2 Samweli 8

Endashana za Daudi

(1Ma 18:1-17)

1Ahanyuma Daudi asinga Abafilisiti abajemurura, abaaka na Metegama.

2Yasinga Abamoabu yabarambika ahansi yabapimisa omuguha. Enjuru ibili zaba z'okwitwa, n'orujuru rumoi rwaba rw'okukira. Kwema aho Abamoabu baba bairube bamusholera omushoro.

3Kandi Daudi asinga Hadadezeri mutabani wa Rehobu, Omukama wa Zoba orwo yabaire nagenda kugarura ensi eyabaire eli omu butwazibwe aha Mwiga gwa Efurati. 4Yamunyaga abakuubi b'efarasi 1,700, n'abaisherukare ab'amaguru 20,000. Efarasi zona z'amagali yazitema ebinywa, yasigaho 100, zonkai ez'okusiika amagali. 5Yaita n'Abasiria ba Damasiko 20,000 orwo baizire kujuna Hadadezeri. 6Omuli Aramu eya Damasiko yasigamu abaisherukarebe kulinda ensi egyo, nikwo Abasiria kuba bairube bakamusholera omushoro. Omukama hakaba amwemamu hona mbali yatabaraga, asinga endashana. 7Engabo z'ezahabu ezakwatwaga abaramata ba Hadadezeri akazinyaga yazitwara Yerusalemu. 8Kandi akaihya omulinga gungi Beta na Berotai ebigo bya Hadadezeri nagwo yagutwara.

9Orwo Toi Omukama wa Hamati yahuliire okwo Daudi yasingire eihe lya Hadadezeri lyona, 10yamutumaho omutabani Yoramu kumushura n'okumwihukya aha rw'okutera Hadadezeri akamusinga. Hadadezeri yaikaraga narashanisa Toi. Yoramu akamutwalira ebintu by'efeza, n'ezahabu n'omulinga. 11Ebyo nabyo Omukama Daudi akabihongera Omukama hamoi n'efeza n'ezahabu ezo yanyagire omu mahanga ago yajemurwire, 12nk'Abaedomu, Abamoabu, Abaamoni, Abafilisiti, Abaamaleki, yamuhongeraho n'eminyago endijo eyo yanyagire Hadadezeri eya Rehobu, Omukama wa Zoba.

13Daudi akashuba yabona eiranga orwo yagarukire akaita Abaedomu 18,000 omu Ruhanga rw'Omwonyu. 14Omuli Edomu yatamu abaisherukare kugilinda, n'Abaedomu bona bahinduka bairube. Hona mbali yatabaraga Omukama yamwemagamu asinga endashana ezo.

Ab'emiruka omu bukama bwa Daudi

15Daudi akatwara Isiraeli yona, n'abantu abaramura eiramu ly'amazima. 16Omukuru w'eihe yabaga Yoabu mutabani wa Zeruya. Yehoshafati eya Ahiludi yamanyaga ebihandiko. 17Abakuhani ni Zadoki eya Ahitubi na Ahimeleki eya Abiatari. Omuhandiki ni Seraya. 18Benaya eya Yehoyada hakaba nakulira Abakereti n'Abapeleti. Kandi batabani ba Daudi nabo bakaba bali bakuhani.

Currently Selected:

2 Samweli 8: RHAY01

Highlight

Copy

Compare