Obwijukiro 31
31
Yoshua nasikira Musa
1Musa agendelera kugambira Isiraeli yona ebigambo ebyo. 2Akabagambira ati, “Kir'eki nyina emyaka 120; tinkishobora kukora kantu. Omukama angambire ati, ‘Yorudani egi tolikwija kugishabuka.’ 3Omukama Ruhanga wanyu wenene niwe arabebembera akagishabuka, akasilikya amahanga aga agali mbali mulikugya, aganyage. Kandi okwo agambiire Yoshua niwe arabebembera akashabuka. 4Amahanga ago Omukama aligakora nk'okwo yakozire Sihoni na Ogi abakama b'Abaamori n'ensi yabo, akabasilikya. 5Omukama arabanaga omu mikono yanyu nainywe mubagire okwo nabaragira. 6Mugume mara mumanzare. Mutatiina anga mutagwa mu rumatu, Omukama Ruhanga wanyu niwe alikugenda nainywe, tabanage anga kubaihyamu mikono.”
7Aho Musa ayeta Yoshua omu maisho ga Isiraeli yona amugambira ati, “Ogume mara omanzare; ahakuba n'iwe oragenda n'abantu aba omu nsi ey'Omukama yanahiliire baishebo okwo aligibaha, ogibahe bagilye. 8Omukama niwe alikugenda akwebembeire, araba naiwe, takunage anga kukwihyamu mikono. Otatiina anga kuhangarwa mutima.”
Amateka gashomwe buli myaka mushanju
9Musa ahandika Amateka aga agaha abakuhani Abalevita, abatwaraga Esanduku y'Omukama y'Endagano, n'abagurusi bona ba Isiraeli. 10Abaragira ati, “Aha nzindo ya buli myaka mushanju, aha kanya k'okugarulingana amabanja akatairweho, aha kiro kikuru ky'ensisira, 11orwo Isiraeli yona eragyaga kufukamira Omukama Ruhanga wanyu omu mwanya ogwo alironda, obashomere Amateka aga. 12Ohuruze abantu: Abashaija, abakazi, n'abana bato, n'omufuruki ali omu nsi yanyu, bahulire mara bamanye kutina Omukama Ruhanga wanyu, n'okwegendeleza kukwata Amateka aga gona. 13N'abana babo abatakagamanyire bagahulire kandi bege okutina Omukama Ruhanga wanyu ebiro byona ebyo mulitura omu nsi eyo mulikushabuka Yorudani kugya kulya.”
Ebyo Ruhanga yaragiire Musa bili by'enzindo
14Omukama agambira Musa ati, “Oli haihi kufa. Yeta Yoshua mutahe omw'Ihema ly'Omuterano nyiwe mutume.” Aho Musa na Yoshua bataha omu Ihema ly'Omuterano. 15Omukama aboneka omu nyomyo y'ekichwi ayemeleire aha kishasi ky'Eihema.
16Agambira Musa ati, “Leba waija kufa, aho eihanga eli lirahinduka lishushe malaya, lihondere baruhanga ab'ensi eyo mulikugya kuturamu; baransigaho, bachwe endagano eyo nkozire nabo. 17Bir'ebyo balinsigaho ndibanigalira muno, mbaihyemu emikono, mbesheleke mara basilike. Baligwerwa enaku zingi n'enshengo, bagobe n'aha kugamba bati, ‘Enaku ezi zatugwera aha rw'okuba Ruhanga takili naichwe.’ 18Bir'ebyo ndibesheleka limoilimoi aha rw'enshonga y'amafu gabo, kufukamira baruhanga abandi. 19Mbwenu aha rw'ekyo ohandike oruhoya oru, orwegese Abaisiraeli aba baruhoye, rulinjulira ahali bonene. 20Aha rw'okuba kandiba nabatahize omu nsi elikusheshekana amata n'obwoki eyo nanahiliire baishebo okwo ndigibaha, orwo baliba baliire baigusire, bagomokire, balifukamira baruhanga abandi babe nibo bakolera, inye bangaye kandi bachwe n'endagano yange. 21Orwo baliba bagweleirwe enaku zingi n'enshengo, balijuka oruhoya oru runjulire baijukuru babo tibalirwebwa, baliikara nibaruhoya. Enshonga namanyire emigendelero yabo eyo bainayo, ntakabatahize mu nsi eyo nanahiire kubaha.” 22Kityo kiro kyonene ekyo Musa ahandika oruhoya oru, ashuba arwegesa Abaisiraeli. 23Kandi Omukama aragira Yoshua eya wa Nuni ati, “Ogume mara omanzare, kuba iwe olitahya Abaisiraeli omu nsi eyo nanahire kubaha; ndiba naiwe.”
24Orwo Musa yabaire yamalire kimoi kuhandika Amateka aga omu kitabo, 25aragira Abalevita abatwaraga Esanduku y'Omukama y'Endagano ati, 26“Mutware ekitabo eki ky'Amateka, mukiteke omu rubaju rw'Esanduku y'Omukama wanyu y'endagano, Amateka aga galibakomeeka. 27Aha rw'okuba nimanya okwo muli bashengi, mwina elyeleme. Leba mwashenga Omukama mwaha tuli hamoi nkyarora; isi biliba bitai kandiba nafire! 28Munyetere abagurusi bona b'enganda zanyu n'abatwazi banyu nyije mbagambire ebigambo ebi babihulire, mara njulize eiguru n'ensi, bilibakomeeka. 29Nimanya okwo kandiba nafire mulikora kubi, mwange kukora ebyo nabaragira, kandi biro ebilija enaku zilibagwera, enshonga muligokera Omukama mumunigaze, orwo mulikora ebyo yabatangire.”
Oruhoya rwa Musa
30Musa agamba oruhoya oru ruhwayo, enteko yona ya Isiraeli ehuliliize, ati:
Currently Selected:
Obwijukiro 31: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
