Obwijukiro 27
27
Emiku ya Ruhanga eyahandikiirwe aha mabare
1Aho Musa n'abagurusi ba Isiraeli baragira abantu bati, “Mukwate emihango yona eyo ndikubaragira kir'eki. 2Kandi kir'ekyo mulishabuka Yorudani kutaha omu nsi ey'Omukama Ruhanga wanyu alikubaha, musimbe amabare gahango mugasilibe; 3mara mugahandikeho ebigambo byona eby'amateka aga, orwo muliba muli omu nsi elikusheshekana amata n'obwoki, nk'okwo Omukama Ruhanga wa baisheinywe yabaraganisize. 4Kamuliba mwashabukire Yorudani musimbe amabare aga, gakwete aha byondikubaragira kir'eki aha Ibanga lya Ebali mara mugasilibe. 5Kulinya mwombekereyo Omukama Ruhanga wanyu ealutare y'amabare; mutaligateza kikwato kya kyoma. 6Mwombekere Omukama Ruhanga wanyu ealutare y'amabare agatabaizirwe, mugimutambilireho ebihongo by'okwokibwa. 7Mutambe n'ebitambo by'emilembe, mulye mushanduke omu maisho g'Omukama Ruhanga wanyu. 8Kandi muhandike geigeigei aha mabare ebigambo byona eby'amateka aga galikugamba.”
9Musa n'abakuhani b'ekilevita bagambira Isiraeli yona bati, “Isiraeli, oyesize mara ohulire. Kir'eki waba ihanga ly'Omukama Ruhanga wawe. 10Aha rw'ekyo orahulira ebyo alikukugambira, okwate emihangoye n'ebiragirobye ebyo ndikukuragira kir'eki.”
Omuramo gw'obutahulira
11Kiro kyonene kyonene Musa aragira abantu ati, 12“Kamuliba mwashabukire Yorudani, aba bemelere aha Ibanga lya Gerizimu kuha abantu omugisha: Simeoni, Levi, Yuda, Isakari, Yozefu na Benjamini. 13Kandi aba bemelere aha Ibanga lya Gerizimu kuraama: Rubeni, Gadi, Asheri, Zabuloni, Dani na Nafutali. 14Kandi Abalevita baligambira Abaisiraeli bona n'eiraka lihango bati, 15‘N'akaraamwe omuntu abaija ekishushani anga akakijuguta: Ekinyamununge aha Mukama, ekikozirwe omubuya mara akakyemeleza ayeshelekire.’ Abantu bona bahorore bati, ‘Amina.’ ”
16“N'akaraamwe alikunukuruza ishe anga nyinai. Abantu bona bagambe bati, ‘Amina.’ 17N'akaraamwe alisimbura ekihanyia kya mwataniwe. Abantu bona bagambe bati, ‘Amina.’ 18N'akaraamwe alihabisa empume omu muhanda. Abantu bona bagambe bati, ‘Amina.’ ”
19“N'akaraamwe aligobeza omufuruki, enfuuzi n'entumbwakazi. Abantu bona bagambe bati, ‘Amina.’ 20‘N'akaraamwe alijura mukaishe akabyama nawe.’ Abantu bona bagambe bati, ‘Amina.’ 21‘N'akaraamwe alihamba ekigunju kyona kyona.’ Abantu bona bagambe bati, ‘Amina.’ 22‘N'akaraamwe alibyama na munyanya, owa ishe anga owa nyina.’ Abantu bona bagambe bati, ‘Amina.’ ”
23“N'akaraamwe alibyama na nyinaizara. Abantu bona bagambe bati, ‘Amina.’ 24‘N'akaraamwe aliita mutahiwe bwesheleke.’ Abantu bona bagambe bati, ‘Amina.’ 25‘N'akaraamwe alitora rushwa kwita omuntu ataina ntambara.’ Abantu bona bagambe bati, ‘Amina.’ 26‘N'akaraamwe aliba atekomize bigambo bya Mateka aga akabihikya.’ Abantu bona bagambe bati, ‘Amina.’ ”
Currently Selected:
Obwijukiro 27: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
