Obwijukiro 33
33
Musa naha Abaisiraeli omugisha
1Ogu nigwo mugisha ogwo Musa omushaija wa Ruhanga yahaire Abaisiraeli atakafire. 2Akabagambira ati,
“Omukama akaruga Sinai,
yatushamukira ayemire Seiri,
yashamura ayemire omw'Ibanga lya Parani,
akaba aina abamalaika enkumi ikumi,
n'omuliro gulikurabagira aha mukono gwa bulyo.
3Nikwo, akagonza abantube;
abatakatifube bona yabalindaga;
kityo bakakulibata omu bigere,
bakunda k'obahabura.
4Orwo Musa yaturagiire Amateka,
gakaba g'enteko ya Yakobo.
5Nikwo Omukama yabaire mugabe omuli Yeshuruni,
orwo abebembezi b'abantu babaire bahurwire,
enganda zona za Isiraeli hamoi.
6Rubeni arore atafa,
n'abantu agire bangi.”
7Ebi akabigambaho Yuda:
“Waitu Mukama, hulira eiraka lya Yuda,
omutahye omu bantube,
omurwanilire n'emikono yawe,
omubere bujuni aha babishabe.”
8Levi akamugambaho ati,
“Ohe Levi Thumimu yawe,
na Urimu ogihe omutakatifu;
owo walengire ahali Masa,
owo walengangaine nawe aha maizi ga Meriba;
9ayagambiireho ishe na nyinai ati,
‘Timbetaireho;’
aketonga barumunabe,
yayehurubasa abaanabe.
Aha rw'okuba bakakwata ekigambo kyawe,
mara bakwata endagano yawe.
10Barayegesa Yakobo emigenzo yawe,
na Isiraeli Amateka gawe,
barakuhongera obunuma,
n'ekihongo kyona ky'okwokibwa ahali ealutare yawe.
11Waitu Mukama, bahe eitungalye omugisha,
bakunde n'emilimoye;
oshekenyure enyugunyu z'ababishabe,
abamunoba bataliimuka rundi.”
12Benjamini akamugambaho ati,
“Omugonzibwa w'Omukama,
amutwire haihi omu milembe;
amuzingora ekiro kyona,
omugati yabo nimwo alikutura.”
13Yozefu akamugambaho ati,
“Ensiye Omukama agihe omugisha,
n'egabo kaliza ez'omw'iguru: Enjura,
n'ez'okuzimu ezibyamire ahansi: Amaizi;
14n'ebiraba katangaza ebyeziibwe eizoba,
n'omwero gurungi ogwa buli kirumo;
15n'omwero gurungi muno aha mabanga aga karai,
n'ekinje aha bushozi obw'eirai lyona,
16n'egabo z'ensi ezirungi muno zigijure,
Omukama asiimwe aha rw'oburungibwe,
ayagambiire ayemire omu kishaka ky'omuliro.
Emigisha egi eije aha mutwe gwa Yozefu,
n'aha rukinga orumuli aha mutwe,
ayabaire ali mukama omu barumuna.
17Omuzigaijogwe gw'enumi gwina ekitinwa ky'obukama,
amahembe gayo mahembe g'embogo;
nigo arasindikisa amahanga gona,
kuhika aha ndekelero y'ensi;
nikwo enkumi ikumi za Efuraimu zili zityo,
nikwo enkumi za Manase zili zityo.”
18Zebuluni akamugambaho ati,
“Shanduka Zebuluni omu kuturuka kwawe,
na Isakari omu mahema gawe.
19Barayeta amahanga kwija aha ibanga lyabo,
aho baratambiraho ebitambo ebyolekeire;
aha rw'okuba nibanyunya obugaiga bw'enyanja,
na buhanika y'omushenye eshelekire.”
20Gadi akamugambaho ati,
“Ahabwe omugisha ogwo ahanguhya Gadi!
Gadi ateka akatebe nk'entare,
atagura omukono n'akatw'eiraru.
21Akerondera ensi enungi muno,
aha rw'okuba kulinya
niho omushondo gw'omukuru w'eihe gwabaire gubikirwe;
akaija aha bakuru b'abantu,
akema na Isiraeli yagobesheleza emihango,
n'emiku y'amazima y'Omukama.”
22Dani akamugambaho ati,
“Dani kyana ky'entare,
ekitwituka kirugire Bashani.”
23Nafutali akamugambaho ati,
“Iwe Nafutali, oigusire obuberwa,
oijwire omugisha gw'Omukama,
olitwara enyanja na kasi.”
24Asheri akamugambaho ati,
“Asheri ahiirwe oruzaro,
abe nganzi omu barumuna,
aibike okugurukwe omu majuta.
25Emihingo yawe ebe y'ekyoma n'omulinga,
obugurusi bwawe buliba nk'okwo obusigazi bwawe buli.
26Iwe Yeshuruni, thaliho n'omoi alikushusha Ruhanga,
aletwa eiguru n'efarasi kukujuna,
akaletwa omu bichwi omu kitinwa ky'obukama.
27Ruhanga nyakumelera niwe buturo bwawe,
n'emikono y'eirai lyona ekutoire.
Akatibigya ababisha omu maisho gawe,
yagamba ati, ‘Silikya.’
28Nikwo Isiraeli yatwire atyo omu milembe,
enchuro ya Yakobo yatura yonkai,
omu nsi y'emyaka n'edivai;
nikwo, eigurulye nilimagalika orume.
29Oli muberwa, iwe Isiraeli,
n'ohai alikukushusha?
Ihanga elyarokoirwe Omukama,
engabo ekujuna n'embanda ekurashanira okasinga.
Ababisha bawe balija nibakwegongosheleza,
kandi iwe olibalibatilira.”
Currently Selected:
Obwijukiro 33: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
