Obwijukiro 18

Omugabo gw'abakuhani

1“Abakuhani abalevita, nirwo ruganda rwona rwa Levi, tibaligira mushondo anga busika muli Isiraeli; baralyaga ebihongo by'okwokibwa ebihongeirwe Omukama n'ebyo basaine kuhabwa. 2Tibaligira busika mu barumuna babo; Omukama niwe busika bwabo nk'okwo yabaraganisize. 3Ebi nibyo abantu baragiirwe kuha abakuhani, abalikutamba ekitambo: K'eliba eli nte anga ntaama, bahe omukuhani omukono n'enshaya zombili n'orubunda. 4Engano eyo muliganuza, kwakwo n'edivai n'amajuta, n'obwoya bwa mbere bw'entaama mubibahe. 5Omukama Ruhanga wanyu abaronzire omu nganda zanyu zona kuba bakuhani bakamukolera, bonene na baijukuru babo ebiro byona.”

6“Omulevita wena wena ayakwenda, yakuruga omu kigo kyona kyona omuli Isiraeli mbali alikutura, aija mbali Omukama alironda kufukamirwaho, 7akora nk'omukuhani w'Omukama Ruhangawe, nk'Abalevita batahibe bona ab'alikukolera Omukama halinya. 8Ahabwe ekyakulya ekigaine n'eky'abakuhani abandi, eky'ab'omuka balikumutwekera kitabulimu.”

Mwelinde emichwo y'abatakansi

9“Orwo muligoba omu nsi ey'Omukama Ruhanga wanyu alikubaha, mutalyega michwo mibi ey'amahanga ago. 10Abana banyu mutalibatamba bitambo bya kwokibwa. Mutaligira mbandwa anga omuteki w'enshoga, anga omushazi w'enkoko, anga omurogi, anga omukonikoni, 11anga omufumu, anga alikwehanuza aha bafire. 12Aha rw'okuba wena wena akora ebintu ebi ahemukira Omukama; mara aha rw'enshonga y'emigilire egi ey'obuhemu, nikyo Omukama alikubingira amahanga ago orwo mulikutaha omu nsi yago. 13Mube nyakatetere aha Mukama Ruhanga wanyu. 14Kuba amahanga aga ago muli haihi kunyaga gakwata eby'abateki b'enshoga n'embandwa; kyonkai inywe ebyo Omukama Ruhanga wanyu talikubajubura kubikora.”

Okutweka omurangi

15Musa abagambira ati, “Omu Baisiraeli barumuna banyu Omukama Ruhanga wanyu alibaihiramu omurangi, ogwo mulimuhuliliza. 16Nk'okwo mwashabire Omukama Ruhanga wanyu ahali Horebu aha kiro ky'enteko, muti, ‘Tutashubira kuhulira iraka lya Mukama Ruhanga waitu anga kubona muliro gungi guti ogu, tutaija tukafa.’ 17Omukama akangambira ati, ‘Ebyo bagamba bagamba kurungi. 18Omu Baisiraeli barumuna babo ndabaihiramu omurangi nka iwe, muragire eby'aragamba, mara arabibagambira byona. 19Kandi omuntu arayanga kuhulira ebigambo byange ebyo aragamba omw'ibara lyange, inye nyenene ndamubonabonyia. 20Kyonkai omurangi aralengesa kugamba ekigambo omw'ibara lyange ekyo ntamuragiire kugamba, anga aragamba omw'ibara lya baruhanga abandi, omurangi ogwo afe.’ 21Nimwija kwebaza muti, ‘Turamanya tutai ekigambo eky'Omukama atagambire?’ 22Orwo omurangi aragamba omw'ibara ly'Omukama, k'ekigambo kiraba kitabaireho anga kitabairekwo, ekyo nikyo kigambo eky'Omukama araba atagambire; omurangi araba akyetumire, mutamutina.”

Currently Selected:

Obwijukiro 18: RHAY01

Highlight

Copy

Compare