Obwijukiro 30

Okugarurwa buhya n'omugisha

1“Mbwenu aha nabaha omugisha n'omuraamo, mwihyeho kimoi. Orwo ebigambo ebi byona biliba byababaireho, orwo muliba nimutura omu mahanga ag'Omukama aliba abanagiremu; mulijuka ekyo nabagambira kamwihyaho. 2Ka inywe na baijukuru banyu muligaruka aha Mukama, mukahulira emihangoye eyo ndikubaragira kir'eki n'omutima gwanyu gwona n'omwoyo gwanyu gwona; 3aho Omukama Ruhanga wanyu alibaganyira abagilire embabazi, abaihye omu mahanga mbali aliba abanaganagire, ashube abatunge emilembe. 4N'orwo muliba munagirwe harai muno, Omukama Ruhanga wanyu alibaihyayo 5abatahye omu nsi eyo baisheinywe baturagamu mugilye, mara abahindure bana kushaga bonene. 6Inywe na baijukuru banyu aliborobya emitima, mumugonze n'omutima gwanyu gwona n'omwoyo gwanyu gwona nirwo mulirora. 7Emiraamo egi aligiteza ababisha banyu ababanoba bakabagingiiza. 8Mulishuba muhulire eby'Omukama alikubaragira, mara n'emihangoye yona mugikwate nk'okwo ndikubaragira kir'eki. 9Ebyo mulikora alibigoshora byona, muzare abana bangi, ebitunganwa mutunge bingi, n'emyaka mulime mweze nyingi. Aha rw'okuba alishuba abashemelerwe nk'okwo yashemelerwaga baisheinywe abagoshore, 10kamulihulira eby'alikubaragira mukakwata emihangoye n'ebiragirobye ebihandikirwe omu kitabo eki ky'Amateka, mukamugarukaho n'omutima gwanyu gwona n'omwoyo gwanyu gwona.”

11“Ahakuba omuhango ogu ogwo ndikubaragira kir'eki tigwakubagumira muno. 12Tiguli mw'iguru, kwija kugamba oti, ‘N'ohai aratugyera omw'iguru kugutuletera tukaguhulira tukagukwata?’ 13Nangu kugir'oti guli buseli bw'enyanja kwija mukagamba muti, ‘N'ohai aratushabukira enyanja, akagutuletera tukaguhulira tukagukwata?’ 14Ekigambo kili omuli inywe: Kibali omu kanwa n'omu mutima, kityo mukihulire.”

15“Mubone, kir'eki nimbaha oburora n'ebirungi, orufu n'enaku. 16Kamulihulira emihango y'Omukama Ruhanga wanyu eyo ndikubaragira kir'eki, mukamugonza, mukakora eby'alikwenda mara mukakwata emihangoye n'ebiragirobye n'emigenzoye, aho mulirora mukanye, kandi n'omu nsi eyo mulikutahamu kulya alibaha omugisha. 17Kyonkai kamulihinduka emitima mukanga kumuhulira, mukagenda kubafukamira mukaba nibo mukolera, 18kir'eki nimbagambira mbagambiire, mulisilika. Timulirama mu nsi eyo mulikushabuka Yorudani kutahamu kugilya. 19Ninahira eiguru n'ensi okwo nabateka omu maisho ganyu oburora n'orufu, omugisha n'omuraamo. Aha rw'ekyo murondeho oburora nirwo mulirora na baijukuru banyu, 20mukagonza Omukama Ruhanga wanyu, mukahulira eby'alikubaragira mukamugumaho. Nirwo muligira oburora burai, mukatura omu nsi ey'Omukama yanahiliire baisheinywe Aburahamu Isaka na Yakobo okwo aligibaha.”

Currently Selected:

Obwijukiro 30: RHAY01

Highlight

Copy

Compare