Obwijukiro 32

1“Iwe iguru, hulira ebyo ndikugamba;

n'ensi ehulire ebigambo by'akanwa kange.

2Ebyo ndikwegesa bigwe nk'enjura,

ebigambo byange bitonye nk'orume,

nk'enjura etalikwomba aha bunyasi buto,

nk'okwo eshesheka aha bimera.

3Aha rw'okuba ndayebuga eibara ly'Omukama.

Nsingiize Ruhanga waitu!”

4“Rwazi, omulimogwe guhikilire;

ahakuba emihandaye yona mazima.

Ruhanga ow'obwesigwa mara enzira kabi,

omunyamazima mara ali omw'iteka.

5Bamuhemukiire,

tibakili banabe aha rw'okuhagara kwabo;

muzarwa oguhabire mara ogulemaire.

6Nikwo olikusima oti Omukama,

iwe ihanga elifera elirofu?

Tiwe sho ayakutonzire,

ayakukozire akakutaho?”

7“Oijuke ebiro ebya karai,

otekeleze emyaka ey'emizarwa etali mike;

obaze sho arakwoleka,

abalikukukira obukuru, barakugambira.

8Orwo Ruhanga Rukirabyona

yahaire amahanga obusika bwago,

orwo yatanuraine abantu, akataho embibi z'amahanga,

buli kuhonderana n'orubara rw'abana ba Isiraeli.

9Omushondo gwa Ruhanga ihangalye,

Yakobo niwe busikabwe oburonkwa.”

10“Akamushanga omu nsi eyomire,

omw'irungu elilikukunga;

akamuzingora, yamumanya,

yamulinda nk'emboni y'eliisholye.

11Nk'okwo enkwaju etengatengya ekishunkuli kyayo,

neharara eiguru y'ebyana byayo,

ekashanshurura amapapa gayo ekabikwata,

ekabitwara aha mapapa gayo.

12Omukama mushai niwe yahabwire Yakobo,

mara akaba ataina Ruhanga omunyamahanga.

13Akamuhindura mutwazi w'ensi z'amabanga ezitungamire,

yalya ebyezire omu musiri;

yamuha obwoki bw'omu rwazi yanyunya,

n'amajuta omu rwazi rw'enkangabuye.

14Amajuta g'obuhyo bw'ente,

n'amata omu buhyo bw'entaama,

n'ebishaju by'obutaama n'empaya z'entama.

Amahyo g'entaama ga Bashani n'embuzi,

n'engano enungi muno,

banywa edivai, obwamba bw'ezabibu.”

15“Kyonkai Yeshuruni okagomoka wakunama;

okagomoka, wahanguha, wabengeya;

aho wanagirana Ruhanga ayakutonzire,

wajamya Rwazi ayakurokoire.

16Bakafukamira baruhanga abanyamahanga

bamuligiija yabuba,

bayekoza ebinyamunuge bamunigaza.

17Bakatambira abazimu abatali baruhanga ebitambo,

baruhanga abo batamanyaga,

baruhanga abahya abaizire juba,

abo basho batatinaga.

18Tiwajukire Rwazi ayakuzaire,

Wayebwa Ruhanga ayakuzaire.”

19“Omukama akakibona yabashaima,

aha rw'enshonga y'abatabani n'abahara kumunigaza.

20Aho agamba ati, ‘Ndabesheleka,

mbone okwo endekelero yabo eraba;

aha rw'okuba bonene muzarwa ogukikamire,

bana abataina bwesigwa.’

21Bafukamire ekitali Ruhanga

bandigiija nabuba;

bafukamira ebishushani byabo bannigaza.

Kityo nanye ndakoza eihanga litali ihanga

mbaligiije, babube;

nkoze eihanga elifera mbanigaze.

22Omuliro niguhembwa ekiniga kyange,

mara nikyokya kugoba Sheoli okuzimu;

nigulya ensi n'eby'eyelize,

mara nigwokya emisingi y'amabanga.”

23“Ndabatuumaho enaku;

mbamalireho emyambi yange.

24Enjara erabakondoigya,

baitwe eilimbe emokomoko n'endwara ey'amashagwa,

ndabasindikira amaino g'ebikaaka,

n'amashagwa g'ebintu ebilikwekurura omu chuchu.

25Omu kangaratete embanda erabaita,

kandi omu bisiika harabamu orumatu;

gusilikye omusigazi n'omwisiki,

omwana alikwonka n'omugurusi.

26Nakugambiire nti, ‘Ndibanaganaga harai,

mbebese omu bantu,’

27kuba ntatiinire babisha batanshesheza,

ababisha babo bataija bakatekeleza ebitalibyo,

bakagamba bati, ‘Twasinga, twina amani,

ebyo tibyakorwa Mukama.’ ”

28“Ahakuba bonene ihanga elitaina ntegeka,

mara tibalikushobokerwa.

29Kuba bali bamanyi bakushobokeirwe ekyo,

bakumanyire endekelero yabo!

30Omuntu omoi yakubinga atai orukumi,

n'abantu babili bakakinigya enkumi ikumi,

Rwazi wabo atabagulize,

n'Omukama atabaihiremu mikono?

31Kuba rwazi wabo ti nka Rwazi waitu,

nangu n'ababisha baitu nibaramura batyo.

32Aha rw'okuba omuzabibu gwabo

niguruga omu muzabibu gwa Sodoma

n'omu misiri ya Gomora,

ezabibu zabo zabibu z'amashagwa,

engoobe zazo nizikambarara;

33edivai yabo mashagwa g'enjoka,

obushagwa rwita obw'enchwera.”

34“Isi ebi tibibiikirwe mwange,

bikomirwe omu sitoa zange?

35Okwehoroza kwange, n'okurongora,

orwo omwanya guragoba amaguru gabo gakatelera;

aha rw'enshonga ekiro ky'akabuta kabo kili haihi,

n'amaheleruka gabo nigaija bwangu.

36Omukama araramura abantu,

agilire abairube embabazi,

orwo arabona okwo amani gabahwa,

mara hathaliho asigaireho, omwiru anga atali mwiru.

37Aho aragamba ati, ‘Baruhanga babo bali nkahai,

rwazi owo bahungiiremu;

38ayaliire ebishaju by'ebitambo byabo,

akanywa edivai y'ekihongo kyabo eky'okunywa?

Nibaimuke babajunesi, nibabalinde!’ ”

39“Mbwenu mubone okwo inye n'inye nyenene,

mara thaliho ruhanga shana inye;

n'inye nyita mara ninye ngiza oburora;

n'inye mputaza mara n'inye nkiza,

mara thaliho n'omoi ayakunyihya mubisha mu mikono.

40Nyimukya omukono gwange eiguru,

nahira okwo ndikurora eirai lyona;

41kandahyora embanda yange elikumyansa,

nkaimukya omukono nkarahira,

ndayehoroza ababisha bange,

ndongore abannoba.

42Emyambi yange ndagitamiza obwamba,

embanda yange elye enyama,

n'obwamba bw'abaisirwe n'abakwetwe endore,

n'emitwe y'abakuru b'ababisha.

43Haisiliza abantube, inywe mahanga,

aha rw'okuba nayeholera obwamba bw'abantube,

nayehoroza ababishabe,

nagarulira n'abantube amafu gabo.”

44Musa na Yoshua eya Nuni bakagambira abantu oruhoya oru rwona.

Omurago gwa Musa

45Musa kayabaire yamazire kugambira Abaisiraeli ebigambo ebi, 46abagambira ati, “Byona ebyo ndikubakomeleza mbwenu mubite aha mutima nirwo mulibona kubishubiramu abana banyu, nirwo balikwata Amateka aga. 47Ebigambo ebi ti bya muzano. Ahali inywe burora. Mubihulire nirwo mulirama omu nsi eyo mulikushabuka Yorudani kulya.” 48Kiro kyonene ekyo Omukama agambira Musa ati, 49“Otembe Eibanga eli lya Abarimu, Eibanga lya Nebo omu nsi ya Moabu, elilebangaine na Yeriko, olebe ensi ya Kanaani eyo ndikwija kuha Abaisiraeli kulya. 50Aha ibanga elyo mbali oratemba niyo oragwa, niyo orafera, nk'okwo Aroni murumuna wawe yafereire aha ibanga lya Hori, niho yagwire, 51aha rw'enshonga timwanyesigire mu maisho ga Baisiraeli aha maizi ga Meribatikadeshi, omw'Irungu lya Sini. Mukankunukuruza omu bantu. 52Ensi eyo ndiha Abaisiraeli oraginagira amaisho kushai, toligigyamu.”

Currently Selected:

Obwijukiro 32: RHAY01

Highlight

Copy

Compare