Obwijukiro 22

1“Otalibona nte ya Mwisiraeli murumuna wawe anga ntaama nebura okagyehurubasa; ogigarulire murumuna wawe. 2K'aliba atakuli haihi anga otalikumumanya, ogitware omuka omwawe, oikare nayo kuhika orwo murumuna wawe alija kugihiga; aho oligimugarulira. 3Kutyo nikwo oligira n'endogobeye, n'ekijwarokye, n'ekintu kyona kyona ekibuzire, ekya murumuna wawe eky'alinaga okaronda. Otalyanga kumujuna. 4Otalibona ndogobe ya murumuna wawe anga nteye egwire ahansi aha muhanda okanga kuzijuna. Omujune ozimukye.”

5“Omukazi atalijwara kijwaro kya mushaija n'omushaija atalijwara kijwaro kya mukazi. Alikukora ebintu nk'ebi naba ali kinyamunuge omu maisho g'Omukama Ruhanga wanyu. 6Kawakugwamu ekishunkuli ky'ekinyonyi, omu muti gwona gwona anga ahansi, kilimu obwana anga amahuli, otalitwara nyinabwo hamoi na bwana bwonene. 7Otaishure nyinabwo agende, aho obwana wakubutwara; nirwo oligira emilembe mara okarama.”

8“K'olyombeka enju, ogyombekeho n'akago aha rushwi, otaija okaletera enju yawe entambara y'obwitamuntu. Kuba omuntu yakwema aha rushwi akuntuka. 9Endimiro yawe y'emizabibu otaligibyaramu mpambo za ngeli ibili. K'olikor'otyo bilihagara byona: Empambo n'ezabibu. 10Otalilimisa nte na ndogobe hamoi. 11Otalijwara mwendo gwa bintu ebitabangijainyie: Obwoya bw'entaama n'ehuzi za kitani hamoi. 12Aha pembe inai z'ebebo yawe y'okweshweka ogiteho ebituuti.”

Amateka g'obushwere

13“Omushaija kayakushwera omukazi akamugoba, kyonkai ahanyuma akamutamwa, 14akamuhangilira, akamwitira eibara ati, ‘Nshweire mukaziki ogu! Kamugobire nshangire atakili mwisiki,’ 15aho ishe mwisiki ogwo na nyinai, bakwate obubonero bw'obubikirabwe babuletere abagurusi b'ekigo aha kihigi. 16Ishe mwisiki ogwo agambire abagurusi ati, ‘Nkasiigira omushaija ogu muhara wange, mbwenu talikumwenda namunoba.’ 17Kandi amuhemwire ati, ‘Muhara wawe mushangire ali mukazi.’ Kyonkai obu nibwo bubonero bw'obubikira bwa muhara wange. 18Bakwate omushaija bamutere; 19mara bamuteho endihi z'eshekeli z'efeza, bazihe ishe mwisiki ogwo, aha rw'okuba aliba 100 ateire omubikira wa Isiraeli eibara libi; mara abe mukaziwe, ebiro byona tiyakushobora kumutambya. 20Kyonkai kakiliba kilikwo, obubonero bw'obubikira tibwabonekire mu mwisiki, 21aho bamushohoze omwa ishe aha kishasi, ab'omu kigokye bamuteze amabare bamwite, aha rw'okuba aliba alesire ekigoko omuli Isiraeli orwo ateleire obumalaya omwabo. Nikwo mulichwa mutyo omuze ogwo omuli inywe.”

22“K'omushaija yakukwatwa abyamire na muk'omushaija, bombili bafe; omushaija ayabyama n'omukazi, n'omukazi wenene. Nikwo mulichwa mutyo omuze ogwo omuli Isiraeli. 23K'haliba haliho omwisiki alikushelerwa, omushaija akamutanganwa omu kigo akabyama nawe, 24aho bombili mubaturukye omu kigo, mubateze amabare mubaite. Omwisiki aha rw'okuba tiyataka kabamujuna n'orwo yaba ali omu kigo, kandi n'omushaija orwo yahagaza muka mutahiwe. Nikwo mulichwa mutyo omuze ogwo omuli inywe.”

25“Kyonkai k'omushaija yakutanganwa omwisiki aheru akamuhamba, aho omushaija wenkai ayamuhamba abe niwe afa, 26omwisiki mutalimukoraho kantu; taina ntambara ya kumwisa. Eki ni nk'okwo omuntu yakutabalira mutahiwe akamwita. 27Kuba yamuhambira aheru, mara n'orwo omwisiki alikushelerwa yatera enduru kabamujuna, tihazoka muntu n'omoi wa kumujuna.”

28“K'omushaija yakutanganwa omwisiki atakasheleirwe, akamuhamba, mara bakakwatwa, 29aho omushaija ayamuhamba ahe ishe mwisiki eshekeli 50 z'efeza, mara abe mukaziwe orwo yamuhemura; ebiro byona tiyakushobora kumutambya. 30Omushaija atalishwera muka ishe, anga kumujura.”

Currently Selected:

Obwijukiro 22: RHAY01

Highlight

Copy

Compare