Obwijukiro 20
20
Endashana
1“Kamulitabara kurashanisa ababisha banyu, mukabona babashagisa efarasi n'amagali n'eihe lihango, mutalibatina. Omukama Ruhanga wanyu ayabaihire Misiri aliba ali hamoi nainywe. 2Kamuliba muli haihi kurashana, omukuhani aije omu maisho agambire abantu 3ati, ‘Baisiraeli hulira! Kir'eki mwatabara kurashanisa ababisha banyu; mutahukuka mitima, mutatina anga kuchundwa; batabahahanisa mitima. 4Omukama Ruhanga wanyu natabara nainywe, kurashanisa ababisha banyu mukasinga.’ 5Aho abakuru b'eihe balibaza abantu bati, ‘N'ohai ayombekire enju kyonkai takagyelize? Ashube omu njuye atakwija akagwa mu ndashana, omuntu ondijo atakwija akagyeza. 6N'ohai alimire emizabibu kyonkai atakagiliireho zabibu? Ashube omwe atakwija akagwa mu ndashana ondijo akaba niwe agilyaho ezabibu. 7Isi haliho alikushelera omukazi kyonkai atakamushweire? Ashube omwe atakwija akagwa mu ndashana omuntu ondijo akaba niwe amushwera.’ 8Abakuru abo bagendelere kubaza abantu bati, ‘Aliho alikutina, alikuhukuka omwoyo? Ashube omwe, batahibe batakwija bakayuguuma nka wenene.’ 9Aho orwo abakuru balimara kubaza batyo abantu, bateho abaragirwa b'okwebembera abatabazi.”
10“Kamuligoba ekigo kukirashanisa, mubanze mubahe obushango bw'okwimukya emikono. 11Kabalibakingulira bakaimukya emikono, aho bona abalishangwamu bahinduke bairu banyu mukabokoze emilimo: Mubajarabe. 12Kyonkai kabaliba batabaimukize mikono bakagonza kamurashana, aho ekigo mukibunde. 13Mara Omukama Ruhanga wanyu k'alinaga abashaija bamwo omu mikono yanyu, mubaise embanda. 14Abakazi n'abana mubanyage n'ebitunganwa na buli kintu ekili omu kigo, mubitware eminyago. Omukama Ruhanga wanyu aliba abahaire eminyago egyo, mushemelerwe. 15Nikwo muligira mutyo ebigo byona ebibali harai muno, ebitali bya mahanga ag'omu. 16Kyonkai orwo mulikwata ebigo eby'omu nsi ey'Omukama alikubaha obusika, mwite buli muntu. 17Mubasilikye limoilimoi: Abahiti n'Abaamori, Abakanaani n'Abaperizi, Abahivi n'Abayebusi nk'okwo Omukama Ruhanga wanyu aragiire; 18batalija bakabegesa emichwo yabo emibi ey'okufukamira baruhanga babo, aho mukafakalira Omukama Ruhanga wanyu.”
19“Orwo muliba nimuhiga kukwata ekigo, mutalitema miti yamwo ey'ebiraba. Ebiraba byayo mubilye, kyonkai emiti mutaligitema. Emiti eli omu ndimiro yaba bantu kugitabara? 20Emiti ey'olikumanya okwo etali ya kyakulya ogiteme ogikore ebitanda eby'okwemeleraho kurashanisa ekigo ekyo kuhika orwo kilikumba.”
Currently Selected:
Obwijukiro 20: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
