Abaramuzi 14

Okushwera kwa Samusoni

1Samusoni asongoka Timuna, agwanganamu n'omwisiki Omufilisiti. 2Aho atemba agambira ishe na nyina ati, “Mboine omwisiki Omufilisiti omuli Timuna, mbwenu mumunshelerere mushwere.” 3Kyonkai ishe na nyina bamugambira bati, “Talimu mukazi omu banyabuzare bawe anga omu banyaruganda baitu bona iwe kwenda kushwera omukazi omu Bafilisiti abatatahiliirwe?” 4Bhakaba batalikumanya okwo kyabaire nikyema aha Mukama; aha rw'enshonga hakaba nahiga obushango bw'okugwisa Abafilisiti. Omu bukiro bulinya Abafilisiti bhakaba nibatwara Abaisiraeli.

5Aho Samusoni asongoka Timuna hamoi na ishe na nyina, agobera endimiro za Timuna ez'emizabibu. Niho honkai omwera gw'entare gusinda gumutahiremu. 6Mwoyo wa Mukama amutungamira n'amani, ajanjabura entare nk'okwo omuntu atagatagura akabuzi; mara hakaba ataina kantu mu byara. Kyonkai ekyo yakozire tiyakigambiire ishe na nyina. 7Aho asongoka afumora n'omukazi, omukazi ogwo amugenderage. 8Akanya kake kakahingwire agaruka kumutwara; aruga omu muhanda agya kuleba omutumbi gw'entare ashanga gulimu ekibumbuli ky'enjoki n'obwoki. 9Agukiharuramu akikwata omu mikono, agenda nakilya. Agobera ishe na nyina, abahaho balya. Kyonkai tiyabagambire kwo bwoki yabwihire mu mutumbi gwa ntare.

10Ishe asongoka agya ow'omukazi, aho Samusoni akolerayo obugenyi, aha rw'enshonga nikwo abasigazi bagiraga. 11Orwo abantu bamuboine bamuletera batahi babo 30 kumushemba.

Ekikoikyo kya Samusoni

12Samusoni abagambira ati, “Kambakoikeze ekikoikyo, kamurakinyitira omu biro mushanju by'obugenyi obu mukakimanya, ndabaha ebijwaro 30 bya kitani n'ebindi kaliza makumi gashatu. 13Kyonkai kamutashoboire kukinyitira, murampa ebijwaro 30 bya kitani kaliza n'ebindi 30 kaliza.” Bamugambira bati, “Koikya ekikoikyo kyawe tukihulire.” 14Abagambira ati, “Rulya arugirwemu ekyakulya, kandi omunyamani arugirwemu ekilikunura.” Omu biro bishatu tibashoboire kwita kikoikyo ekyo.

15Aha kiro kya kanai bagambira muka Samusoni bati, “Lembalemba baro atwitiire ekikoikyo ekyo tutakukwokya na muliro iwe n'eka ya sho. Muturaliize kwija hanu kutwinaza?” 16Muka Samusoni amulilira omu maisho agamba ati, “Nonnoba, tolikungonza; okoikeize ab'omwaitu ekikoikyo kyonkai tiwakinyitira.” Amugambira ati, “Leba, tinakitira tata na mawe?” 17Omukazi amulilira omu maisho ebiro mushanju by'amagenyi gabo. Orwo yamujogire muno aha kiro kya mushanju akimwitira. Aho omukazi nawe aitira ab'owabo ekikoikyo. 18Aha kiro kya mushanju eizoba litakatobeire abanyakigo bamugambira bati,

“Ni kihai ekilikunura kushaga obwoki?

Ni kihai ekina amani kushaga entare?”

Abagambira ati,

“Kuba mutalimisize nyana yange y'enkiraiziba,

timwakwisire kikoikyo kyange.”

19Mwoyo wa Mukama amubanda n'amani, asongoka Ashikeloni aita abanyakigo 30, abanyaga; abaisire ekikoikyo abaha ebijwaro kaliza. Agaruka omwabo ekiniga kimuli kubi. 20Muka Samusoni bamusiigira mutahiwe ayabaire ali muragazawe orwo yashwera.

Currently Selected:

Abaramuzi 14: RHAY01

Highlight

Copy

Compare