Obwijukiro 23

Abantu ba Ruhanga

1“Omushaija ayasirwe eihasha anga ashazirweho obushaija atalitaha mu nteko ya Mukama. 2Omwana w'ensinjo atalitaha mu nteko ya Mukama; nangu kulemwa kuturuka aha muzarwa gwa ikumi thaliho mwijukuru n'omoi alitaha mu nteko ya Mukama. 3Thaliho Mwamoni anga Mumoabu kutaha mu nteko ya Mukama; nangu kulemwa kuturuka n'aha muzarwa gwa ikumi, taliho muntu n'omoi ali wabo alitaha mu nteko ya Mukama eirai lyona; 4kuba tibabahaire kyakulya na maizi orwo mwabaire nimuruga Misiri, kandi bakabagulilira Balaamu mutabani wa Beori owa Petori omuli Mesopotamia kubaraama. 5Kyonkai Omukama Ruhanga wanyu tiyahuliire Balaamu. Akaba nabagonza, omuraamo yaguhindura mugisha. 6Ebiro byona mutalibajuna anga kutunda nabo kubatungisa. 7Mutalinuga Baedomu kuba ni barumuna banyu. Mutalinuga Bamisiri ahakuba mukaba mufurukire omu nsi yabo. 8Abana babo ab'omuzarwa gwa kashatu bakutaha omu nteko y'Omukama.”

Orusisira rwikare nirwera

9“K'orabaga oli omu ndashana oyelinde ekintu kyona kyona ekibi omu rusisira. 10K'omuli inywe omushaija alihagara aha rw'enshonga y'okurotelera omu kiro akarugwamu amaizi g'oruzaro, aruge omu rusisira, atalitahamu rundi. 11Kabuliba bwaigoro ayoge; orwo eizoba liliba lyatobeire, yakutaha omu rusisira.”

12“Mugire omwanya enjai y'orusisira mube niyo mwejuna. 13Omu bikwato byanyu mugiremu omushote; k'oligya aheru kwejuna ogulimise ekina, oshube omwejuno gwawe ogusangire. 14Kuba Omukama Ruhanga wanyu ali hamoi nainywe omu rusisira rwanyu kubarokora mukasinga ababisha banyu. Aha rw'ekyo orusisira rwanyu ruragiirwe kuba rutakatifu, atalija akabonamu kihagaro akashubayo akabasigaho.”

Emiku endijo

15“Omwiru ayairuka mukamawe akaija ahali iwe otalimugarura wa mukamawe. 16Ekigo ekilimushemelera akaba nikyo arondaho muture nawe; otalimugingiza. 17Omu Baisiraeli hatalibamu mumalaya wa rwensinga anga nsiyaga ya rwensinga. 18Otalileta mperwa ya malaya anga mperwa ya nsiyaga omuli Rwensinga y'Omukama Ruhanga wawe kugobesheleza kiragano; aha rw'okuba byombili ebyo binyamunuge aha Mukama Ruhanga wawe.”

19“Othalihora murumuna wawe okenda magoba; amagoba aha mahera, amagoba aha byakulya, amagoba aha kintu kyona kyona eky'okuhorwa kwihyamu amagoba ago. 20Omunyamahanga wakumuhora oyenda amagoba, kyonkai Omwisiraeli murumuna wawe otalimuhora okenda magoba; nirwo Omukama Ruhanga wawe aliha emilimo yawe yona omugisha omu nsi ey'olikutahamu kulya. 21K'olikolera Omukama Ruhanga wawe endagano otalizebera kugigobesheleza; aha rw'okuba aligikubaza, mara omushango gulikukwata. 22Kyonkai k'olyelinda okuragana, tolikwatwa mushango. 23Oyegendeleze kugobesheleza ekirugire omu kanwa kawe, okeyendera okagira ekyo waraganira Omukama Ruhanga wawe.”

24“K'olitaha omu ndimiro ya mutahi wawe y'emizabibu, wakulya ezabibu zingi nk'okwo olikwenda oiguta, kyonkai otakugira zowata mu kikwato kutwara. 25K'olitaha omu musiri gw'engano, wakuguturamu kyonkai obigutuze emikono, omusiligwe otaligutamu rwabyo.”

Currently Selected:

Obwijukiro 23: RHAY01

Highlight

Copy

Compare