Obwijukiro 21
21
Obwita muntu
1“Omu nsi ey'Omukama Ruhanga wanyu alikubaha kulya, kabalishanga omuntu aisirwe, abyamire omw'ishwa, mara amwisire atalikumanyika, 2aho abagurusi banyu n'abaramuzi, bagende batere ebita kuruga ahali ogwo aisirwe kugya aha bigo ebimwataine. 3Abagurusi b'ekigo ekili haihi muno n'omuntu aisirwe bakwate enyana y'enkiraiziba etakakozibwaga mulimo mara etakakururaga nkomo, 4bagisongore omu ruhanga rw'amaizi galikugera, orutalimirwe mara orutabyairwemu. Omu ruhanga orwo babe nimwo bahendera enyana egyo y'enkiraiziba ebikya. 5Abakuhani Abalevita nabo bagyeyo aha rw'okuba Omukama Ruhanga wanyu akabaronda kabamukolera n'okuha abantu omugisha omw'ibaralye. Okwo baliramura nikwo, aho empaka n'endwano bihwe. 6Kandi abagurusi bona b'ekigo ekili haihi muno n'omuntu aisirwe banabire emikono yabo aha nyana eyahendwa ebikya omu ruhanga; 7bajulire bati, ‘Omuntu ogu titumwisire, kandi n'amwisire titumuboine. 8Waitu Mukama baganyire abantu bawe Abaisiraeli abo wachungwire, otabakwata ntambara y'okwitwa kwa nyakatetere.’ 9Kityo orwo mulikora eby'Omukama alikuragira, timulikwatwa mushango gwa bwitamuntu.”
Abakazi embohe z'endashana
10“Kamulitabalira ababisha banyu, mara Omukama Ruhanga wanyu akababanaga omu mikono mukabatwara endore, 11omu ndore okabonamu omukazi murungi, okamwenda kumushwera, 12sho omulete omuka omwawe, amoise omutwegwe mara achwije n'empamboze. 13Ajure ekijwaro ky'endore; aikare omwawe achulire ishe na nyinai omwezi gumoi. Ebyo kabilihwa wakumugoba oba mushaijawe, na wenene aba mukazi wawe. 14K'oliba otamushemeleirwe omutaishure agende mbali arayenda; kyonkai otalimuguza, mara orwo wamuhemwire otalimuhindura muzana.”
Obusikisa
15“K'omushaija aliba aina abakazi babili, omoi nagonzibwa ondijo nanobwa, mara bombili bamuzaliire abana, k'omwojo omuzigaijo aliba ali wa kinobwa, 16kiro ekyo alisikisa abatabani eitungalye, ataligilira kigonzi mwana w'omugonzibwa kumuhindura muzigaijo. 17Aikilize omuzigaijo omwana owa kinobwa, amuhe omushondo gw'enyaibili gw'eby'ainabyo byona; ahakuba niwe kiraba kya mbere ky'amanige; ehaki y'omuzigajo y'omuzigaijo.”
Omwana atalikuhulira bazaire
18“K'omuntu aliba aina omutabani enyeleme mara omushengi, atalikuhulira ebyo ishe anga nyina balikumugambira, n'orwo bamuha ekibonabonyio akanga kubahulira, 19aho ishe na nyina bamukwate bamuletere abagurusi aha kihigi ky'ekigo ekyo balikuturamu. 20Bagambire abagurusi abo bati, ‘Mutabani waitu nyeleme mara mushengi, talikutuhulira; muntu w'omururu mara ntamiizi,’ 21aho abantu bona b'ekigo bamuteze amabare, afe; nikwo mulichwa mutyo omuze omuli inywe. Isiraeli yona ehulire etine.”
Emiku endijo
22“Kandi omuntu alikora entambara esanire ekibonabonyio ky'orufu mara akaitwa, kamulimuhanika aha muti, 23omubiligwe gutaliraraho kiro kyona. Mumuziike kiro kyonene aha rw'okuba omuntu ahanikirwe aha muti aba araamirwe Ruhanga. Mutalihagaza nsi yanyu ey'Omukama Ruhanga wanyu alikubaha obusika.”
Currently Selected:
Obwijukiro 21: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
