Obwijukiro 28

Omugisha gw'omuhuliro

(Eby 26:3-13; Obw 7:12-24)

1“Kamulihulira eby'Omukama Ruhanga wanyu alikubaragira, nimwegendeleza kukwata emihangoye yona eyo ndikubaragira kir'eki, alibatungika eiguru y'amahanga gona g'ensi. 2Kamulihulira eby'Omukama Ruhanga wanyu alikubaragira n'emigisha egi yona eliba yanyu. 3Omukama aliha endimiro zanyu n'ekigo kyanyu omugisha. 4Alibatunga abana n'emyaka n'ente n'entaama zingi. 5Entukuru zanyu n'enyato zanyu z'okukandiramu alibiha omugisha. 6Alitunga omugisha ebyo mulikora byona.”

7“Ababisha banyu abalibatabalira Omukama alibasinga. Balibatabalira balesirwe omuhanda gumoi, kandi omu kubairuka balitwarwa emihanda mushanju. 8Emilimo yanyu aligiha omugisha, n'esitoa zanyu azijuze emyaka. Alibaha omugisha omu nsi ey'Omukama Ruhanga wanyu alikubaha. 9Omukama alibataho mube ihangalye elitakatifu, nk'okwo yabanahiliire kamulyekomya emihangoye mukakora eby'alikwenda. 10N'amahanga gona g'ensi galibona Omukama yabaronkire kamuba ihangalye, mara galibatina. 11Omukama alibatunga abana bangi n'ebitunganwa, n'emyaka mulyeza nyingi omu nsi mwonene ey'Omukama yanahiliire baisheinywe okwo aligibaha. 12Alibagwisiza enjura omu kirumo kyayo n'emilimo yanyu yona aligiha omugisha. Mulihora amahanga gangi kyonkai inywe timulyehoza. 13Kandi alibahindura batwazi, timulitwarwa. Muliikara mugoshokire timulizaha kamulihulira emihango y'Omukama Ruhanga wanyu, eyo ndikubaragira kir'eki, mukegendeleza kugikwata, 14mukaikara muli besigwa aha byo ndikubaragira kir'eki, mutahigire baruhanga bandi kubafukamira.”

Ebiliizira entahulira

(Eby 26:14-46)

15“Kyonkai kamuliba mutahuliire eby'Omukama Ruhanga wanyu alikubaragira, anga mutegendeleize kukwata mihangoye yona n'ebiragirobye ebyo ndikubaragira kir'eki, aho emiraamo egi yona elibagwera ebakwate. 16Omukama aliraama ebigo byanyu n'endimiro zanyu. 17Aliraama entukuru zanyu n'enyato zanyu z'okukandiramu. 18Alibaraama abahe abana bake, emyaka mweze mike, n'ebitunganwa byanyu by'entaama n'ente tibilikanya. 19Ebyo mulikora byona alibiraama.”

20“Kamulikora kubi mukaruga aha Mukama, alibasindikira emiraamo, ebyo mulikora byona mulibikora nimubumbulikwa nimwekanasha, mara babasilikye muhweho bwangu. 21Aliikara abasindikire endwara mulemwe muhwe inywena omu nsi eyo mulikutahamu kulya. 22Alibarwaza orufuba n'omushwago, mubujuke emibili murwaire eibugumo; omushana gujwe ogwa ibarura, habeho n'omushana gw'eilimbe n'obukuku; bilibazigilira mulemwe muhweho. 23Eiguru lilitukura nk'omulinga, n'ensi egumangane nk'ekyoma. 24Ensi eliburwa enjura, elibasindikira orutumulira n'echuchu, byeme eiguru bibaragalire mulemwe musilike. 25Omukama alibaihyamu emikono, ababisha banyu babasinge. Mulibatabalira mwemire rubaju rumoi, kandi aha kusingwa mulitwarwa emihanda mushanju; mara omu ngoma zona z'ensi muliba kinyamununge. 26Emitumbi yanyu elilibwa ebinyonyi n'ebigunju, mara thaliho n'omoi alibitinisa kabigenda. 27Alibateza ebihute bya Misiri, n'ebironda, n'enfumbi, n'obuhere n'okurumwarumwa ebyo mutakutambirwa. 28Alibarwaza eiraru, abahumise, mara mubumbulikwe. 29Mulikarakanja omw'ihangwe, nk'okwo empume ekarakanja omu mwilima. N'ebyo mulikora tibiligoshoka. Mulishaijuruzibwa n'okunyagwa obutosha, mara thaliho n'omoi alibajuna. 30Mulishelera abakazi kyonkai bashwerwe bashaija bandi. Mwombeke amaju kyonkai timuligaturamu. Mulime endimiro z'emizabibu kyonkai timulizilyaho zabibu. 31Ente zanyu balizibaitira omu maisho, kyonkai timulizilyaho nyama. Endogobe zanyu zilitwarwa rwamani mulebire, mara timulizibona rundi. Entama zanyu baliziha ababisha banyu, kyonkai thaliho n'omoi alibajuna. 32Abana banyu balitwarwa eihanga elindi mulebire kushai, mujunare ekiro kyona, kandi timuligira mani ga kubatanga. 33Eihanga elyo mutalikumanya lililya byona ebyo muliba mwelize omu mpiita, mushube mwikare nimushaijuruzibwa kushai n'okubonesibwa enaku obutosha. 34Ebyo mulibona ebyo bililemwa bibararure. 35Omukama alibateza ebihute ebilikunena muno aha majwi n'aha maguru, kwema omu kilenge kugoba aha mutwe, mara tibilitambwa.”

36“Inywe n'omukama wanyu owo mulitaho, alibatwara omw'ihanga ly'abanyamahanga elyo baisheinywe batamanyaga. Kulinya mulifukamira baruhanga abandi ab'emiti n'amabare. 37Muliba kinyamununge babachweho omugani mara babageye omu mahanga gona mbali Omukama alibanaga. 38Mulibiba bingi omu misiri, kyonkai muligeshamu bike, aha rw'okuba enzige zilibilya. 39Mulibyara emizabibu n'okugishakulira, kyonkai timuligihururaho zabibu kuginywaho divai, aha rw'okuba eliliibwa ekihuka. 40Omu nsi yanyu yona mulilima endimiro y'emizeituni, kyonkai timulyesiiga majuta, ahakuba ezeituni zayo ziliragara. 41Mulizara abana, kyonkai tibaliba banyu aha rw'okuba balinyagwa. 42Enzige zilikuuta emiti yanyu yona n'ebyo muliba mwelize. 43Omufuruki aliba abafurukiiremu aligenda nabatungama aha mutwe; kandi inywe muligenda nimutentena. 44Alibahora kyonkai inywe timulimuhora. Aliba mukama kyonkai inywe muliba batwarwa. 45Emiraamo egi yona elibakwata mulemwe musilike, enshonga y'okutahulira byo Mukama Ruhanga wanyu alikubaragira, kukwata emihangoye n'ebiragirobye ebyo yabaragire. 46Ebibonabonyio ebyo inywe na baijukuru banyu mulibijukiraho ebiro byona.”

47“Omukama Ruhanga wanyu abatungire omugisha omuli byona, mwaburwa kumukolera n'ebyera n'amashemelerwa. 48Kityo mulikolera babisha ab'Omukama alibasindikira. Muligira enjara n'eiliho muburwe n'eky'okujwara, muburabulirwe buli kantu. Alibakoma enkomo y'ekyoma omu bikya, alemwe abasilikye. 49Omukama aliihya eihanga harai muno libatabalire, obwangu nk'okwo malere eharara, eihanga elyo mutalikushobokerwa rulimi rwalyo, 50ely'obuso bukambire, elitalifaho mugurusi anga mwana, 51lililya ebitunganwa byanyu n'emyaka eyo muliba mwelize, mulemwe musilike. Tililibasigira mwaka, divai anga majuta, n'ebitunganwa chei, n'entama chei. Ahanyuma balemwe babasilikye. 52Balibabundira omu bigo byanyu byona, eboma eziraizirai ezo mwesiga zilikumba omu nsi yanyu ey'Omukama Ruhanga wanyu yabahaire. 53Mulilya abana banyu abo mwezaliire, ab'Omukama abatungire, aha rw'ababisha banyu kubabunda bakabashasa. 54Omushaija omufura muno alezirwege aliima omurumuna ekyakulya, n'omukazi omugonzibwawe, nangu n'omwana w'enzindo ow'aliba asigaizeho. 55Talikunda kubahaho nyama y'abaanabe ab'alikulya, aha rw'okuba talisigarwaho kantu orw'omubisha alibabundira omu bigo byanyu akabashasa. 56Omukazi omufura muno alezirwege, atakuzilize kuteka kilengekye aha itaka aha rw'obunyiginya n'obuyonjobwe, aliima iba omugonzibwawe, aime n'omutabani n'omuhara, 57abaime n'enda ya nyuma, alibaima n'abana ab'alizara, aha rw'okuba alibalya ayeshelekire. Enshonga ebintu byona bilibura orwo alibabunda akabashasa omu bigo byanyu.”

58“Kamuliba mutegendeleize kukwata Mateka aga gona agahandikirwe omu kitabo eki mukatina Omukama Ruhanga wanyu ow'eibara ly'ekitinwa, 59aho inywe n'abana banyu Omukama alibateza enaku ezitakabonekaga, enaku n'endwara ezibi mara ezitali za kuhwaho. 60Kandi alishuba abaletere endwara zona za Misiri ezo mwatinaga, zibaberezo. 61Alibaletera buli ndwara na buli naku ebitahandikwe mu kitabo eki ky'Amateka, mulemwe musilike. 62N'orwo mubaire muli bangi nk'enyanyinyi, mulisigaraho bake, orwo mutalikuhulira eby'Omukama Ruhanga wanyu alikubaragira. 63Kandi okwo yashemelerwaga kubakolera ebirungi mara akabahindura bangi, nikwo alishemelerwa kubainaza akabasilikya. N'ensi eyo mulikutahamu kulya aligibakunyuramu. 64Alibanaganaga omu mahanga omu nsi zona, mugye mukolere baruhanga abandi ab'emiti n'amabare, abo mutamanya, na baisheinywe tibabamanyire. 65Omu mahanga aga timulibonamu bwikarage, nangu n'obuhumuzo bw'ekilenge bwonkai timulibubonamu. Alibachundizayo emitima abalerembulireyo amaisho, abafundagatanisizeyo emyoyo. 66Mulirora nimuhwahwana, nyemishana n'ekiro mwikare omu rumatu, timuligira na mbali mwasimbisiza burora. 67Bwankya muligamba muti, ‘Isi kuba bw'aba buli bwaigoro!’ Kandi bwaigoro muti, ‘Isi kuba bw'aba buli bwankya!’ Aha rw'enshonga y'orumatu orwo muligira, n'ebyo mulibona. 68Omukama alibagarura Misiri abashubiseyo emeli, n'orwo yagambiire okwo atalibagarurayo rundi. Omu nsi eyo mulyehongera ababisha banyu kubagura mukahinduka bairu n'abazana, kyonkai thaliho muntu alibagura.”

Currently Selected:

Obwijukiro 28: RHAY01

Highlight

Copy

Compare