Obwijukiro 24

Okutambya n'okushwera buhya

1“K'omushaija yakutahya omukazi akamushwera, ahanyuma omukazi ogwo akamutama aha rw'emize, yakuhandika ebarua y'okumutambya mara amubinga omwe. 2Kandi k'aligenda akashwerwa omushaija ondijo, 3na mushaijawe owa nyuma akamutamwa akamuhandikira ebarua y'obutaane akagimuha akamubinga omwe, anga mushaijawe owa nyuma kayakufa, 4aho mushaijawe owa mbere tiyakumugarura k'aba mukaziwe rundi orwo yahagaire. Omukazi ogwo yabaire muziro aha Mukama; otalileta ntambara omu nsi ey'Omukama Ruhanga wanyu alikubaha obusika.”

Emiku endijo

5“Orwo omushaija ashweire juba atalitabara na ihe anga kukwasibwa mwoga gwona. Aikare omuka omwaka gwona aikaze mukaziwe owo ashweire. 6Omuntu atalikwatilizibwa mukwato gwa rubengo anga nseiso; aha rw'okuba yakuba nakwatilizibwa oburora bw'omuntu. 7K'omuntu yakukwatwa naiba Omwisiraeli omurumuna, kimukwata akamuhindura mwiru anga akamuguza, kimukwata ogwo afe. Nikwo mulichwa mutyo omuze ogwo omuli inywe.”

8“Olimanya k'olikwatwa ebibembe, oyegendeleze kukora byona nk'okwo abakuhani Abalevita balikuragilira. Okwo nabaragire oyekomye kuba nikwo okora otyo. 9Ijuka eky'Omukama Ruhanga wawe yakozire Miriamu omu muhanda orwo mwabaire nimuruga Misiri. 10K'olihora mutahi wawe eibanja ly'engeli yona yona, otaligya mwe kwehigira mukwato. 11Oyemelere aheru wenene abe niwe agukushoholeza. 12Kandi k'aliba ali munaku otalirara mu mukwatogwe. 13Orwo eizoba lilitobera omugarulire omukwato abone kurara omu beboye mara akuhe omugisha. Aho oliba okoleire kurungi Omukama Ruhanga wawe.”

14“Otaligingiza mwiru omukozi w'emilimo, omunaku mara omworo. Alikaba Mwisiraeli murumuna wawe anga muntu afurukiire mu nsi yanyu omu bigo byanyu. 15Omuhe emperwaye aha kir'ekyo yagikolera eizoba litakatobeire; enshonga munaku mara n'omutimagwe niho agutaire; atalikutegelera aha Mukama okakwatwa omushango. 16Baishebantu batalitwa nibaturwa bana. N'abana batalitwa nibaturwa baishebo. Buli muntu aitwe naturwa bufubwe nyabwe.”

17“Otaligobeza mufuruki anga nfuuzi, anga omwendo gw'entumbwakazi kugutwara mukwato. 18Oijuke okwo wabaire oli mwiru omuli Misiri n'okwo Omukama Ruhanga wawe yakuchungwireyo. Aha rw'ekyo ninkuragira ntyo. 19K'oliba nogesha omusiri gwawe okebwayo omuganda, otaligarukayo kuguhiga. Guliba gw'omufuruki, enfuuzi n'entumbwa, nirwo Omukama Ruhanga wawe aliha omugisha emilimo yawe yona ey'olikora. 20K'olinoga ezeituni zawe, amatagi otaligashubaho. Eziliba zisigairemu ziliba z'omufuruki, enfuuzi n'entumbwakazi. 21K'olinoga ezabibu omu ndimiro yawe y'emizabibu, otalishubamu kunoga za kabili. Ezo ziliba z'omufuruki, enfuuzi n'entumbwakazi. 22Olijuka okwo wabaire oli mufuruki omu nsi ya Misiri. Aha rw'ekyo ninkuragira ntyo.”

Currently Selected:

Obwijukiro 24: RHAY01

Highlight

Copy

Compare