Abaramuzi 11
11
Yefuta n'Abaamoni
1Yefuta Omugileadi hakaba ali mwisherukale emanzi, kyonkai yashangwa ali mwana w'ensholeke. 2Ishe Yefuta hakaba nayetwa Gileadi. Na muka Gileadi amuzalira abana b'abojo; orwo abatabani abo bakuzire babinga Yefuta, bamugambira bati, “Tolikwija kusika mwa tataichwe, orwo oli mwana w'omukazi ondijo.” 3Aho Yefuta airuka abarumuna, agya atura Tobu. Empwaguju zikundangana na Yefuta, lita niligenda nawe kunyaga abantu.
4Kahahingwireho ebiro, Abaamoni batabalira Isiraeli. 5Orwo Abaamoni batabaliire Isiraeli abagurusi ba Gileadi bagya Tobu kuhiga Yefuta. 6Bamugambira bati, “Oije otwebembere nirwo turarashana n'Abaamoni.” 7Kyonkai Yefuta abahorora ati, “Tinywe mwannobire mukambinga omwa tata? Orwo mwatangatangwa nirwo mwampiga?” 8Abagurusi bamugambira bati, “Mbwenu twakugarukaho, tugende hamoi orashanise Abaamoni, mara otwebembere ichwena abanyansi ba Gileadi.” 9Yefuta abahorora ati, “Kamulikungarura omuka kurashanisa Abaamoni, mara Omukama hakabampa nkabasinga, ndaba mwebembezi wanyu.” 10Abagurusi bamugambira bati, “Omukama abe mujulizi waitu, okwo wagamba nikwo turakora.” 11Kityo Yefuta agenda n'abagurusi ba Gileadi, abantu bamuhindura mwebembezi wabo abatwara. Yefuta agamba ebigambobye byona omu maisho g'Omukama omuli Mizipa.
12Ahanyuma atuma entumwa aha mukama w'Abaamoni nagamba ati, “Nonyenzaki kuntabalira kurashanisa ensi yange?” 13Omukama w'Abaamoni ahorora entumwa za Yefuta ati, “Orwo Abaisiraeli babaire nibaruga Misiri bakanyaka ensi yange kwema Arinoni kugoba Yaboki na Yorudani. Mbwenu aha rw'ekyo ogigarure ekyali milembe.” 14Yefuta ashuba atuma entumwa aha mukama w'Abaamoni 15zimugambira ziti, “Yefuta nagamba ati: Isiraeli tiyatwete nsi ya Moabu anga nsi y'Abaamoni. 16Bonene orwo balikuruga Misiri bakatwarwa ogw'eirungu bagoba Enyanja Rutuku; ahanyuma bagoba Kadeshi. 17Aho batuma entumwa aha mukama wa Edomu nibagamba bati, ‘Nitukushaba turabe omu nsi yawe;’ kyonkai omukama wa Edomu tiyabahoroire. Kwakwo batuma n'aha mukama wa Moabu kyonkai tiyaikiliize. Kityo Abaisiraeli baikara Kadeshi. 18Aho batwarwa ogw'eirungu bazingora ensi ya Edomu n'eya Moabu; baturuka rubaju orw'oburugaizoba bw'ensi ya Moabu, basisira buseli bw'ensi ya Arinoni. Ekiliho tibatahire Moabu aha rw'okuba Arinoni nirwo rwabaire ruli rubibi rwa Moabu. 19Aho batuma entumwa Heshiboni ahali Sihoni omukama w'Abaamori, bamugambira bati, ‘Nitukushaba turabe omu nsi yawe tugye omu nsi yaitu.’ 20Kyonkai Sihoni tiyabesigire kuraba mu nsiye. Ahuruza abantube bona, asisira ahali Yahazi, arashana na Isiraeli. 21Omukama Ruhanga wa Isiraeli anaga Sihoni n'abantube bona omu mikono ya Isiraeli, babasinga. Kityo Abaisiraeli balya ensi y'Abaamori yona abagituragamu. 22Balya n'ey'Abaamori kwema Arinoni kugoba Yaboki n'okwema aha irungu kugoba Yorudani. 23Omukama Ruhanga wa Isiraeli abinga Abaamori aha rw'abantube Abaisiraeli. Mbwenu iwe aho nogonza kugilya? 24Tolya nsi eyo Kemoshi ruhanga wawe alikukuha? Ichwe abantu bona ab'Omukama Ruhanga waitu yatubingire, nibo turaliira amataka gabo. 25Iwe washaga Baraki eya Zipori omukama wa Moabu? Akagingijanyia na Isiraeli anga kurashana nabo? 26Mbali Isiraeli yakatuliire Heshiboni n'ebyaro byayo, akatura Aroeri n'ebyaro byayo, n'omu bigo byona ebili aha nkungu z'omwiga gwa Arinoni, emyaka bikumi bishatu, kubaki aho hona otakabinyaguruzaga? 27Aha rw'ekyo inye tinkufakaliire, iwe nonkora kubi kundashanisa. Omukama, omuramuzi, kir'eki aramure Abaisiraeli n'Abaamoni.” 28Kyonkai omukama w'Abaamoni tiyayetaireho kigambo kya Yefuta ekyo yamuragiireho.
Endagano ya Yefuta n'okusingwakwe
29Mwoyo wa Mukama atungama ahali Yefuta, Yefuta araba omuli Gileadi na Manase agoba Mizipa eya Gileadi, aruga Mizipa eya Gileadi aturuka omu Baamoni. 30Araganisa Omukama ati, “K'oranaga Abaamoni omu mikono yange, 31omuntu wena wena araturuka omwange kunyakilira orwo ndaihurura nsingiire Abaamoni, araba w'Omukama, ndamuhonga ekihongo ky'okwokibwa.” 32Aho ashabuka agya omu Baamoni kubarashanisa; n'Omukama abamunaga omu mikono. 33Abaita kwema Aroeri kuturuka bwatana Miniti, ebigo 20 n'okugoba Abelikeramimu, abaita eitura mpungu. Abaisiraeli baba nikwo bashaijuruza batyo Abaamoni.
34Aho Yefuta nagaruka omwe Mizipa, leba omuhara naturuka kumwakilira natera obudika, nahwera eiguru. Akaba ali mwanawe bwire bubegwa; kwihyaho ogwo Yefuta hakaba ataina mwana mwojo anga mwana mwisiki. 35Orwo yamuboine atemura emyendoye, agamba ati, “Yoo, mwana wange, wagammara, wanshasa muno, aha rw'okuba nyina endagano aha Mukama, kandi tinakugichwa.” 36Amugambira ati, “Tata, k'oraba oina endagano aha Mukama okore kuhonderana n'endagano yawe egyo, orw'Omukama yakwehorolera ababisha bawe Abaamoni.” 37Agambira ishe ati, “Onkolere oti: Ondeke emyezi ebili, ngende omu mabanga nchulire obwisiki bwange hamoi na batahi bange.” 38Yefuta amugambira ati, “Iroko.” Amutaishura emyezi ebili agenda na batahibe achulira obwisikibwe omu mabanga. 39K'emyezi ebili yahoire agarukira ishe, ishe amukora kuhonderana n'endaganoye eyo yabaire aragaine. Omuhara ogwo hakaba atakamanyaga mushaija. Kwema aho guba muchwo omuli Isiraeli. 40Abaisiraeli buli mwaka kugya kuchulira muhara wa Yefuta Omugileadi, ebiro binai omu mwaka.
Currently Selected:
Abaramuzi 11: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
