Obwijukiro 19

Ebigo by'obuhungiro

(Orub 35:9-28; Yos 20:1-9)

1“Orwo Omukama Ruhanga wanyu alisilikya amahanga ag'alikubaha ensi yago, mara akagiganyaga kandi mukatura omu bigo byago n'omu maju gago, 2mwahure ebigo bishatu omu nsi egyo ey'Omukama Ruhanga wanyu alikubaha kulya. 3Muteme emihanda, kandi omu nsi ey'Omukama Ruhanga wanyu alikubaha buha, mugisharemu ebichweka bishatu, kityo wena wena araitaga omuntu ashobore kuba nimwo ahungira.”

4“Ebyo biliba buhungiro bw'ayakwita omuntu, abe nimwo airukira akahunga. Omuntu aliita mutahiwe atagendeleire, obuzira kushanga abaire nanobangana nawe omu biro ebihingwire 5nk'okwo omuntu yakugya omu kibira na mutahiwe kushenya enkwi, akaimukya endyamiti kutema omuti, endyamiti ekachoka omu muhini ekatera mutahiwe akafa, yakwirukira omu kigo kimoiho omuli ebi ahunga; 6alikweholera omurumuna atalija kiniga kimuzimbeize akabinga kiitamuntu akamukwata aha rw'okuba omuhanda gurai, akamuhutaza kubi n'orwo yaba atasaine kwitwa aha rw'okuba abaire ataina nobi na mutahiwe ebiro ebihingwire. 7Aha rw'ekyo nimbaragira mwahure ebigo bishatu. 8Kandi k'Omukama Ruhanga wanyu alihanguhya ensi yanyu nk'okwo yanahiliire bashw'enkurw'inywe, 9ekikuru mwekomeleze kukwata emihango egi yona eyo ndikubaragira kir'eki, mugonze Omukama Ruhanga wanyu, buli kanya mukore eby'alikwenda. Ahanyuma mwongereho ebigo ebindi bishatu ahali ebi. 10Omuntu ataina ntambara atalitwa mu nsi ey'Omukama Ruhanga wanyu alikubaha obusika, kandi mukakwatwa entambara y'obwitamuntu.”

11“Kyonkai k'omuntu alinoba mutahiwe, akamuzimbira, akamutera mara akamuhutaza muno akafa, akairukira omu kigo kimoiho omuli ebi, 12aho abagurusi b'ekigokye bamwihyeyo, bamukwase ow'okumwehora, amwite. 13Mutalimushasibwa, shana muchwe omuli Isiraeli entambara y'okwita omuntu ataina ntambara, nirwo muligira emilembe. 14Omu busika bwanyu obwo mulilya omu nsi ey'Omukama Ruhanga wanyu alikubaha, otalisimbura kihanyia kya mutahi wawe, eky'abagurusi aba karai batairemu.”

Obujulizi

15“Omujulizi omoi talikumara kukwata muntu ntambara anga ekikorwa kyona kyona ekyo yakuba akozire. Abajulizi babili anga bashatu nibamara kukwata omuntu omushango. 16Omuntu w'orwango k'araimuka kutoijera omuntu wena wena okwo yakora kubi, 17aho bombili abalikutoijanyia bagye omu maisho g'Omukama, omu maisho g'abakuhani n'abaramuzi abali aha ntebe omu bir'ebyo; 18abaramuzi banyomoze geigeigei. Kakitoija aliba ali mutoizi w'ebishuba, akashangwa abeiyeleire mutahiwe, 19aho mumugire nk'okwo abaire nagonza kugira murumunawe. Muchwe mutyo omuze omuli inywe. 20Abasigaire bahulire batine, mara tibalishobora kukora kibi nk'eki omuli inywe. 21Mutalimushasibwa; bibe biti: Oburora bwihwe oburora, elisho lihwe elisho, elino lihwe elino, omukono gwihwe omukono, okuguru kwihwe okuguru.”

Currently Selected:

Obwijukiro 19: RHAY01

Highlight

Copy

Compare