2 Samweli 9

Daudi nahikya endaganoye na Yonatani

1Daudi abaza ati, “Hakyaliho ow'eka ya Shauli asigaireho nkagira ekyo namugilira aha rwa Yonatani?” 2Hakaba haliyo omwiru w'omu ka ya Shauli eibaralye Ziba; bamwetera Omukama Daudi, yamubaza ati, “Iwe niwe Ziba?” Ahorora ati, “Omwiru wawe niwe.” 3Omukama ashuba amubaza ati, “Takiliyo muntu asigaireyo ow'eka ya Shauli nkaija nkagira ekyo namugilira aha rwa Ruhanga?” Ziba amugarukamu ati, “Haliyo mutabani wa Yonatani alemaire amaguru.” 4Omukama amubaza ati, “Ali nkahai?” Ziba amushubamu ati, “Ali Lodebari omwa Makiri eya Amieli.” 5Omukama Daudi nikwo kutuma bakamwihya Lodebari omwa Makiri. 6Agya owa Daudi, amujumara omu maisho amuramya. Daudi amweta ati, “Mefibosheti!” Ogu ayetaba ati, “N'inye omwiru wawe.” 7Daudi amugambira ati, “Otatina, kuba ndakugilira ekisha aha rwa Yonatani sho, nkugaruliire n'amataka gona ga Shauli shwenkuru. Kandi orata nolya aha kiihuro kyange ebiro byona.” 8Mefibosheti amwinamira, agamba ati, “Omwiru wawe yab'ohai, iwe kumwijukayo, embwa efire nka inye?”

9Ahanyuma Omukama ayeta Ziba omwiru wa Shauli amugambira ati, “Byona ebyabaire bili bya Shauli n'ekaye nabiha mutabani wa Mukama wawe. 10Kandi iwe na batabani bawe n'abairu bawe mumulimire emisiri. Amagesha mugamuletere abone ekyakulya. Kandi ebiro byona arata kulya aha kiihuro kyange.” Ziba hakaba aina abatabani 15 n'abairu 20. 11Aho agambira Omukama ati, “Rugaba Mukama wange, ebyo wandagira byona ndabikora.” Aho Mefibosheti ashusha omwana w'Omukama, ata kulya aha kiihuro kya Daudi. 12Mefibosheti hakaba aina omutabani muto eibaralye Mika. Kandi ab'omwa Ziba bona bahinduka bairu ba Mefibosheti. 13Mefibosheti atura atyo Yerusalemu, kuba ebiro byona yalyaga aha kiihuro ky'Omukama. Akaba alemaire amaguru gombili.

Currently Selected:

2 Samweli 9: RHAY01

Highlight

Copy

Compare