Abaramuzi 13

Okuzarwa kwa Samusoni

1Abaisiraeli bashuba bagokera Omukama, abanaga omu mikono y'Abafilisiti emyaka 40.

2Hakaba bhaliho omuntu wa Zora ow'oruganda rw'Abadani, eibaralye Manoa. Mukaziwe hakaba ali mugumba ataina bana. 3Omumalaika w'Omukama abonekera omukazi ogwo amugambira ati, “Oba mugumba, togira bana. Kyonkai oratwara enda ozare omwana w'omwojo. 4Aha rw'ekyo oyelinde, otakunywa divai anga marwa, kandi otakulya muziro gwona gwona. 5Omwana ogwo orumoiso rutalimugya mu mutwe aha rw'okuba aliba nyehonge ya Ruhanga kwema okuzarwa. Niwe alibanza kuyuguruza Isiraeli omu mikono y'Abafilisiti.” 6Aho omukazi aija agambira iba ati, “Omuntu wa Ruhanga yanyijaho, obusobwe nibushusha obw'omumalaika wa Ruhanga, natinisa muno; tinamubaza mbali yaruga kandi tiyangambira ibaralye. 7Kyonkai yangambira ati, ‘Noija kutwara enda ozare omwana w'omwojo, kityonu otakunywa divai anga marwa, mara otakulya muziro gwona gwona, enshonga omwana aliba nyehonge ya Ruhanga kwema okuzarwa kuturuka aha kufakwe.’ ”

8Aho Manoa atagiliza Omukama ati, “Waitu Mukama, ninkutagiliza, omushaija wa Ruhanga ow'obaire otumire atugarukire, atwegese ebyo turakolera omwana arazarwa.” 9Ruhanga ahulira eiraka lya Manoa, omumalaikawe ashuba aizira omukazi orwo yabaire ashuntamire omu musiri; kyonkai Manoa iba hakaba atainawe. 10Omukazi airuka bwangu bwangu agambira iba ati, “Omushaija nyizireho kiro kili yambonekera.” 11Manoa aimuka agenda amuhondeire agoba omushaija amubaza ati, “Niwe mushaija ayafumoleire omukazi ogu?” Agamba ati, “N'inye.” 12Manoa agamba ati, “Mbwenu aho k'ebigambobye birabakwo emirolere y'omwana ebe etai mara akoreki?” 13Omumalaika w'Omukama amuhorora ati, “Byona ebyo nagambire omukazi abe nibyo ayelinda. 14Kyona kyona ekiliruga aha muzabibu atalikilya, nangu na kunywa divai handiki marwa. N'omuziro atagulya. Byona ebyo namuragiire abihikye.”

15Manoa agambira omumalaika w'Omukama ati, “Osingire tukukelerezeho tukwitire akabuzi.” 16Omumalaika w'Omukama amugambira ati, “N'orwo orankelerezaho, tindye kyakulya kyawe; k'oraba orahongera Omukama ekihongo ky'okwokibwa okimuhongere.” (Manoa hakaba atamanyire okwo yabaire ali mumalaika w'Omukama.) 17Manoa abaza omumalaika w'Omukama ati, “Eibara lyawe oli ohai? Orwo ebigambo byawe birabakwo tubone kukukunisa!” 18Omumalaika w'Omukama amugambira ati, “Kubaki nobaza eibara lyange? Leka, ly'okutangaza!” 19Kityo Manoa akwatirana akabuzi n'ekihongo ky'emyaka, akahongera Omukama aha rwazi, akahongera ogwo akora eby'okutangaza. 20Orwo orulimi rw'omuliro rwarugire ahali elutare rukolekera omw'iguru, omumalaika w'Omukama agenderana omu rulimi rw'omuliro gwa elutare, Manoa na mukaziwe balebire. Aho bagwa ahansi bajumaire.

21Omumalaika w'Omukama tiyabonekeire Manoa na mukaziwe rundi. Aho Manoa amanya okwo yabaire ali mumalaika w'Omukama. 22Manoa agambira mukaziwe ati, “Nitwija kufa orwo twabona Ruhanga.” 23Kyonkai mukaziwe amugambira ati, “Kuba Omukama yaba agendeleire kutwita tiyakukunzire kihongo kya n'ekihongo ky'emyaka ebyo twamuhongera, handiki kutwoleka ebintu ebi byona. Nabyo ebyab'ebi tiyakubiturangiire.” 24Omukazi azara omwana w'omwojo, amuruka eibara amweta Samusoni; omwana akura mara Omukama amutunga omugisha. 25Mwoyo wa Mukama hakabanza kumubandira Mahanedani omugati ya Zora na Eshitaoli.

Currently Selected:

Abaramuzi 13: RHAY01

Highlight

Copy

Compare