitaho Abamoabu abaisherukale emanzi nka 10,000. Thaliho muntu yairukire. 30Kir'ekyo Abaisiraeli batera Abamoabu. Ensi ebona emilembe 80.
Shamugari
31Ehudi akahonderwa Shamugari eya Anati; niwe yaisize Abafilisiti 600 omuhunda gufunya ente. Na wenene arokora Isiraeli.
Currently Selected:
Abaramuzi 3: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
