Obwijukiro 17

1“Otalitambira Mukama Ruhanga wawe nte anga ntama einaho kamogo anga akatamosho kona kona, ogwo muziro aha Mukama Ruhanga wawe. 2K'omu kigo kimoiho omu bigo byanyu eby'Omukama Ruhanga wanyu alikubaha, halibonekamu omushaija anga omukazi alikugokera Omukama Ruhanga wanyu omu kuchwa endaganoye 3akagenda akakolera baruhanga abandi mara akabafukamira, eizoba anga okwezi, anga enyanyinyi yona yona ebyo mbatangire, 4kamulikigambirwa mukashuba mukakihulira, aho munyomoze geigeigei. Kakilibakwo obuzira kulengeshanyia okwo ekihemu nk'ekyo kikozirwe omuli Isiraeli, 5aho muturukye omushaija ogwo anga omukazi akozire ekihemu ekyo aha kihigi kyanyu mumuteze amabare mumwite. 6Ogwo ow'okufa, aitwe haliho abajulizi babili anga bashatu; omuntu atakwitwa haliho mujulizi omoi. 7Abajulizi babe nibo bamuteza amabare bali ba mbere, ahanyuma abandi bona bahondereho. Nikwo mulichwa mutyo omuze ogwo omuli inywe.”

8“Kahaliimukwa omushango ogubagumiire muno, gube gw'obwita muntu anga gw'entongana, anga gw'endwano anga empaka zona zona omubigo byanyu, aho mwimukye mugende mbali Omukama Ruhanga wanyu araronda; 9mugye aha bakuhani b'ekilevita, n'aha muramuzi araba ali aha ntebe omu bir'ebyo, mubehanuzeho; balibagambira okwo mulikora. 10Aho mukore kuhonderana n'okwo babagambira bemire aha mwanya gulinya ogw'Omukama alironda; mara mulyekomeleza kukora byona nk'okwo baliba babahabwire. 11Okwo balibaragilira mube nikwo mukora; mutakushaga aha kwo baliba babagambire. 12Omuntu aligira ekyeju akanga kuhulira omukuhani aliba ali aha zamu y'okuheleza Omukama Ruhanga wawe anga omuramuzi, omuntu ogwo afe. Muchwe mutyo omuze ogwo omuli Isiraeli. 13Abantu bona kabalihulira batyo balitina, mara thaliho alishuba kugira kyeju.”

Ebikwete aha bukama

14“Kamulitaha omu nsi ey'Omukama Ruhanga wanyu alikubaha, mukagilya mukagituramu, mukashuba mukagamba muti, ‘Turataho omukama nk'amahanga gona agatwataine;’ 15nikwo, mwakutaho omukama ow'Omukama Ruhanga wanyu alironda. Muteho Omwisiraeli wanyu abe mukama wanyu. Omunyamahanga atali Mwisiraeli murumuna wanyu, mutalimutaho k'abatwara. 16Ekiliho omukama ogwo atalitunga farasi zingi za ndashana, anga kushubya bantu Misiri kugya kutundayo farasi ezo, orwo Omukama Ruhanga abagambiire ati, ‘Omuhanda ogwo mutaligugarukamu lindi.’ 17Kandi atalishwera bakazi bangi bakaija bakamuhugura mutima. Ekindi otalitunga feza na zahabu nyingi muno.”

18“Orwo alishuntama aha nketoye y'obukama, ahandike ekitabo ky'ekopi y'Amateka aga nashubilira ebili omu kitabo ekibikirwe abakuhani abalevita. 19Aikare nakyo mara akishome ebiro byona by'oburorabwe, nirwo alyega kutina Omukama Ruhanga, kwekomya ebigambo byona by'Amateka aga n'ebiragiro ebi mara abihikye. 20Nirwo atalyekuza mu Baisiraeli abarumuna, akagumira kimoi aha mihango, akaba mukama akamelera, na baijukurube bakatwara Isiraeli amakiro garai.”

Currently Selected:

Obwijukiro 17: RHAY01

Highlight

Copy

Compare