Obwijukiro 16
16
Pasika
(Oku 12:1-20)
1“Oyekomeleze omwezi gwa Abibu, oshemelezega Omukama Ruhanga wawe Pasika, ahakuba omu mwezi gwa Abibu Omukama Ruhanga wawe akakwihya Misiri omu kiro. 2Omu buhyo bwawe bw'entaama anga bw'ente otambiremuga Omukama Ruhanga wawe ekitambo kya Pasika mbali alironda kufukamirwa. 3Otalikilya na mukate gwina itumbyo. Okilyega omu biro mushanju n'omukate gutaina itumbyo, omukate gw'enaku aha rw'okuba okaruga omu nsi ya Misiri omu bwangu. Olyega otyo Pasika obone kwijuka ekiro ekyo warugire omu nsi ya Misiri ebiro byona eby'oburora bwawe. 4Otalibonekwaho itumbyo omu nsi yawe yona ebiro mushanju. N'enyama y'ekitambo eky'olitamba bwaigoro bw'ekiro kya mbere etaliraraho kiro kyona kugoba bwankya. 5Omu bigo eby'Omukama Ruhanga wawe alikukuha otalitambiramu kitambo kya Pasika, 6shana kukitambira mbali Omukama Ruhanga wawe alironda kuba niho afukamirwa, obe niho otambira ekitambo kya Pasika, bwaigoro aha matobera g'eizoba, omw'izoba elyo warugire Misiri. 7Okichumbe mara okiliire mbali Omukama Ruhanga wawe alironda; kandi bwankya okwate omuhanda ogaruke omu mahema gawe. 8Ebiro mukaga olyega omukate gutaina itumbyo; kandi omu kiro kya mushanju habehoga enteko ntakatifu omu maisho g'Omukama Ruhanga wawe. Kir'ekyo otalikora mulimo.”
Ebiro bikuru by'eigesha
(Oku 34:22; Eby 23:15-21)
9“Obare amalimansi mushanju orwo wabanza oti kugesha emyaka. 10Aho orashemelezaga Omukama Ruhanga wawe ekiro kikuru ky'amalimansi, omuhongere ekihongo ky'obweyendezi omuganuze. Okwo Omukama Ruhanga wawe aliba akuhaire omugisha obe nikwo omuganuza. 11Mara oshanduke omu maishoge, iwe na mutabani wawe na muhara wawe, omwiru wawe n'omuzana wawe, Omulevita ali omwawe, omufuruki, enfuuzi n'entumbwakazi abalikutura omwawe, aha mwanya ogw'Omukama Ruhanga wawe alironda kuba niho asingira. 12Oijukega okwo wabaire oli mwiru omuli Misiri; mara oyegendeleze kukwata ebiragiro ebi.”
Ebiro bikuru by'eigesha
(Eby 23:33-43)
13“Oshemeze ekiro ky'ensisira ebiro mushanju orwo oramaraga kutera engano aha rwano n'okujunga edivai. 14Oshanduke aha kiro kikuru ekyo iwe na mutabani wawe na muhara wawe, omwiru wawe n'omuzana wawe, Omulevita, omufuruki, enfuuzi n'entumbwakazi abali omwawe. 15Ebiro mushanju oshemeleze Omukama Ruhanga wawe ekiro kikuru aha mwanya ogwo alironda. Olimuganuza otyo mara oshemelerwe, kuba emilimo yawe yona aliba agihaire omugisha.”
16“Kashatu omu mwaka nketwa mushaija wawe wena azoke omu maisho g'Omukama Ruhanga wawe aha mwanya ogwo alironda; aha kiro kikuru ky'omukate gutaina itumbyo, aha kiro kikuru ky'amalimansi n'aha kiro kikuru ky'ensisira. Batakuzoka mu maisho ga Mukama ngaro zishai; 17buli mushaija agabe nk'okwo alikushobora, kuhonderana n'omugisha gw'Omukama Ruhanga wawe ogwo akuhaire.”
Abaramuzi
18“Omu bigo byawe byona eby'Omukama Ruhanga wawe alikukuha kuhonderana n'enganda zawe otemu abaramuzi n'abakuru; mara baramure abantu eiramu ly'amazima. 19Otalikyora mazima; otalyoleka kigonzi; otalitora rushwa, aha rw'okuba rushwa ehumisa amaisho g'omumanyi, mara ehugura omushango gw'omuhikilire. 20Amazima, mara amazima gonkai obe nigo ohondera, nirwo olirora okasika n'ensi ey'Omukama Ruhanga wawe alikukuha.”
21“K'olyombekera Omukama Ruhanga wawe ealutare, aha rubaju rwayo otalitaho kihuuku kya Ashera. 22Kandi otalisimba nyomyo kugifukamira. Enyomyo ezo Omukama Ruhanga wawe azitamwa.”
Currently Selected:
Obwijukiro 16: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
