Obwijukiro 34

Okufa kwa Musa

1Aho Musa aruga omu mpita za Moabu atemba Eibanga lya Nebo, agoba eiguru ya Pisiga, elilebangaine na Yeriko. Omukama amwoleka ensi yona: Gileadi kulemwa kugoba Dani, 2Nafutali yona, ensi ya Efuraimu na Manase, ensi yona ya Yuda kulemwa kugoba Enyanja y'Obugwaizoba, 3Negebu n'oruhita, nirwo Ruhanga rwa Yeriko ekigo ky'emikindo kulemwa kugoba Soari. 4Omukama amugambira ati, “Egi niyo nsi eyo nanahiliire Aburahamu, Isaka na Yakobo nti, ‘Ndigiha baijukuru bawe.’ Nagikwoleka wagibona, kyonkai toshabuke kugigyamu.” 5Kityo Musa omwiru w'Omukama agwa omu nsi ya Moabu nk'okwo Omukama yagambiire, 6mara yamuziika omu ruhanga omu nsi ya Moabu, rulebangaine na Betipeori, kyonkai thaliho muntu n'omoi alikumanya nziikoye na mwaha. 7Musa akaba aina emyaka kikumi mwo makumi gabili orwo yafire. Elisholye likaba litakagizire kibubi anga wenene kuhwa mani mu rugingo. 8Abaisiraeli bakamuchulira omu mpita za Moabu ebiro makumi gashatu; ahanyuma bayabya orufu.

9Yoshua eya Nuni akaba aijwire omwoyo gw'obumanyi, aha rw'okuba Musa akaba amutaireho emikonoye. Kityo Abaisiraeli bakamuhulira, bakora nk'okwo Omukama yabaiire aragire Musa. 10Kwema aho omuli Isiraeli takabagaho murangi nka Musa, ow'Omukama yamanyaga likabonangana bubona. 11Thaliho n'omoi alikumushusha aha rw'obubonero n'ebitangazo eby'Omukama yamutumire kukora omu nsi ya Misiri, ebyo yakoleire Farao n'abaramatabe bona n'ensiye yona, 12n'aha rw'obushoborabwe obw'amani, n'ebigiro bikuru byona ebilikutinisa ebyo Musa yakoleire Isiraeli yona.

Currently Selected:

Obwijukiro 34: RHAY01

Highlight

Copy

Compare