Obwijukiro 26

Ebihongo by'amagesha

1“Kamuliba mwatahire omu nsi ey'Omukama Ruhanga wanyu alikubaha obusika, mwagiliire, mwagitwiremu, 2mukwate ebyo mulyeza bili bya mbere, mubiteke omu ntukuru, mugende mbali Omukama Ruhanga wanyu alironda kuba niho asingira. 3Mugobe omukuhani aliba ali aha zamu omu kanya ako, mumugambire muti, ‘Kir'eki nitumanyisa Omukama Ruhanga wawe okwo tutahire omu nsi ey'Omukama yanahiliire batataichwe kutuha.’ 4Aho omukuhani alitora entukuru, agite ahansi omu maisho ga ealutare y'Omukama Ruhanga wanyu.”

5“Nainywe omu maisho g'Omukama Ruhanga wanyu mugambe muti, ‘Omuaramea ayabaire nashusha omuraro akaba ali tataichwe. Akafurukira Misiri n'abantu bake yahindukirayo ihanga lihango, ely'amani, ely'abantu bangi. 6Abamisiri bakatukora kubi batushasa batuhindura bairu, batukoza n'emilimo y'obwiru ey'amani. 7Aho twatakira Omukama Ruhanga wa batataichwe, yahulira eiraka lyaitu, yabona obushasi bwaitu n'okushaijuruzibwa kwaitu; 8yatwihya Misiri n'amani n'obushobora buhango, yakora n'eby'okutiinisa muno, n'obubonero n'ebitangazo. 9Yatuleta munu yatuha n'ensi egi, elikusheshekana amatai n'obwoki. 10Leba, mbwenu twaija kuganuza ebyo tulimire tukeza, ebyo iwe waitu Mukama otutungire.’ Aho mubiteke ahansi omu maisho g'Omukama Ruhanga wanyu, mumufukamire. 11Musime Omukama Ruhanga wanyu aha rw'ebyo aliba abatungire n'amaka ganyu n'Omulevita n'omufuruki ali omwawe.”

12“Kamuliba mwamazire kushashura ekichweka kya ikumi ky'ebyo muliba mwelize omu mwaka gwa kashatu, nigwo mwaka gw'okuleteramu ekichweka kya ikumi ekyo ky'Omulevita, omufuruki, enfuuzi n'entumbwakazi abali omu bigo byanyu balye baigute, 13aho mugambe omu maisho g'Omukama Ruhanga wanyu muti, ‘Omwange nyihiremu omugabo gutakatifu naguha Omulevita, omufuruki, enfuuzi n'entumbwa, kuhonderana n'emihango yawe yona eyo wandagiire. Tinchwire na gumoi anga kugwebwa. 14Tindire aha kichweka kya ikumi orwo mbaire ninchura, anga kugira ako nagihyaho orwo mbaire mpagaire, anga kugihongera abafire; mpuliire eiraka ly'Omukama Ruhanga wange, ebyo wandagiire mbikozire byona. 15Singa oyeme omw'iguru mbali osingiire olebe ahansi; ohe abantu bawe ba Isiraeli omugisha, n'eitaka ely'otutungire nk'okwo wanahilire batataichwe, ensi elikusheshekana amatai n'obwoki.’ ”

Abantu ba Ruhanga

16“Kir'eki Omukama Ruhanga wanyu nabaragira kukwata ebiragiro ebi n'emigenzo egi. Aha rw'ekyo mwegendeleze kubikwata n'omutima gwanyu gwona n'omwoyo gwanyu gwona. 17Kir'eki mwagamba bugamba okwo Omukama ali Ruhanga wanyu n'okwo mulikora eby'alikubaragira, mukakwata ebiragirobye n'emihangoye n'emigenzoye, mukahulira n'eby'alikubagambira. 18Kir'eki Omukama yabagamba bugamba okwo muli ihangalye nyabwe nk'okwo yabaraganisize n'okwo muragiirwe kukwata emihangoye yona, 19n'okwo arabatungika eiguru y'amahanga gona ago yataireho mukahaisilizibwa, mukagira eiranga n'ekitinwa, n'okwo muliba ihangalye elitakatifu, nk'okwo yagambiire.”

Currently Selected:

Obwijukiro 26: RHAY01

Highlight

Copy

Compare