Obwijukiro 29

Endagano y'Omukama na Isiraeli omu nsi ya Moabu

1Ebi nibyo bigambo by'endagano eby'Omukama yaragiire Musa n'abantu ba Isiraeli omu nsi ya Moabu, endagano eyo yabaire akozire nabo ahali Horebu etabulimu. 2Aho Musa ayeta Isiraeli yona abagambira ati, “Mukebonera eby'Omukama yakozire omu nsi ya Misiri, ebyo yakozire Farao n'abaramatabe n'ensiye yona. 3Mukebonera ebiyengo ebyabaireho n'obubonero n'ebitangazo bilinya eby'amani. 4Kyonkai kuhika kir'eki Omukama takabahaga magezi ga kushobokerwa anga maisho ga kubona anga matwi ga kuhulira. 5Mbarabize omw'irungu emyaka 40 kyonkai emyendo yanyu tekabatemukiraga aha mubili. Nangu n'enkaito zanyu tizikahweleraga aha maguru ganyu. 6Timwaboine kyakulya anga divai ya kunywa nangu n'amarwa che, mubone kumanya okwo inye ndi Mukama Ruhanga wanyu. 7Orwo mwaizire munu, Sihoni omukama wa Heshiboni na Ogi omukama wa Bashani, bakabatabalira yaba ndashana kyonkai twabasinga. 8Ensi yabo tukagitwara twagiha Abarubeni, Abagadi n'enusu y'oruganda rwa Manase, twagibaha obusika. 9Aha rw'ekyo mwegendeleze kukwata ebigambo by'endagano egi, nirwo byona ebyo mulikukora biligoshoka.”

10“Kir'eki inywena mwemeleire omu maisho g'Omukama Ruhanga wanyu; abakuru b'enganda zanyu, abagurusi banyu, abatwazi banyu, abashaija bona ba Isiraeli, 11abana banyu, abakazi banyu, n'omufuruki ali omu rusisira rwanyu, nabasiza enkwi nabatahira amaizi. 12Muli hanu aha kukora endagano n'Omukama Ruhanga wanyu n'okutora eby'endagano egyo elikubaragira, 13aho Omukama ahamise okwo muli ihangalye na wenene okwo ali Ruhanga wanyu nk'okwo yabaraganisize, kandi nk'okwo yanahiliire baisheinywe abalimu Aburahamu, Isaka na Yakobo. 14T'inywe nywenkai ab'Omukama alikukora nabo endagano egi. 15Nagikora na ichwena abamwemeleire hanu aha omu maisho na baijukuru baitu abatakazairwe.”

16“Inywe nimumanya okwo twaturaga Misiri n'okwo twarabire omu nsi y'amahanga agandi. 17Mukabona ebinyamunuge, baruhanga babo ab'emiti n'amabare, ab'efeza n'ezahabu ebyo babaire bainabyo. 18Muramanya omuli inywe hatakubamu mushaija anga mukazi, eka anga ruganda kuruga aha Mukama Ruhanga waitu kir'eki kugenda kufukamira baruhanga ab'amahanga galinya. Ekyo kyakushusha omuzi ogw'okumerwamu omuti gw'amashagwa mara ogulikukambarara. 19Muramanya hatakubaho muntu n'omoi hanu aha kir'eki kuhulira endagano egi akashuba akagamba okwo atabe kantu n'orwo yakujema akagira okwo yayenda. Ekyo kyakubaisa inywena, omurungi n'omubi. 20Omukama taliganyira muntu nk'ogu. Alimunigalira kubi, n'emiraamo ehandikirwe omu kitabo eki emukwate, ashube amufute omu nsi omu. 21Omukama alimushorora omu nganda zona za Isiraeli, agwerwe enaku kuhonderana n'emiraamo y'endagano ehandikirwe omu kitabo eki ky'Amateka. 22Aho omuzarwa ogulija ogwa baijukuru banyu, n'omunyamahanga aliruga omu nsi y'aharai, kabalibona enaku eziliba ziteire ensi yanyu n'endwara ez'Omukama aliba agisindikiire baligamba bati, 23‘Ensi yona buganga, mwonyu, ruhiira, tebyairwemu kantu, telikumerwamu kantu, tiyakumera bunyasi, esosotoirwe kya Sodoma na Gomora, Adima na Seboimu, ebigo eby'Omukama yasosotoire azimbeziibwe ekiniga.’ 24Nikwo amahanga gona galyebaza gati, ‘Kubaki Omukama yagizire ati ensi egi? Akagiliraki ekiniga kingi kiti?’ 25Aho abantu bhalihorora bati, ‘Aha rw'okuba bakanagirana endagano y'Omukama Ruhanga wa baishebo eyo yakozire nabo orwo yabaihire Misiri, 26bagenda bakolera baruhanga abandi, babafukamira, baruhanga abo batamanyaga mara abo atabaragiire. 27Aha rw'ekyo akanigalira muno ensi egi, yakwatwa emiraamo yona ehandikirwe omu kitabo eki. 28Omukama akabaihya omu nsi yabo akwetwe ekiniga ekibi eky'amani muno yabarasha omu nsi endijo, na kir'eki niyo bali.’ 29Haliho ebintu eby'Omukama Ruhanga waitu yashelekire; kyonkai akatuha Amateka aga. Ichwe na baijukuru baitu eirai lyona tukwate Amateka aga gona.”

Currently Selected:

Obwijukiro 29: RHAY01

Highlight

Copy

Compare