Abaramuzi 15

Samusoni nayokya emyaka y'Abafilisiti

1Akanya kakahingwireho omu bukiro bw'eigesha ly'engano, Samusoni agya kuleba mukaziwe; amutwalira n'omwana gw'embuzi. Agamba ati, “Kangye ndare na mukazi wange.” Kyonkai ishe mwisiki amutanga kurara nawe. 2Ishe mwisiki agamba ati, “Mbaire natekeleize nti omutamiirwe kimoi, kityo namusiigira mutahi wawe. Mutowe ni murungi kumushaga. Ba niwe otwara.” 3Samusoni abagambira ati, “Lero mbwenu Abafilisiti tibankwate mushango kandabakora kubi.” 4Aho agenda akwata emiha 300, akwata n'enkanzi; agyolekejanyia emikira, buli mikira ebili akomaho enkanzi. 5Kayabaire yataireho enkanzi omuliro, ataishura emiha etaha omu misiri y'engano y'Abafilisiti, ayokya emiganda n'engano etakagesirwe, n'endimiro z'emizeituni kwakwo. 6Aho Abafilisiti bagamba bati, “Eki kyakorw'ohai?” Bagamba bati, “Samusoni omukoi w'Omutimuni, orw'okutwara mukaziwe akamusiigira mutahiwe.” Abafilisiti baizira kimoi bokya omukazi na ishe. 7Samusoni abagambira ati, “Kamuraba nimugira muti, ninahira kubehoroza, mara nshube ngende.” 8Abatera kibero na itako, abaita eitura mpungu; asongoka agya aikara omu mpako y'orwazi rwa Etamu.

9Aho Abafilisiti bagya Yuda basisira bashuba banyaga ekigo kya Lehi. 10Abantu ba Yuda bagamba bati, “Kiki inywe kutuzinda?” Bagamba bati, “Twaija kuboha Samusoni, tumukore nk'okwo atukozire.” 11Aho abantu ba Yuda 3,000 basongoka omu mpako y'orwazi rwa Etamu bagambira Samusoni bati, “Tolikumanya okwo Abafilisiti balikukutwara? Mbwenu kiki eki eky'otukozire?” Abagambira ati, “Okwo bankozire nanye nikwo mbakozire.” 12Bamugambira bati, “Twaija kukuboha, tukunage omu mikono y'Abafilisiti.” Samusoni abagambira ati, “Munnahilire okwo mutanyite.” 13Bamugambira bati, “Chei, turakuboha kushai tukunage omu mikono yabo, titukwite.” Aho bamubohesa emiguha emihya ebili, bamwihya omu rwazi bamutembya.

14Kayagobire Lehi, Abafilisiti baija nibashana kumubuganganwa. Aho Mwoyo wa Mukama amutungamira n'amani, n'emiguha eyabaire emuli aha mikono eshusha orukoba rukwetwe omuliro, n'empingoze zagilira zimuruga aha mikono. 15Agwamu orushaya rw'endogobe orukyaina amagara, aimukya omukono arukwata, arwisa abantu 1,000. 16Samusoni agamba ati,

“Naisa orushaya rw'endogobe,

entuumiro aha ntuumiro.

Naisa orushaya rw'endogobe,

abantu rukumi.”

17Orwo yamazire kugamba atyo, ajugunya orushaya, n'omwanya ogwo agweta Ramatilehi.

18Aija akwatwa eiliho lingi muno atakira Omukama ati, “Otutungire obujuni obu bw'amani, watwihuza omukono gw'omwiru wawe; mbwenu nyitwe eiliho, nshube ngwe omu mikono y'abatatahiriirwe?” 19Aho Ruhanga atabura enchuro omu kiina ekili Lehi kirugwamu amaizi. Orwo yanyoire amaizi omwoyo gumugarukamu, agira amani. Aha rw'ekyo enchuro egyo bakagyeta Enakore; eli Lehi kugoba kir'eki. 20Samusoni akaramura Isiraeli omu biro bw'Abafilisiti emyaka 20.

Currently Selected:

Abaramuzi 15: RHAY01

Highlight

Copy

Compare